Ihāia 18 - Paipera Tapu 2012

He Poropititanga mō Etiopia

¹ Ha, ko te whenua e kapakapa nei ngā parirau i tērā taha o ngā wai o Etiopia!

² E unga karere nei i runga i te moana, ā, ko ō rātou kaipuke he kākaho i runga i ngā wai, e kī ana, Haere, e ngā karere tere, ki tētahi iwi roroa, maheni hoki, ki te iwi i wehingia i tō rātou tīmatanga iho ā mohoa noa nei; ki te iwi he mahi rūri nei, he takatakahi nei tāna, ko tōna whenua wāhia iho e ngā awa.

³ E ngā tāngata katoa o te ao, e te hunga e noho ana i te whenua, titiro mai, ina whakaarahia te kara ki runga i ngā maunga; whakarongo mai, ina whakatangihia te tētere.

⁴ Ko tā Ihowā kupu hoki tēnei ki ahau: “Ka āta noho ahau, ka titiro hoki i tōku nohoanga; ka rite ahau ki te mahana i te mea ka mahea, ka rite ki te kapua tōmairangi i te mahana o te kotinga.”

⁵ Hei mua hoki i te kotinga, kia ngahoro te puāwai, kia puta ki te puāwai he karepe e maoa haere ana, nā, ka hātepea atu e ia ngā peka ririki ki te tapahi peka, ā, ko ngā manga ka tangohia, ka tapahia ki raro.

⁶ Ka waiho ngātahi atu rātou mā ngā manu tokokai o ngā maunga, mā ngā kararehe hoki o te whenua. Ka whakatau ngā manu tokokai ki runga ki a rātou i te raumati, ka whakakainga hoki ngā kararehe katoa o te whenua ki reira i te hōtoke.

⁷ I taua wā ka maua mai he hākari ki a Ihowā o ngā mano, o te iwi roroa, maheni hoki, nā te iwi i wehingia i tō rātou tīmatanga iho, ā mohoa noa nei, nā te iwi he mahi rūri nei, he takatakahi nei tāna, ā, ko tōna whenua wāhia iho e ngā awa – ki te wāhi o te ingoa o Ihowā o ngā mano, ki Maunga Hiona.