Ihāia 12 - Paipera Tapu 2012

Te Whakawhetai me te Whakamoemiti

¹ Ā, i taua rā ka mea koe: “Ka whakamoemiti atu ahau ki a koe, e Ihowā; ahakoa hoki i riri koe ki ahau, kua tahuri atu tōu riri, ā, kei te whakamārie koe i ahau.

² Nanā, ko te Atua tōku whakaoranga; ka whakawhirinaki ahau, e kore anō e wehi. Ko te Ariki hoki, ko IHOWĀ tōku kaha, tāku waiata; ko ia anō hei whakaoranga mōku.

³ Nā, ka utu wai koutou i runga i te koa i roto i ngā puna o te whakaoranga.”

⁴ Ka mea anō hoki i taua rā: “Whakamoemitia a Ihowā, karanga atu ki tōna ingoa; whakaaturia āna mahi ki roto i ngā iwi; kauwhautia atu kua oti tōna ingoa te whakaneke ake.

⁵ Waiata ki a Ihowā, he nui noa atu hoki āna mahi; meinga kia mōhiotia tēnei puta noa i te ao.

⁶ Hāmama kia nui te reo, e te wahine e noho ana i Hiona, he nui hoki te Mea Tapu o Īharaira i waenganui i a koe.”