Hopa 5 - Paipera Tapu 2012

Ka Whakatika tonu a Eripata

¹ “Tēnā rā, karanga; ka whakaō rānei tētahi ki a koe? Ā, ka anga atu koe ki a wai o te hunga tapu?

² E patua ana hoki te kūware e te āritarita, e whakamatea ana te whakaarokore e te hae.

³ I kite ahau i te kūware e hou ana ōna pakiaka; kitea rawatia ake kua kangā e ahau tōna nohoanga.

⁴ Kei tawhiti atu āna tama i te ora, mongamonga noa rātou i te kūwaha, kāhore hoki he kaiwhakaora.

⁵ Ko āna hua ka kainga e te tangata matekai, ka riro i a ia ahakoa i roto i te tātarāmoa, ā, ka hāmama te māhanga ki ō rātou rawa.

⁶ Nā, e kore te hē e puta ake i te puehu, e kore anō te raruraru e tupu ake i te oneone;

⁷ i whānau te tangata ki te raruraru, tōna rite kei ngā korakora e rere nei whakarunga.

⁸ “Ko ahau ia ka rapu i tā te Atua; me tuku atu tāku kōrero ki te Atua.

⁹ E mahi nei i ngā mea nunui e kore nei e taea te rapu atu, i ngā mea whakamīharo e kore nei e taea te tatau.

¹⁰ E hōmai nei i te ua ki te mata o te whenua, e unga nei i te wai ki te mata o ngā pārae;

¹¹ e whakanoho nei i te hunga iti ki te wāhi tiketike, ā, whakanekehia ake ana te hunga pōuri ki te ora.

¹² E haukoti nei i ngā whakaaro o te hunga tinihanga, tē taea e ō rātou ringa tā rātou i mea ai.

¹³ Mau ake i a ia te hunga whakaaro i tō rātou tinihanga: pororaru iho ngā whakaaro o te hunga kotiti kē.

¹⁴ I te awatea nei, tūtaki ana rātou ki te pōuri; whāwhā ana rātou i te poutūmārōtanga, ānō ko te pō.

¹⁵ Otiia, e whakaorangia ana e ia te rawakore i te hoari, i tō rātou māngai, i te ringa anō o te tangata kaha.

¹⁶ Ka ai anō he tūmanakohanga atu mō te ware; kokopi tonu ia te māngai o te kino.

¹⁷ “Nanā, ka hari te tangata e ākona ana e te Atua; nā, kaua e whakahāwea ki te papaki a te Kaha Rawa.

¹⁸ He whakamamae hoki tāna, he takai anō; e patu ana ia, ā, ko ōna ringa anō hei whakaora.

¹⁹ E ono ngā matenga e whakaora ai ia i a koe; ahakoa e whitu, e kore te hē e pā ki a koe.

²⁰ I te matekai ka hokona koe e ia kei mate; i te tatauranga anō, kei pāngia e te hoari.

²¹ Ka huna koe i te whiu a te arero, e kore anō koe e wehi i te whakangaromanga ina tae mai.

²² E kata anō koe ki te whakangaromanga rāua ko te hemokai; e kore hoki koe e wehi i ngā kīrehe o te whenua.

²³ Nō te mea ka takoto tāu kawenata ki ngā kōhatu o te pārae; ka mau anō tā koutou rongo ko ngā kīrehe o te pārae.

²⁴ Ka mōhio anō koe e tū ana tōu tēneti i te āionuku, ka hāereere anō koe ki tōu nohoanga, tē ai he hara.

²⁵ Ka mōhio anō koe he nui ōu uri, he pērā anō tōu whānau me te tarutaru o te whenua.

²⁶ Ka āta rite ōu tau ina tae koe ki te urupā, ka pērā anō me te pūranga wīti e hikitia ake ana i tōna wā e rite ai.

²⁷ “Nanā, tēnei, he mea rapu nā mātou, ko te mea tika hoki ia; whakarangona mai, ka mōhio iho hei pai mōu.”