Ihāia 23 - Paipera Tapu 2012

He Poropititanga mō Tāira

¹ Ko te poropititanga mō Tāira: Auē, e ngā kaipuke o Tarahihi; kua mōtī hoki ia, i kore ai he whare, i kore ai he tapokoranga. Nō te whenua o Kitimi te whakaaturanga ki a rātou.

² Whakarongoa, e ngā tāngata o te motu; kua kī nā koe i tā ngā kaihokohoko o Hairona e rere nei i te moana.

³ Kei ngā wai nui, kei ngā purapura o Hihoro, kei te tapahanga wīti o te Naera, ōna hua; ko ia anō te kaihokohoko ki ngā iwi.

⁴ Kia whakamā koe, e Hairona, kua kōrero hoki te moana, te pā kaha o te moana kua mea, “Kāhore ōku mamae hapū, kāhore hoki ahau i whānau, kāhore i atawhai tamariki, kāhore i whakatupu kōtiro.”

⁵ Ka tae te rongo ki Īhipa, ka tino mamae rātou, ki te rongo o Tāira.

⁶ Whakawhiti atu ki Tarahihi – auē, e ngā tāngata o te motu.

⁷ Ko tō koutou pā koa ianei tēnei, ko tōna tawhito nei nō ngā rā anō onamata? Nā ōna waewae hoki ia i kawe ki tawhiti noho ai.

⁸ Nā wai i whakatakoto tēnei whakaaro mō Tāira, mō te pā whakakarauna, he rangatira nei ōna kaihokohoko; ko ōna kaiwhakawhitiwhiti taonga, ko ngā metararahi o te whenua?

⁹ Nā Ihowā o ngā mano i whakatakoto – hei whakapoke i te whakapehapeha o ngā mea ātaahua katoa, hei mea kia whakahāweatia ngā metararahi o te whenua.

¹⁰ Tika atu nā waenganui i tōu whenua, ānō ko te Naera, e te tamāhine a Tarahihi; kua kore he whītiki mōu ā mua ake.

¹¹ Kua totoro tōna ringa ki runga ki te moana, whakangāueuetia ana e ia ngā rangatiratanga. Nā Ihowā te whakahau mō Kanaana, kia ngaro ōna pā kaha.

¹² I mea anō ia, “Kāti rawa tōu koa, e te wāhina e tūkinotia nei, e te tamāhine a Hairona. “Whakatika, whakawhiti atu ki Kitimi – ahakoa i reira kāhore he okiokinga mōu.”

¹³ Nanā, te whenua o ngā Karari, kua kāhore tēnā iwi; kua whakaritea a reira e ngā Ahiriana mō ngā kīrehe o te koraha. Nā rātou i whakaara ā rātou pourewa, kua horo i a rātou ōna whare kīngi; kua meinga e ia hei ururua.

¹⁴ Auē, e ngā kaipuke o Tarahihi, kua kore hoki tō koutou pā kaha.

¹⁵ I taua rā ka warewaretia a Tāira, e whitu tekau tau, ko ngā rā hoki o te kīngi kotahi; i te mutunga o ngā tau e whitu tekau ka rite tā Tāira ki te waiata a te wahine kairau:

¹⁶ “E mau ki te hāpa, taiāwhiotia te pā, e te wahine kairau i warewaretia nei! Kia pai te waiata, kia maha ngā waiata, kia maharatia ai koe.”

¹⁷ Nā, i te mutunga o ngā tau e whitu tekau ka tirohia a Tāira e Ihowā, ā, ka hoki ia ki tāna utu, ka kairau anō ki ngā kīngitanga katoa o te whenua i runga i te mata o te oneone.

¹⁸ Nā, ko āna mea hokohoko, me ōna utu, he tapu ki a Ihowā; e kore e whaowhina ki te toa, e kore anō e rongoātia. Engari, mā te hunga e noho ana i te aroaro o Ihowā āna mea hokohoko, ā, ka mākona rātou i te kai, ka roa anō te mau o te kākahu.