Ihāia 21 - Paipera Tapu 2012

He Poropititanga mō Papurōna, Ēroma, Arāpia hoki

¹ Ko te poropititanga mō te koraha o te moana: Ka rite ki ngā āwhiowhio i te tonga e pupuhi ana, tōna haerenga mai i te koraha i te whenua e wehingia ana.

² He kino rawa te kitenga kua whakaaturia nei ki ahau; kei te tinihanga te tangata tinihanga, kei te pāhua te kaipāhua. Whakaekea, e Erama whakapaea, e Meria mutu pū i ahau ngā auētanga katoa o reira.

³ Nā reira kī tonu tōku hope i te mamae, whakawiri rawa ngā mea e ngau nei i ahau, ānō ko te whakawiringa o te wahine e whakawhānau ana; mamae ana ahau, kore ake e rongo; ohorere ana, kore ake e kite.

⁴ Kahekahe ana tōku manawa, wehi ana i te whakamataku; ko te ahiahi pō i hiahiatia e ahau, puta ake ana hei mea e tūiri ai ahau.

⁵ Kei te whakapai rātou i te tēpu, kua whakaritea he kaitūtei; kei te kai rātou, kei te inu. Whakatika, e ngā rangatira, pania te whakangungu rākau.

⁶ Ko tā te Ariki kupu hoki tēnei ki ahau: “Tīkina, whakatūria he kaitūtei, māna e whakaatu tāna e kite ai.

⁷ Nā, ka kitea e ia te ope, ngā kaieke hōiho tātaki rua, he rōpū kāihe, he rōpū kāmera, kia āta whakarongo mārie ia.”

⁸ Kātahi tērā ka karanga, ānō he raiona: “E tōku Ariki, kei runga ahau i te wāhi tūtei e tū tonu ana i te awatea; pau katoa anō ngā pō i ahau e tū nei i tāku mahi tiaki.

⁹ Nanā, tēnei te haere mai nei he rōpū tāngata, me ngā kaieke hōiho, he tātaki rua! Nā, ka oho ia, ka mea, ‘Kua horo a Papurōna, kua horo; ko ngā whakapakoko katoa anō o ōna atua, wāwāhia iho ki te whenua.’ ”

¹⁰ E tāku patunga wīti, e te wīti o tāku patunga; ko tāku i rongo ai ki a Ihowā o ngā mano, ki te Atua o Īharaira, e whakaaturia nei e ahau ki a koutou.

¹¹ Ko te poropititanga mō Rūma. E karanga mai ana tētahi ki ahau i Heira, “E te kaitūtei, ko te aha i te pō? E te kaitūtei, ko te aha i te pō?”

¹² Ka kī mai te kaitūtei: “Kei te haere mai te ata rāua ko te pō. Ki te uia e koutou, e ui; hoki mai, haere mai.”

¹³ Ko te poropititanga mō Arāpia. Kei te ngahere i Arāpia he nohoanga mō koutou i te pō, e ngā tira haere o Reranimi.

¹⁴ I kawea e rātou he wai mō te tangata e matewai ana; i haere ngā tāngata o te whenua o Tema ki te whakatau i ngā tāngata e rere ana, me tā rātou taro.

¹⁵ Ka rere mai hoki rātou i ngā hoari, i te hoari kua oti te unu, i te kōpere kua oti te whakapiko, i te pākaha anō o te whawhai.

¹⁶ Ko tā te Ariki kupu hoki tēnei ki ahau: Kia kotahi tau, ko te tau hoki o te kaimahi, ā, ka poto katoa te korōria o Kerara.

¹⁷ Nā, ko ngā mōrehu o ngā kaikōpere, ko ngā mārohirohi o ngā tama a Kerara, ka torutoru. Ko te kupu hoki tēnei a Ihowā, a te Atua o Īharaira.