Hopa 38 - Paipera Tapu 2012

Ka Whakautu a Ihowā ki a Hopa

¹ Kātahi a Ihowā ka whakahoki kupu ki a Hopa i roto i te tūkauati, ā, ka mea:

² “Ko wai tēnei e whakapōuri nei i ngā whakaaro ki ngā kupu kāhore ōna mātauranga?

³ Tēnā rā, whītikiria tōu hope, whakatāne; ka ui hoki ahau ki a koe, ā, māu e whakaatu mai ki ahau.

⁴ “I hea koia koe i ahau e whakatakoto ana i te tūranga o te whenua? Whakaaturia mai, ki te mea e mōhio ana koe ki te whakaaro.

⁵ Nā wai i whakarite ōna rūri? Ki te mea e mōhio ana koe; nā wai hoki i whakamārō te aho ki runga?

⁶ I whakaūkia ōna tūranga ki runga ki te aha? Nā wai hoki i whakatakoto tōna kōhatu kokonga;

⁷ i te mea i waiata ngātahi ngā whetū o te ata, ā, i hāmama ngā tama katoa a te Atua i te koa?

⁸ “Nā wai hoki i tūtaki te moana ki te tatau, i a ia e puta mai ana, me te mea e whānau mai ana i roto i te kōpū?

⁹ I ahau rā i mea ai i te kapua hei kākahu mōna, i te pōuri kerekere hei tākai mōna.

¹⁰ Ā, whakapuakina ana e ahau tāku tikanga mōna, mea rawa ki ngā tūtaki, ki ngā tatau,

¹¹ me tāku kī atu anō, ‘Ka taea mai e koe a konei, kāti; hei konei ōu ngaru whakakake mau ai’?

¹² “Ko koe koia, i ōu rā nei, te kaiwhakahau i te ata; nāu rānei te pūaotanga i mōhio ai ki tōna wāhi;

¹³ kia rurukutia e ia ngā pito o te whenua, ā, ruperupea ake ngā tāngata kikino i roto?

¹⁴ Kua whiti kē, kua pērā anō me te paru i te hīri; tū ake ana ngā mea katoa ānō he kākahu.

¹⁵ Ā, e kaiponuhia ana tō rātou mārama ki te hunga kino, whati iho te ringa whakakake.

¹⁶ “Kua tae atu rānei koe ki ngā mātāpuna o te moana? Kua whakatakina haeretia rānei e koe te rire?

¹⁷ Kua whakapuaretia rānei ki a koe ngā kūwaha o te mate? Kua kite rānei koe i ngā kūwaha o te ātārangi o te mate?

¹⁸ Kua oti rānei te whakaaro e koe te whānuitanga o te whenua? Kōrero mai, ki te mea e mōhiotia katoatia ana e koe.

¹⁹ “Kei hea te ara ki te nohoanga o te mārama? Te pōuri hoki, kei hea tōna wāhi?

²⁰ Kia kawea atu ai e koe ki tōna rohe, ā, mōhio iho koe ki ngā huarahi ki tōna whare?

²¹ I mōhio pea koe nō te mea i whānau koe i taua wā, ā, he maha ōu rā!

²² “Kua tomo rānei koe ki ngā takotoranga o te hukarere, kua kite rānei koe i ngā takotoranga o te whatu,

²³ i āku i rongoā ai mō te wā o te hē, mō te rā o te tatauranga, o te pakanga?

²⁴ Tēnā koa, te ara i marara atu ai te mārama, i pakaru atu ai te marangai ki runga ki te whenua?

²⁵ “Nā wai i wehe he awa mō te waipuke, he ara mō te uira o te whatitiri;

²⁶ kia ua ai ki te whenua, ki te wāhi kāhore nei he tangata; ki te koraha, kāhore nei ō reira tangata;

²⁷ hei whakamākona i te tūhea, i te ururua; hei mea kia pariri te tupu o te otaota hou?

²⁸ “He matua tāne anō rānei tō te ua? I whānau rānei i a wai ngā pata o te tōmairangi?

²⁹ I puta mai i roto i tō wai kōpū te huka tio? Ko te huka o te rangi, he whānau tēnā nā wai?

³⁰ Me te mea he kōhatu e huna ana i te wai; ā, whakatotoka ana te mata o te rire.

³¹ “E taea rānei e koe te here te huihui o Matariki, e wewete rānei ngā here o Tautoru?

³² E taea rānei e koe te ārahi mai te Mataroto i tōna wā, te taki mai rānei a Aketura rātou ko tāna rōpū?

³³ E mōhio ana rānei koe ki ngā tikanga o te rangi? Māu rānei e whai mana ai ki runga ki te whenua?

³⁴ “E ara rānei i a koe tōu reo ki ngā kapua, kia nui ai ngā wai hei taupoki i a koe?

³⁵ E taea rānei e koe ngā uira te unga atu, e haere ai rātou, me tā rātou kī anō ki a koe, ‘Tēnei mātou’?

³⁶ Nā wai i whakanoho ngā whakaaro nunui ki ngā wāhi o roto? Nā wai i hōmai ngā mahara ki te ngākau?

³⁷ Ko wai te mea whakaaro nui hei tatau i ngā kapua? Ko wai hei tāhoro i ngā ipu o te rangi?

³⁸ Ina ka papatupu te puehu anō he mea whakarewa, ā, ka piri ngā pōkuru ki a rātou anō?

³⁹ “Māu rānei e hopu he kai mā te raiona? Māu e nui ai he oranga mō ngā kūao raiona,

⁴⁰ ina tāpapa iho rātou i ō rātou nohoanga, ina noho i te piringa whanga ai?

⁴¹ Nā wai i rite ai tāna kai mā te raweni, ina tangi āna pī ki te Atua, ina kōpikopiko rātou i te kore kai?”