Ihāia 3 - Paipera Tapu 2012

¹ Nō te mea tēnei te Ariki, a Ihowā o ngā mano, te tango atu nei i Hiruhārama, i a Hūrā, i te tītoko me te tokotoko – i te tītoko taro katoa, i te tītoko wai katoa –

² i te mārohirohi, i te tangata whawhai; i te kaiwhakawā, i te poropiti, i te tohunga, i te tautahito;

³ i te rangatira rima tekau, i te tangata nui, i te kaiwhakatakoto whakaaro, i te kaimahi mōhio, i te mea mātau ki te taki.

⁴ Ka hoatu anō e ahau he tamariki hei rangatira mō rātou, he kōhungahunga hoki hei kīngi mō rātou.

⁵ Ka tūkinotia anō te iwi, tētahi e tētahi, te tangata e tōna hoa tata; ka whakahīhī hoki te tamariki ki te kaumātua, te mea e whakahāweatia ana ki te tangata e whakahōnoretia ana.

⁶ E mau hoki te tangata ki tōna tuakana, i te whare o tōna pāpā, ā, ka mea, “He kākahu tōu; hei rangatira koe mō mātou, ā, hei raro i tōu ringa tēnei whakatakanga.”

⁷ Ā taua rā ka karanga nui ia, ka mea, “E kore ahau e pai hei kaiwhakaora; kāhore hoki he taro i tōku whare, kāhore he kākahu; kaua ahau e meinga e koutou hei rangatira mō te iwi.”

⁸ Kua taka hoki a Hiruhārama, kua hinga a Hūrā; kua whawhai nei hoki tō rātou arero, me ā rātou mahi, ki a Ihowā, whakapātaritari ai i ngā kanohi o tōna korōria.

⁹ Ko te titiro hoki a ō rātou kanohi hei kaiwhakaatu mō tō rātou hē; e pērā ana me Horoma e whakapuaki ana i ō rātou hara, kāhore e huna. Auē te mate mō tō rātou wairua! Ko tā rātou utu hoki ki a rātou anō, ko te kino.

¹⁰ Mea atu ki te tangata tika, ko te pai mōna; ka kainga hoki e rātou ngā hua o ā rātou mahi.

¹¹ Auē te mate mō te tangata kino! Ko te hē mōna; ka riro hoki i a ia te utu o tā ōna ringa.

¹² Tēnā ko tāku iwi – he tamariki ō rātou kaitūkino, he wāhine hoki e kīngi ana mō rātou. E tāku iwi, ko ōu kaiārahi kei te whakapōhēhē i a koe, kei te whakakāhore hoki i te tikanga o ōu huarahi.

¹³ E whakatika ake ana a Ihowā ki te tohe; e tū ana ia ki te whakawā i ngā iwi.

¹⁴ Ka tīmata tā Ihowā whakawā i ngā kaumātua o tāna iwi, i ōna rangatira anō hoki: “Ko koutou nāna i pau ai te māra wāina; ko ngā taonga a ngā rawakore i pāhuatia kei roto i ō koutou whare.

¹⁵ He aha tā koutou tikanga i kuru ai koutou i tāku iwi, i orohina ai e koutou ngā mata o ngā rawakore?” e ai tā te Ariki, tā Ihowā o ngā mano.

¹⁶ Nā, i mea anō a Ihowā: “Nā, i te mea e whakapehapeha ana ngā tamāhine o Hiona, e haere ana me te uatoko o ngā kakī, me te takataka o ngā karu, ka whakameamea, me te tatangi anō ngā waewae;

¹⁷ mō reira ka whakangaua e te Ariki ki te pātito te tumuaki o ngā tamāhine o Hiona, ka takoto kau anō hoki i a Ihowā ō rātou wāhi ngaro.”

¹⁸ I taua rā ka kore i te Ariki te ātaahua o ngā mea tatangi o ngā waewae, o ngā whakapaipai rīpekapeka, o ngā heitiki;

¹⁹ ngā mekameka, ngā poroporo me ngā ārai kanohi,

²⁰ ngā pōtae, ngā whakapaipai o ngā waewae, ngā pākawe, ngā pouaka hongihongi me ngā whakakai;

²¹ ngā mōwhiti, ngā whakapaipai a te ihu;

²² ngā kākahu whakapaipai, ngā koroka, ngā hōro me ngā pūkoro;

²³ ngā whakaata me te rīnena pai, ngā pōtae me ngā ārai whakapaipai.

²⁴ Nā, he kakara pai i mua, tērā e puta ake he piro; he whītiki, tuku iho he tawhetawhe; he koukou huatau, tau iho he pākira kau; he tātua whakapaipai, kōpakina iho ki te kākahu taratara; he ātaahua, hunuhunua ake.

²⁵ Ka hinga ōu tāngata i te hoari, ōu mārohirohi i te whawhaitanga.

²⁶ Ka tangi, ka auē ōna kūwaha; ā, ka mokemoke ia, ka tau ki te whenua.