Hopa 8 - Paipera Tapu 2012

Me Rīpenetā a Hopa

¹ Nā, ka whakautu a Pirirara Huhi, ka mea:

² “Kia pēhea ake te roa o tāu kōrero i ēnei mea? Kia pēhea ake te roa o ngā kupu a tōu māngai e rite ai ki te hau kaha?

³ E whakaparori kē rānei te Atua i te whakawā? E whakaparori kē rānei te Kaha Rawa i te tika?

⁴ Ki te mea i hara āu tamariki ki a ia, ā, kua makā atu rātou e ia hei utu mō tō rātou hē.

⁵ Ki te rapu wawe koe i te Atua, ā, ka īnoi ki te Kaha Rawa;

⁶ ki te mea he mā koe, he tika, inā, ka ara ake ia ki a koe āianei, ka manaakitia anō e ia te nohoanga o tōu tika.

⁷ Ahakoa i iti tōu tīmatanga, e nui noa atu tōu whakamutunga.

⁸ “Tēnā rā, ui atu ki tō mua whakatupuranga; anga atu hoki ki te mea kua rapua e ō rātou mātua.

⁹ Nōnanahi nei hoki tātou, kāhore hoki e mōhio; he ātārangi nei hoki ō tātou rā i runga i te whenua.

¹⁰ E kore rānei rātou e whakaako i a koe, e kōrero ki a koe, e puaki mai rānei he kupu i ō rātou ngākau?

¹¹ “E tupu rānei te wīwī i te mea kāhore he repo? E nui rānei te raupō ki te kāhore he wai?

¹² I te mea he kaiota tonu, ā, kīhai i tapahia, kua maroke i mua ake i ngā otaota katoa.

¹³ Ka pērā anō ngā ara o te hunga katoa e wareware ana ki te Atua, ā, ka riro ki te kore tā te tangata whakapono kore i tūmanako ai.

¹⁴ Ka motuhia atu tāna i whakamanawa atu ai, ko te whare hoki o te pūngāwerewere hei tūmanakohanga mōna.

¹⁵ Ka okioki atu ia ki tōna whare; heoi e kore e tū; ū tonu tāna pupuri atu, otiia e kore e mau.

¹⁶ E matomato ana i te mea kāhore nei te rā, ā, e wana ana ōna peka i tāna kāri.

¹⁷ Kapi tonu te pūranga i ōna pakiaka, e kitea ana e ia te wāhi kāmaka.

¹⁸ Ki te whakamōtītia iho ia i tōna wāhi, ka whakakāhore taua wāhi ki a ia, ka mea, ‘Kāhore ahau i kite i a koe.’

¹⁹ Nanā, ko te hari tēnei o tōna ara, ā, ka tupu ake ētahi atu i roto i te puehu.

²⁰ “Nanā, e kore te Atua e whakakāhore ki te tangata tika, e kore anō e puritia e ia te ringa o ngā tāngata kino.

²¹ Tērā anō tōu māngai ka whakakīia e ia ki te kata, ōu ngutu ki te hāmama.

²² He whakamā te kākahu mō te hunga e kino ana ki a koe, ā, ka kāhore noa iho te tapenākara o te hunga kino.”