Ihāia 2 - Paipera Tapu 2012

Te Rangimārie Mutungakore

¹ Ko te kupu i kitea e Ihāia tama a Āmoho mō Hūrā rāua ko Hiruhārama.

² Nā tēnei ake, kei ngā rā whakamutunga, ka whakapūmautia te maunga i tō Ihowā whare ki te tihi o ngā maunga, ka whakanekehia ake anō ki runga i ngā pukepuke; ā, ka rere ngā iwi katoa ki reira.

³ Ka haere hoki ngā iwi maha, ka mea, “Haere mai, tātou ka haere ki runga ki te maunga o Ihowā, ki te whare o te Atua o Hākopa; ka whakaakona tātou e ia ki āna ara, ka haere hoki tātou i āna huarahi.” Nō te mea ka puta mai te ture i Hiona, me te kupu a Ihowā i Hiruhārama.

⁴ Ka whakarite hoki ia i ngā whakawā a ngā iwi, ka rīria anō e ia ngā iwi maha; nā, ka patupatua e rātou ā rātou hoari hei hea parau, ā rātou tao hei mea tapahi manga. E kore tētahi iwi e hāpai hoari ki tētahi iwi, mutu pū tā rātou ako ki te whawhai.

⁵ E te whare o Hākopa, haere mai, tēnā tātou ka haere i tō Ihowā mārama!

Ka Kīia te Whakawātanga ki te Whakahīhī

⁶ Kua whakarērea nei e koe tāu iwi, te whare o Hākopa. Nō te mea kei te kī rātou i ngā tikanga mai nō te rāwhiti, ā, he tohunga māori rātou, he pērā me ngā Pirihitini, e papaki ringa ana hoki rātou me ngā tamariki a rau o iwi.

⁷ Kī tonu hoki tō rātou whenua i te hiriwa, i te kōura, ā, kāhore he mutunga o ō rātou taonga; kapi tonu hoki tō rātou whenua i te hōiho, ā, kāhore he mutunga o ō rātou hāriata.

⁸ Ko tō rātou whenua kī tonu i te whakapakoko; e koropiko ana rātou ki te mahi a ō rātou ringa, ki tā ō rātou maihao i hanga ai.

⁹ Ā, e whakapikoa ana te tangata ware, e whakaititia ana te tangata nui – mō reira kaua rātou e tohungia.

¹⁰ E tomo ki roto ki te kāmaka, e huna ki roto ki te puehu, i te wehi ki a Ihowā, i te korōria o tōna nui.

¹¹ Ka whakaititia ngā kanohi whakapehapeha o te tangata, ka whakapikoa iho anō hoki te whakakake o ngā tāngata, ā, ko Ihowā anake e whakanuia i taua rā.

¹² Nō te mea ka tae iho he rā nō Ihowā o ngā mano ki te hunga whakapehapeha, ki te hunga whakakake katoa, ki te hunga katoa kua neke ake, ā, ka whakaititia iho;

¹³ ki ngā hīta katoa anō o Repanōna kua tiketike, kua neke ake, ki ngā oki katoa anō o Pahana;

¹⁴ ki ngā maunga tiketike katoa, ki ngā pukepuke katoa kua pūrero ki runga;

¹⁵ ki ngā pourewa tiketike katoa, ki ngā taiepa kaha katoa anō hoki;

¹⁶ ki ngā kaipuke katoa o Tarahihi, ki ngā whakaahua katoa e minaminatia ana.

¹⁷ Ā, e whakapikoa iho tō te tangata whakapehapeha, e whakaititia iho ana anō hoki te whakakake o ngā tāngata, ko Ihowā anake e whakanuia i taua rā.

¹⁸ Ā, ka ngaro whakarere ngā whakapakoko.

¹⁹ Ā, ka haere ngā tāngata ki ngā ana o ngā kāmaka, ki ngā rua o te whenua, i te wehi ki a Ihowā, i te korōria o tōna nui, ina whakatika ia ki te rure kaha i te whenua.

²⁰ Ā taua rā ka ākiritia atu e te tangata āna whakapakoko hiriwa me āna whakapakoko kōura i hangā e rātou hei koropikotanga māna, ki ngā kiore, ki ngā pekapeka;

²¹ haere ai ki ngā ana o ngā kōhatu, ki ngā kapiti o ngā kāmaka, i te wehi ki a Ihowā, i te korōria o tōna nui, ina whakatika ia ki te rurerure i te whenua.

²² Kāti tā koutou mea ki te tangata kei ōna pongaponga nei tōna manawa; kia pēhea hoki te whakaaro ki a ia?