Ihāia 26 - Paipera Tapu 2012

He Waiata Wikitōria nā Hūrā

¹ I taua rā ka waiatatia tēnei waiata i te whenua o Hūrā: He pā kaha tō tātou: ka whakaritea e ia te whakaora hei taiepa, hei pekerangi.

² Whakatuwheratia ngā kūwaha, kia tomo mai ai te iwi tika e pupuri ana i te pono.

³ Māu e pupuri i runga i te rangimārie rawa – te tangata e ū ana te whakaaro ki a koe; nāna hoki i whakawhirinaki ki a koe.

⁴ Whakawhirinaki ki a Ihowā ā ake ake, nō te mea kei te Ariki, kei a Ihowā, he kāmaka mau tonu.

⁵ Kua whakahokia iho hoki e ia te hunga e noho ana i runga, te pā tiketike; takoto rawa i a ia, takoto rawa ki te whenua, pā rawa ki te puehu.

⁶ Takahia iho e te waewae, e ngā waewae o ngā rawakore, e ngā takahanga o ngā ware.

⁷ Ko te ara o te tangata tika, he tika; e whakatikaia ana e koe, e te mea tika, te ara o te tangata tika.

⁸ Kei te ara nei anō mātou o āu whakaritenga e tatari ana ki a koe, e Ihowā; ko tōu ingoa, ko te mahara ki a koe tā ō mātou wairua e minamina nei.

⁹ Minamina tonu ahau, tōku ngākau, ki a koe i te pō; āe rā, ka moata ahau, tōku wairua, ki te rapu i a koe. Nō te mea i ngā wā e puta ai āu whakaritenga ki te whenua, ka ākona te tika e ngā tāngata o te ao.

¹⁰ Atawhaitia iho te tangata kino, e kore ia e ako i te tika; i te whenua o te tika ka hē tāna mahi, e kore anō ia e kite i te nui o Ihowā.

¹¹ E Ihowā, kua ara tōu ringa ki runga, heoi kāhore rātou e kite. Otiia, ka kite rātou i tōu hae mō te iwi, ā, ka whakamā; āe rā, mā te ahi e kai ōu hoariri.

¹² Ka whakaritea e koe, e Ihowā, he rangimārie mō mātou, nāu nei hoki i mahi ā mātou mahi katoa mā mātou.

¹³ E Ihowā, e tō mātou Atua, he ariki kē anō, i tua ake i a koe, i noho hei rangatira mō mātou; māu anake ia mātou ka mahara ai ki tōu ingoa.

¹⁴ Kua mate rātou, e kore e ora; he tūpāpaku rātou, e kore e ara – nā, kua tirohia nei rātou e koe, ngaro iho i a koe, hunā katoatia ana e koe te mahara ki a rātou.

¹⁵ Kua whakaraneatia e koe te iwi, e Ihowā, kua whakaraneatia e koe te iwi. Kua whai korōria koe; nāu i whakanui ngā rohe katoa o te whenua.

¹⁶ E Ihowā, i te rarurarutanga i haere atu rātou ki a koe, ā, i ringihia atu e rātou he īnoi, i te mea e papaki ana koe i a rātou.

¹⁷ He pērā i te wahine hapū, ka tata ia te whānau, e whakamamae ana, e auē ana i ōna mamae; ko tō mātou rite tērā i tōu aroaro, e Ihowā;

¹⁸ i te hapū mātou, i te mamae mātou, kua whānau tā mātou me te mea he hau. Kīhai i oti i a mātou he whakaora i runga i te whenua; kīhai anō hoki i hinga ngā tāngata o te ao.

¹⁹ Ka ora ōu tāngata mate; ka ara ōku tinana mate, Maranga, waiata, e te hunga kei te puehu nei tō koutou kāinga; nō te mea kei te tōmairangi o ngā otaota te rite o tōu tōmairangi; ā, ka makā mai ngā tūpāpaku e te whenua.

²⁰ Haere, e tōku iwi, e tomo ki roto ki ōu rūma, tūtakina ōu tatau i muri i a koe; e piri, he wāhi iti kau nei, kia pahemo rā anō te riri.

²¹ Nō te mea tēnei a Ihowā te puta nei i tōna wāhi ki te whiu i te hē o ngā tāngata o te whenua; ā, ka whakakitea ōna toto e te whenua; e kore anō e hīpokina e ia i muri nei tōna hunga i patua.