Ihāia 22 - Paipera Tapu 2012

He Kupu Tūpato o te Urupatu o Hiruhārama

¹ Ko te poropititanga mō te raorao o te whakakitenga: He aha rā nōu, i piki katoa ai koe ki ngā tuanui?

² E koe, e kī tonu nei koe i te ngē, he pā turituri, he pā koa. Ko ōu tāngata i patua ehara i te mea patu nā te hoari, ehara i te hunga i mate i te whawhai.

³ Rere ngātahi ana ōu rangatira katoa, herea ana rātou e ngā kaikōpere. Te hunga katoa i kitea i roto i a koe, herea ngātahitia ana rātou, te hunga i rere mai i tawhiti.

⁴ Koia ahau i mea ai: “Kāti te titiro ki ahau, ka nui tōku tangi; kaua e tohe ki te whakamārie i ahau mō te pāhuatanga o te tamāhine a tōku iwi.”

⁵ He rā hoki tēnei nō te raruraru, nō te takahanga, nō te pōkaikaha, he mea nā te Ariki, nā Ihowā o ngā mano, i te raorao o te whakakitenga; he pākaruhanga i ngā taiepa, he karangatanga ki ngā maunga.

⁶ Ko tā Erama, he mau i te papa pere, me ngā hāriata tāngata me ngā kaieke hōiho; ko tā Kiri he whakaputa mai i te whakangungu rākau ki waho.

⁷ Nā, kapi ana ōu raorao whakapaipai i te hāriata, tū ana ngā rārangi o ngā kaieke hōiho ki te kūwaha.

⁸ Nā, mauria atu ana e ia te hīpoki o Hūrā. Ā, ka titiro koe i taua rā ki ngā patu i roto i te whare o te ngahere.

⁹ Ā, ka kite koutou i ngā pakaru o te Pā o Rāwiri, he maha; ka huia hoki e koutou ngā wai o te poka o raro.

¹⁰ Ā, taua ana e koutou ngā whare o Hiruhārama; wāwāhia ana e koutou ngā whare hei hanga mō te taiepa.

¹¹ Ka hangā anō e koutou he awa ki waenganui i ngā taiepa e rua mō ngā wai o te poka tawhito. Kāhore ia ō koutou whakaaro ki te kaimahi o tēnā mea, kāhore hoki e titiro ki tōna kaihanga ō mua noa atu.

¹² Heoi, ko te karangatanga a te Ariki, a Ihowā o ngā mano, i taua rā ki te tangi, ki te auē, ki te moremore, ki te whītiki i te kākahu taratara.

¹³ Nā, ko te koa, ko te hari, ko te patu kau, ko te patu hipi, ko te kai kikokiko, ko te inu wāina. “Kia kai tātou, kia inu; āpōpō hoki tātou mate ai.”

¹⁴ Nā, ka whakaatu a Ihowā o ngā mano ki ōku taringa: “He pono, e kore rawa tēnei hē o koutou e murua, ā mate noa koutou,” e ai tā te Ariki, tā Ihowā o ngā mano.

He Whakatūpato ki a Hepena

¹⁵ Ko te kupu tēnei a te Ariki, a Ihowā o ngā mano: “Haere mai, haere ki tēnei kaitiaki o ngā moni, ki a Hepena, ki te rangatira o te whare, mea atu:

¹⁶ He aha tāu i konei? Ko wai hoki tāu i konei, i haua ai e koe he tanumanga mōu ki konei? E hahau ana koe he tanumanga mōna i te wāhi tiketike, e tārai ana he nohoanga mōna ki te kāmaka!

¹⁷ “Nanā, ka makā kinotia atu koe e Ihowā, ka pērātia i tā te tangata kaha. Āe rā, ka kōpakina rawatia koe e ia.

¹⁸ He pono ka tahuri ia, ka whiua koe, ānō he mea porotaka ki tētahi whenua nui; hei reira koe mate ai, ki reira anō hoki ngā hāriata o tōu korōria, e koe, e te whakamā o te whare o tōu ariki.

¹⁹ Ka peia atu hoki koe e ahau i tōu tūranga, ka turakina iho anō koe e ia i tōu wāhi.

²⁰ “I taua rā ka karangatia e ahau tāku pononga, e Eriakimi tama a Hirikia.

²¹ Ka whakakākahuria anō ia e ahau ki tōu kākahu, ka whakakahangia hoki ki tōu whītiki, ka hoatu anō tōu kāwanatanga ki tōna ringa, ā, hei matua ia ki ngā tāngata o Hiruhārama, ki te whare anō o Hūrā.

²² Ka waiho anō e ahau te kī o te whare o Rāwiri ki runga ki tōna pokohiwi; nā, māna e whakatuwhera, ā, kāhore he tangata hei tūtaki, māna e tūtaki, ā, kāhore he tangata hei whakatuwhera.

²³ Ka titia hoki ia e ahau ānō he titi ki te wāhi mau, ā, hei torōna korōria ia ki te whare o tōna pāpā.

²⁴ Ka whakairihia anō e rātou ki runga ki a ia te korōria katoa o te whare o tōna pāpā, ngā uri, ngā whānau, ngā oko ririki katoa, arā ngā oko hei peihana, me ngā oko katoa anō hei hāka.

²⁵ “I taua rā, e ai tā Ihowā o ngā mano, ka taui te titi i titia nei ki te wāhi māu, ka tapahia, ka marere ki raro; ka motuhia atu anō te mea e iri ana i runga.” Nā Ihowā hoki te kupu.