Ihāia 32 - Paipera Tapu 2012

He Kīngi e Tika ana te Whakahaere

¹ Nanā, ka kīngi te kīngi i runga i te tika, ka whakahaere tikanga anō ngā rangatira i runga i te whakawā.

² Ā, ka ai he tangata hei kuhunga ina pā te hau, hei piringa kei mate i te tūpuhi; ka rite ki ngā awa wai i te wāhi maroke, ki te ata o te kōhatu nui i te whenua ngaunga rā.

³ Nā, e kore e atarua ngā kanohi o te hunga kite; ka whakarongo anō te hunga i te taringa rongo.

⁴ Ka mātauria anō te mātauranga e te ngākau o te hunga pōnānā, ā, ka hohoro te arero o ngā reo kīkiki ki te kōrero mārama.

⁵ E kore te wairangi e kīia i muri he ohaoha, e kore anō te kaiponu e kīia he atawhai.

⁶ Ka kōrero hoki te tangata nanakia i te nanakia, ā, ka mahi tōna ngākau i te kino, kia whakahāwea ai ki te tapu, kia puta kē ai tāna kōrero ki a Ihowā, kia noho tahanga ai i a ia te wairua o te tangata matekai, kia mōtī ai hoki he wai mō te tangata matewai.

⁷ He kino hoki ngā hanga a te kaiponu; e whakatakotoria ana e ia he whakaaro kino, he kōrero teka e hē ai te hunga iti, ahakoa e tika ana anō ngā kōrero a te rawakore.

⁸ He ohaoha ia ngā tikanga a te ohaoha; ā, ka ū ia ki ngā mahi ohaoha.

Ngā Wāhine o Hiruhārama

⁹ Whakatika e ngā wāhine e noho pai ana, whakarongo ki tōku reo; e ngā tamāhine whakaarokore, kia whai taringa, ki āku kupu.

¹⁰ He maha ngā rā i tua atu i te tau e raruraru ai koutou, e ngā wāhine maharakore; nō te mea ka kore te whakinga wāina, e kore hoki e tae mai te kohikohinga.

¹¹ E wiri, e ngā wāhine e noho hūmārie ana; pōkaikaha noa iho, e te hunga maharakore; whakarērea ngā kākahu, noho tahanga, whītikiria he kākahu taratara ki ō koutou hope.

¹² Ka papaki rātou ki ngā uma mō ngā māra ātaahua, mō te wāina hua,

¹³ ka puta ake te tātarāmoa me te tūmatakuru ki te oneone o tāku iwi, inā, ki runga ki ngā whare koa katoa o te pā hari.

¹⁴ Nō te mea ka mahue te whare kīngi, ka whakarērea te pā tokomaha; ko te puke me te pourewa ka waiho hei ana ā ake ake, hei mea e koa ai ngā kāihe mohoao, hei wāhi kai mā ngā kāhui;

¹⁵ kia ringihia mai rā anō i runga te wairua ki a tātou, kia meinga rā anō te koraha hei māra whai hua, kia kīia anō te māra whai hua he ngahere.

Te Rangimārie o te Kīngitanga a Ihowā

¹⁶ Ko reira te whakawā noho ai ki te koraha, ā, hei kāinga te māra hua mō te tika.

¹⁷ Ā, ko te mahi a te tika he rongo mau; ko te whakaotinga o te tika he āta noho, he ngākau ū ā ake ake.

¹⁸ Ka noho hoki tāku iwi ki te nohoanga o te rongo mau, ki ngā kāinga e ū ai te ngākau, ki ngā okiokinga hūmārie.

¹⁹ Ka tārere iho ia te whatu i te hinganga o te ngahere; ā, ka whakahoroa rawatia te pā ki raro.

²⁰ Anō te hari o koutou, o te hunga e whakatō ana ki te taha o ngā wai katoa, e tuku atu ana i ngā waewae o te kau, o te kāihe.