Ihāia 19 - Paipera Tapu 2012

He Poropititanga mō Īhipa

¹ Ko te poropititanga mō Īhipa: Tēnei a Ihowā te rere mai nei i runga i te kapua tere, tae tonu ki Īhipa, ā, ka oho ngā whakapakoko o Īhipa i tōna aroaro, ngohe noa iho te ngākau o Īhipa i waenganui ōna.

² “Ka whakaangahia anō e ahau ngā Īhipiana ki ngā Īhipiana, ā, ka whawhai rātou ki tōna teina, ki tōna tuakana, ki tōna hoa, ki tōna hoa, te pā ki te pā, te kīngitanga ki te kīngitanga.

³ Nā, ka meinga te wairua o Īhipa kia kāhore noa iho i waenganui i a ia; ka whakangaromia hoki e ahau ōna whakaaro; ā, ka rapua e rātou he tikanga i ngā whakapakoko, i ngā tohunga whakawai, i te hunga he atua māori nei ō rātou, i ngā matakite.

⁴ Ka tukua pūtia atu anō e ahau ngā Īhipiana ki te ringa o te rangatira pakeke; he kīngi taikaha anō te kīngi mō rātou,” e ai tā te Ariki, tā Ihowā o ngā mano.

⁵ Ka kore haere hoki ngā wai o te moana, ka mimiti, ka maroke te awa;

⁶ ā, ka piro ngā awa; ka mimiti, ā, ka maroke ngā awa o Īhipa; ka mate ngā kākaho me ngā raupō.

⁷ Ko ngā otaota i te taha o te Naera, i te pareparenga o te Naera, me ngā mea katoa i whakatōkia ki te taha o te Naera, ka maroke, ka āia noatia atu, ka kore noa iho.

⁸ Ka tangi anō ngā kaihī ika; ka auē te hunga katoa e maka ana i te matau ki roto ki te Naera, ka pōuri anō ngā kaihora o ngā kupenga ki runga ki ngā wai.

⁹ Ka whakamā hoki ngā kaimahi o te muka pai, rātou ko ngā kaiwhatu o ngā kākahu mā.

¹⁰ Ko ōna tūranga, mongamonga noa, ka pōuri hoki ngā wairua o ngā kaimahi katoa e utua ana.

¹¹ He tino wairangi ngā rangatira o Toana; he tino pōauau hoki ngā whakaaro o ngā kaiwhakatakoto whakaaro mōhio a Parao. He pēhea rā tā koutou kī atu ki a Parao, “He tama ahau nā te hunga whakaaro nui, he tama nā ngā kīngi onamata”?

¹² Tēnā, kei hea rātou, āu tāngata whakaaro nui? Mā rātou e whakaatu ki a koe ināianei; meinga kia mōhio rātou ki tā Ihowā o ngā mano i whakatakoto ai mō Īhipa.

¹³ Kua whakakūaretia ngā rangatira o Toana, kua tinihangatia ngā rangatira o Nopo; pōhēhē iho a Īhipa i a rātou, ko rātou nā anō te kōhatu o te kokonga o ngā iwi o reira.

¹⁴ Kua oti i a Ihowā te wairua whanokē te konatu ki waenganui ōna; ā, kua whakapōhēhētia e rātou a Īhipa i āna mahi katoa, koia anō kei te tangata haurangi e kotiti kē ana, e hūrori ana i roto i tōna ruaki.

¹⁵ Ka kāhore noa iho anō he mahi mā Īhipa, hei mahinga mā te upoko, mā te hiawero, mā te nīkau, mā te wīwī.

¹⁶ I taua rā ka rite a Īhipa ki te wahine, ka wehi ka pāwera i te rurutanga o te ringa o Ihowā o ngā mano, e rūrū ai ia ki tērā wāhi.

¹⁷ Ā, ka ai te whenua o Hūrā hei whakawehi mō Īhipa, ā, ko ngā tāngata katoa e whakahuatia atu ai ia, ka wehi, i te tikanga hoki kua takoto i a Ihowā o ngā mano mō reira.

Ka Manaakitia a Īhipa, a Ahiria, a Īharaira

¹⁸ I taua rā e rima ngā pā i te whenua o Īhipa, ko tō rāua reo ko te reo o Kanaana, ā, ko Ihowā o ngā mano tā rātou e oati ai; ko tētahi e huaina, “Ko te Pā o te Ngaromanga.”

¹⁹ I taua rā ka tū he āta mā Ihowā i waenganui o te whenua o Īhipa, me te pou i te taha o tō reira rohe, he mea ki a Ihowā.

²⁰ Ā hei tohu tērā, hei kaiwhakaatu mō Ihowā o ngā mano i te whenua o Īhipa; ka karanga hoki rātou ki a Ihowā, he mea mō ngā kaitūkino, ā, ka ungā e ia he kaiwhakaora ki a rātou, he kaiwawao; ā, māna rātou e whakaora.

²¹ Ā, ka mōhiotia a Ihowā e Īhipa, ka mōhiotia hoki a Ihowā e ngā Īhipiana i taua rā; āe rā ka mahia e rātou te patunga tapu me te whakahere; ka puaki hoki tā rātou kupu taurangi ki a Ihowā, ā, ka mana anō i a rātou.

²² Ka whiua anō a Īhipa e Ihowā, ka whiua, ka rongoātia anō e ia; ā, ka hoki mai rātou ki a Ihowā, ka tahuri anō ia ki tā rātou īnoi, ka rongoā i a rātou.

²³ I taua rā ka takoto he ara i Īhipa ki Ahiria, ā, ka tae te Ahiriana ki Īhipa te Īhipiana anō ki Ahiria, ā, ka koropiko tahi te Īhipiana rāua ko te Ahiriana.

²⁴ I taua rā hei tuatoru a Īharaira mō Īhipa, mō Ahiria, hei manaaki i waenganui o te whenua.

²⁵ E manaakitia anō rātou e Ihowā o ngā mano, e kī ia, “Kia manaakitia a Īhipa, tāku iwi, a Ahiria, te mahi a ōku ringa, a Īharaira hoki, tōku kāinga tupu.”