Ihāia 16 - Paipera Tapu 2012

¹ Ungā e koutou ngā reme ki te rangatira o te whenua, i Hera i te koraha, ki te maunga o te tamāhine a Hiona.

² Kei te manu hāereere noa hoki, kei te mea i makā mai i te kōhanga, i te rite o ngā tamāhine a Moapa i ngā kauanga i Aranona.

³ “Kia takoto te whakaaro, whakaritea te whakawā. Ko tōu whakamarumaru i te poutūmārōtanga kia rite ki te pō; hunā te hunga i peia; kaua te ātiutiu noa e whakaaturia.

⁴ Tukua āku whati kia noho ki a koe; tēnā ko Moapa, ko koe hei piringa mō rātou kei mate i te kaipāhua.” Kua kore hoki te kaiwhakatē, mutu pū tā te kaipāhua, kua poto atu ngā kaiwhakatupu kino i runga i te whenua,

⁵ ā, ka whakapūmautia he torōna i runga i te tohu tangata; ka nohoia e tētahi i runga i te pono, i roto anō i te tēneti o Rāwiri; me te whakawā, me te rapu i te tikanga o te whakawā, he hohoro hoki ki te mahi i te tika.

⁶ Kua rongo tātou ki te whakakake o Moapa – nui atu tōna whakakake, ki tōna whakapehapeha, ki tōna whakakake, ki tōna pukuriri – kāhore he tikanga o āna whakamanamana.

⁷ Mō reira ka auē a Moapa ki a Moapa, ka auē katoa. Ka tangi koutou ki ngā keke karepe o Kiriharehete, kua mōtī rawa.

⁸ Kua kahakore hoki ngā māra o Hehepona, me te wāina o Hipima; he mea whatiwhati nā ngā rangatira o ngā iwi ōna wāina pai rawa, i tae nei ki Iatere rawa, i toro haere atu ki te koraha. I toha haere ōna peka, i whiti ki tērā taha o te moana.

⁹ Mō reira ka tangihia e ahau te wāina o Hipima, kei te tangi mō Iatere te rite. Ka whakamākūkū ahau i a koe ki ōku roimata, e Hehepona, e Ereare; kua tau hoki te hāmama o te pakanga ki runga ki āu hua raumati, ki runga ki tāu tapahanga wīti.

¹⁰ Kua tangohia atu te hari, me te koa i te māra mōmona; kāhore hoki he waiata i ngā māra wāina, kāhore he iere harakoa; e kore ngā kaitakahi e takahi wāina i ā rātou poka wāina; kua whakamutua e ahau te hāmama o te mahinga wāina.

¹¹ Nā reira, ānō he hāpa ōku whēkau e tangi ana ki a Moapa, a roto i ahau ki Kiriharehe.

¹² Nā, ka puta mai a Moapa, ka māuiui i runga i te wāhi tiketike, ā, ka haere ki tōna wāhi tapu īnoi ai, heoi e kore e taea e ia.

¹³ Ko te kupu tēnei i kōrerotia e Ihowā mō Moapa i mua.

¹⁴ Engari kua kōrero a Ihowā ināianei, kua mea: “Kia toru ngā tau, kia rite ki ngā tau o te kaimahi, ka whakahāweatia te korōria o Moapa, me tōna mano tini; ā, ko te toenga he iti rawa, he kāhore noa iho.”