Ihāia 17 - Paipera Tapu 2012

He Poropititanga mō Ramahiku

¹ Ko te poropititanga mō Ramahiku: “Nanā, kua kore a Ramahiku hei pā; ka pūranga kau.

² Kua mahue ngā pā o Aroere; mō ngā kāhui ērā, ka takoto rātou, tē ai he kaiwhakawehi.

³ Ka kore anō he pā kaha mō Ēparaima, he kīngitanga mō Ramahiku, he toenga rānei o Hīria; ka rite rātou ki te korōria o ngā tama a Īharaira,” e ai tā Ihowā o ngā mano.

⁴ “Nā, i taua rā ka meinga te korōria o Hākopa kia tūpuhi, ka hīroki haere hoki te ngako o ōna kikokiko.

⁵ Ā, ka rite ki tā te kaitapahi kohikohinga i te wīti, ki te tapahanga hoki a ōna ringa i ngā hua wīti; āe, ka rite ki te hamunga o ngā hua wīti i te raorao i Repaima.

⁶ Otiia, e toe anō ētahi karepe hei hamunga; ka rite ki te ruiruinga o te ōriwa – e rua, e toru ngā ōriwa i te pito o tō runga rawa peka, e whā, e rima i te peka i waho rawa, i te mea whai hua,” e ai tā Ihowā, tā te Atua o Īharaira.

⁷ I taua rā ka titiro he tangata ki tōna Kaihanga, ka anga ōna kanohi ki te Mea Tapu o Īharaira;

⁸ e kore anō e titiro ki ngā āta i hangā nei e ōna ringa, e kore e anga ki te mea i mahia e ōna maihao, ki ngā Aherimi rānei, ki ngā whakapakoko rānei.

⁹ I taua rā ka rite ōna pā kaha ki te wāhi i whakarērea i te ngahere, i te tihi anō o te maunga, i whakarērea rā i te aroaro o ngā tama a Īharaira; nā, ko te ngaromanga.

¹⁰ Kua wareware hoki koe ki te Atua o tōu whakaoranga, ā, kua kāhore i mahara ki te kāmaka o tōu kaha, mō reira ka whakatupuria e koe he mea ātaahua, ka whakatōkia anō ki te peka kē.

¹¹ I te rā e whakatō ai koe, ka taiepatia e koe, ā, i te ata matomato tonu tāu i whakatō ai; i te rā ia o te pōuri, o te mamae ngau kino, ka memeha atu te kotinga.

¹² Ananā, te ngangau o ngā iwi maha, e ngē ana ānō he haruru nō ngā moana! Me te rere o ngā iwi, e wawā ana, koia anō kei te turituri o ngā wai nunui!

¹³ Ānō ko te tāheke o ngā wai maha te haruru o ngā iwi; otiia ka rīria rātou e ia, ā, ka rere ki tawhiti, ka whāia, ānō he pāpapa nō ngā maunga i te upoko o te hau, ānō he puehu āwhiowhio e āia ana e te tūpuhi.

¹⁴ I te ahiahi, nā, ko te pāwera! Kīanō i pūao kua kore rātou. Ko te wāhi tēnei mā te hunga e pāhua ana i a tātou, ko te mea tēnei e wehea mā te hunga e muru ana i a tātou.