Ihāia 13 - Paipera Tapu 2012

Te Kauwhautanga ki a Papurōna

¹ Ko te poropititanga mō Papurōna i kitea e Ihāia tama a Āmoho.

² Whakaarahia he kara ki runga ki te maunga horehore, kia rahi te reo ki a rātou; tāwhiritia atu te ringa kia haere mai ai rātou ki roto ki ngā kūwaha o ngā rangatira.

³ Kua oti āku i whakatapu ai te whakahau, kua karangatia anō hoki e ahau āku mārohirohi ki tōku riri, arā āku e whakamanamana nui nei.

⁴ Ko te haruru o te huihui i runga i ngā maunga, tōna rite kei tō te iwi nui! He haruru, he ngangau nō te huihui o ngā kīngitanga o ngā iwi! E whakatakā ana e Ihowā o ngā mano te ope mō te whawhai.

⁵ E haere mai nei rātou i tawhiti, i te pito o te rangi, a Ihowā me ngā patu a tōna riri, ki te whakangaro i te whenua katoa!

⁶ Auē koutou, kua tata hoki te rā o Ihowā; tērā e puta mai, ānō he whakangaromanga nā te Kaha Rawa!

⁷ Nō reira ka ngoikore ngā ringa katoa, ka ngohe noa iho ngā ngākau katoa o ngā tāngata.

⁸ Ka ohorere anō rātou, mau pū i te mamae, i te whakapōuri; ko tō rātou mamae koia anō kei tō te wahine e whakawhānau ana. Ka mīharo rātou tētahi ki tētahi, ā, ko ō rātou mata, ānō he mura ahi.

⁹ Nanā, e haere mai nei te rā o Ihowā, he kino, he riri, he whakatakariri e mura ana; hei whakaururua i te whenua, hei whakangaro atu hoki i reira i ōna tāngata hara.

¹⁰ Ko ngā whetū hoki o te rangi, ko ngā kāhui whetū anō hoki o reira, kāhore e hōmai i tō rātou mārama. Ka pōuri noa iho te rā i tōna haerenga mai, kore ake hoki e titi te atarau.

¹¹ Ka whiua anō e ahau te ao mō tō rātou kino, te hunga kino hoki, mō tō rātou hē; ka whakamutua hoki e ahau te whakapehapeha o te hunga whakakake, ka whakahokia iho anō ki raro te whakapehapeha o te hunga kino.

¹² Ka meinga anō e ahau kia nui atu te utu mō te tangata i tō te kōura pai; āe rā, he tangata, kia nui atu i tō te kōura parakore o Ōpira.

¹³ Nā reira ka meinga e ahau ngā rangi kia wiri, ka ruperupea atu anō te whenua i tōna wāhi, he riri nō Ihowā o ngā mano, he rā anō e mura ai tōna riri.

¹⁴ Ā, ka rite ki te anaterope e whāia ana, ki ngā hipi kāhore nei ō rātou kaihuihui, ka tahuri rātou ki tōna iwi, ki tōna iwi, ka rere ki tōna whenua, ki tōna whenua.

¹⁵ Ko te hunga katoa e kitea ana, ka werohia; ko te hunga katoa e hopukia ana, ka hinga i te hoari.

¹⁶ Ka tāia iho hoki ā rātou kōhungahunga i tā rātou tirohanga; ka pāhuatia ō rātou whare, ka moea anō ā rātou wāhine.

¹⁷ Tēnei ahau te whakaoho atu nei i ngā Meri ki a rātou, he hunga e kore nei e whakaaro ki te hiriwa; nā, ko te kōura, e kore e matenuitia e rātou.

¹⁸ Ka tāia iho anō hoki ngā taitamariki e ā rātou kōpere, mongamonga noa; e kore anō e tohungia ngā hua o te kōpū; e kore ō rātou kanohi e manawapā ki ngā tamariki.

¹⁹ Ā, ko Papurōna, ko te korōria o ngā kīngitanga, ko te mea ātaahua whakahirahira a ngā Karari, tērā ia e rite ki tā te Atua hurihanga i Horoma, i Komora.

²⁰ E kore e nohoia ā ake ake, e kore e waiho hei kāinga ā tēnā whakatupuranga, tēnā whakatupuranga; e kore anō e whakatūria e te Ārapi tōna tēneti ki reira; e kore anō a reira e waiho e ngā hēpara hei takotoranga mō ā rātou kāhui.

²¹ Engari, hei takotoranga a reira mō ngā kurī mohoao o te koraha; ka kī hoki ō rātou whare i ngā kararehe pōuri; ā, ka nohoia a reira e ngā otereti, ka waiho hoki hei tūpekepeketanga mō ngā mea āhua koati.

²² Ka tangi anō hoki ngā wuruhi i roto i ō rātou whare kīngi, me ngā kurī mohoao i roto i ō rātou whare ātaahua; kua tata mai hoki tōna wā, e kore anō ōna rā e roa.