Ihāia 15 - Paipera Tapu 2012

He Poropititanga mō Moapa

¹ Ko te poropititanga mō Moapa: He pō kotahi ka ngaro a Ara o Moapa, ā, kore iho! He pō anō hoki, ka ngaro a Kiri o Moapa, ā, kore iho!

² Kua riro ia ki runga ki Paiti, ki Ripono, ki ngā wāhi tiketike tangi ai; ka auētia e Moapa a Nepo rāua ko Merepa. He mea moremore katoa ō rātou māhunga, tapahi rawa ngā kumikumi katoa.

³ Ko ō rātou whītiki i ō rātou ara he kākahu taratara; ka auē rātou katoa i runga i ō rātou whare, i ō rātou waharoa, nui atu te tangi.

⁴ Ka hāmama hoki a Hehepona rāua ko Ereare; ka rangona tō rātou reo i Iahata rawa. Nō reira hāmama ana ngā mau patu o Moapa; ka wiri tōna wairua i roto i a ia.

⁵ E tangi ana tōku ngākau ki a Moapa; rere ana ōna rangatira ki Toara, ki Ekarata Herihia. He tangi nei hoki tā rātou i te pikitanga ki Rūhiti, i te mea e piki ana i reira; i te ara hoki ki Horonaimi ka pā tā rātou karanga o te ngaromanga.

⁶ Ka takoto kau noa ngā wai o Nimirimi; kua maroke hoki te tarutaru, kua mate te otaota, kāhore he mea e tupu ana.

⁷ Nā, ko ā rātou mea maha, me ā rātou mea i te rongoā, ka kawea e rātou ki te awa i ngā wirou.

⁸ Kua taiāwhiotia hoki ngā rohe o Moapa e te karanga; kua tae tōna auē ki Ekeraima, tōna auē ki Peererimi.

⁹ Kei te kī hoki ngā wai o Rimono i te toto; tērā atu tāku e whakapā ai ki Rimono – he raiona ki ngā oranga o Moapa, ki ngā mōrehu anō o te whenua.