Ihāia 1 - Paipera Tapu 2012

¹ Ko te kite a Ihāia, a te tama a Āmoho, i kite ai ia mō Hūrā, mō Hiruhārama, i ngā rā o ngā kīngi o Hūrā, o Utia, o Iotama, o Ahata, o Hetekia.

Te Mahi Kino a Hūrā

² Whakarongo, e ngā rangi, kia whai taringa anō; e te whenua, kua kōrero hoki a Ihowā: “Kua atawhai tamariki ahau, kua whakatupu hoki, nā, kua tahuri mai rātou ki ahau.

³ E mōhio ana te kau ki tōna ariki, te kāihe ki te takotoranga kai a tōna rangatira; ko Īharaira ia kāhore e mōhio, kāhore tāku iwi e whakaaro.”

⁴ Auē, e te iwi hara, he hunga taimaha i te kino, he uri nō ngā kaimahi i te hē, he tamariki whakangau kē. Kua whakarērea e rātou a Ihowā, kua whakahāwea ki te Mea Tapu o Īharaira, kua tāngata kē rātou, ā, kua hoki whakamuri.

⁵ Kia patua tonutia hoki koutou hei aha, i tutū tonu ai koutou? Kei te mate katoa te māhunga, kei te ruhi katoa hoki te ngākau.

⁶ Kāhore ōna wāhi ora, ake i te kapu o tōna waewae ā tae noa ki te māhunga; he kaiākiko kau, he kārawarawa, he whiunga kua pirau; kīhai ēnā i romia, kīhai i takaia, kīhai anō hoki i whakangāwaritia ki te hinu.

⁷ Ko tō koutou whenua kua ururuatia; ko ō koutou pā kua wera i te ahi; he tangata kē kei te kai i tō koutou oneone i tō koutou aroaro, ururua ana, koia anō kei tā te tangata kē raupatutanga.

⁸ Ā, ka mahue iho te tamāhine a Hiona, ānō he tīhokahoka i te māra wāina, ānō he wharau i te māra kūkamo, he pā e whakapaea ana.

⁹ Me i kāhore a Ihowā o ngā mano te waiho i tētahi toenga nohinohi rawa nei ki a tātou, kua pērā tātou me Horoma, kua rite tātou ki Komora.

¹⁰ Whakarongo ki te kupu a Ihowā e ngā rangatira o Horoma! Kia whai taringa mai, e te iwi o Komora, ki te ture a tō tātou Atua!

¹¹ “Hei aha māku ā koutou patunga maha?” e ai tā Ihowā. “Kua mākona ahau i ngā tahunga o ngā tinana o ngā hipi toa, i te ngako o ngā kararehe whāngai; kāhore hoki aku manakohanga atu ki te toto o ngā pūru, o ngā reme, o ngā koati toa rānei.

¹² “Ka haere mai koutou, ka whakakite mai ki tōku aroaro, ko wai i kī atu ki tēnei mea a ō koutou ringa, kia takahia ōku marae?

¹³ Kāti te mau mai i ngā whakahere horihori; he mea whakarihariha ki ahau te whakakakara – te kōwhititanga marama, te hāpati, te karangatanga o ngā whakaminenga, e kore ahau e manawanui ki te kino, ki te huihui nui.

¹⁴ Ko ā koutou kōwhititanga marama, ko ā koutou hākari whakarite, e kino ana tōku ngākau. He mea pōrearea ki ahau, he hanga whakahōhā.

¹⁵ Nā, ka wherahia mai ō koutou ringa, ka hunā e ahau ōku kanohi ki a koutou; āe rā, ka whakanuia e koutou te īnoi e kore ahau e rongo, kapi tonu ō koutou ringa i te toto.

¹⁶ Horoi i a koutou; kia mā; whakarērea atu te kino o ā koutou hanga i mua i ōku kanohi; kāti te mahi i te kino;

¹⁷ ākona te mahi pai; rapua te whakawā; whakatikaia tā te tangata e tūkinotia ana; whakawākia tā te pani; tohea tā te pouaru.

¹⁸ “Tēnā rā, tātou ka kōrerorero,” e ai tā Ihowā. “Ahakoa i rite ō koutou hara ki te mea ngangana, ka pērā me te hukarere te mā; ahakoa i whero me te mea whakawhero, ka rite ki te huruhuru hipi.

¹⁹ Ki te mea ka pai koutou, ā, ka rongo, ka kai koutou i ngā mea pai o te whenua;

²⁰ ki te whakakāhore koutou, ā, ka tutū, ka pau koutou i te hoari. Kua kōrero hoki te māngai o Ihowā.”

Te Kairautanga o te Pā

²¹ Auē! Tōna kairautanga o te pā pono! I kī nei ia i te whakawā, he nohoanga nō te tika – ināianei ia nō ngā kaikōhuru!

²² Ko tāu hiriwa kua meinga hei para, ko tāu wāina, kua whakaranua ki te wai.

²³ Ko ōu rangatira kei te whakakeke, ā, he hoa rātou nō te hunga tāhae. E whakapai ana rātou ki te moni whakapati, e whai ana i te utu. Kāhore rātou e whakawā ana mō te pani, ā, kāhore te tohe a te pouaru e tae ana ki a rātou.

²⁴ Nō reira ka mea te Ariki, a Ihowā o ngā mano, te Mea Nui o Īharaira: “Nā! Ka whai mamatanga ahau i ōku hoariri, ka whai utu ahau i ōku hoariri.

²⁵ Ka tahuri atu hoki tōku ringa ki a koe, ā, ka tahia rawatia tōu para, ka wehea katoatia atu anō tōu tine.

²⁶ Ā, ka whakahokia mai e ahau ōu kaiwhakawā kia rite ki ō mua, me ōu kaiwhakatakoto whakaaro, kia rite ki ō te tīmatanga; muri iho ka kīia koe, Ko te pā o te tika, ko te pā piripono.”

²⁷ Ka hokona a Hiona i runga i te whakawā, āna tāngata hoki, e tahuri mai ana, i runga i te tika.

²⁸ Ka huihuia ia kia kotahi tonu te whakangaromanga o te hunga poka kē, o te hunga hara, ā, ka whakamōtītia te hunga e whakarere ana i a Ihowā.

²⁹ Ka whakamā hoki rātou i ngā oki i matenuitia e koutou, numinumi kau koutou i ngā kāri i whiriwhiria e koutou.

³⁰ Ka rite hoki koutou ki te oki kua memenge ōna rau, ki te kāri anō hoki kāhore nei ōna wai.

³¹ Ā, hei muka te mea kaha, hei korakora anō tāna mahi; nā, ka ngiha ngātahi rāua, kāhore hoki he tangata hei tinei.