Ihāia 11 - Paipera Tapu 2012

Te Kīngitanga Rangimārie

¹ Ā, tērā e puta ake he wana i te take i a Hehe, ā, ka whai hua tētahi peka e tupu ake i roto i ōna pakiaka.

² Ka noho hoki te Wairua o Ihowā ki runga ki a ia, te wairua o te whakaaro nui, o te mātauranga, te wairua o te whakatakoto whakaaro, o te kaha, te wairua o te mōhio, o te wehi ki a Ihowā;

³ ā, ko tāna e āhuareka ai ko te wehi ki a Ihowā. E kore anō ia e whakawā i runga i tā ōna kanohi e kite ai, e kore anō e whakaaro ki tā ōna taringa e rongo ai, ina rīria e ia te hē.

⁴ Engari ka whakawā ia mō ngā rawakore i runga i te tika; i runga anō i te tika tōna riri i te hē, he whakaaro nōna ki te hunga māhaki o te whenua; he whiu nā tōna māngai tāna patu mō te whenua, ka whakamatea anō e ia te tangata kino ki te manawa o ōna ngutu.

⁵ Ā hei whītiki te tika mō tōna hope, hei whītiki anō te pono mō ōna whatumanawa.

⁶ Ka noho tahi anō te wuruhi rāua ko te reme, ka takoto tahi te reparo rāua ko te kūao koati; ko te kūao kau, ko te kūao raiona, ko te mea mōmona, kotahi anō rōpū; ā, mā te tamaiti iti rātou e ārahi.

⁷ Ā, ka kai te kau rāua ko te pea, ka takoto tahi anō hoki ā rāua kūao; ā, ka rite te raiona ki te kau, ka kai i te kakau wīti.

⁸ Ka tākaro hoki te tamaiti ngote ū i runga i te rua o te ahipi, ā, ka pā atu te ringa o te tamaiti kua whakamutua te kai ū ki te nohoanga o te neke.

⁹ E kore rātou e tūkino, e kore anō e whakamate puta noa i tōku maunga tapu; nō te mea ka kapi te whenua i te mātauranga ki a Ihowā, ānō ko ngā wai e taupoki nei i te moana.

Te Hokinga mai o te Toenga o Īharaira me Hūrā

¹⁰ Nā, i taua rā ko tētahi pakiaka o Hehe, ka tū hei kara ki ngā iwi, ka rapua mai e ngā tauiwi; ko tōna okiokinga hoki, korōria rawa.

¹¹ I taua rā ka anga anō te ringa o te Ariki, ā, ka tuaruatia te whakahoki mai o ngā mōrehu o tāna iwi e mahue i Ahiria, i Īhipa, i Pātoro, i Kuhu, i Erama, i Hinara, i Hāmata, i ngā motu anō o te moana.

¹² Ka whakatūria anō e ia he kara ki ngā iwi, ā, ka huihuia mai te hunga o Īharaira i peia atu, ka whakaminea mai anō ngā mea o Hūrā i marara atu, i ngā pito e whā o te whenua.

¹³ Ka haere atu hoki te hae o Ēparaima, ka hātepea atu anō hoki ngā hoariri o Hūrā; e kore a Ēparaima e hae ki a Hūrā, e kore anō a Hūrā e whakatoi ki a Ēparaima.

¹⁴ Engari, ka rere iho rātou i runga i te pokohiwi o ngā Pirihitini i te taha ki te hauāuru, ka pāhuatia ngātahitia e rātou te hunga o te rāwhiti. Ka pā ō rātou ringa ki runga ki a Ēroma rāua ko Moapa; ka whakarongo hoki ngā tama a Āmona ki a rātou.

¹⁵ Ā, ka whakangaromia rawatia e Ihowā te arero o te moana i Īhipa; ā, he hau hunuhunu tāna e rūrū ai i tōna ringa ki runga ki te awa, e patu ai kia whitu ōna rerenga, ā, ka meinga ngā tāngata kia whiti maroke noa atu.

¹⁶ Ā, ka takoto he ara haerenga mai i Ahiria mō ngā mōrehu o tāna iwi ka mahue; ka rite anō ki tō Īharaira i te rā i haere mai ai ia i te whenua o Īhipa.