Hopa 37 - Paipera Tapu 2012

¹ “Nā konei anō wiri ana tōku ngākau, maunu atu ana i tōna wāhi.

² Āta whakarangona tōna reo e papā ana, te pakūtanga hoki e puta mai ana i tōna māngai.

³ E whakatikaia atu ana e ia ki ngā wāhi katoa i raro i te rangi, ko tōna uira hoki ki ngā pito o te whenua.

⁴ I muri iho ko te reo e hāmama ana; papā ana te whatitiri o te reo o tōna nui; e kore anō ērā e tauhikuhiku ina rangona tōna reo.

⁵ Ko tā te Atua whatitiri he reo whakamīharo; nui atu āna mahi, e kore hoki e mōhiotia.

⁶ E kī ana hoki ia ki te hukarere, ‘Hei runga koe i te whenua’; ki te ua pūnehunehu anō hoki, rāua ko te ua tā o tōna kaha;

⁷ hīritia ake e ia te ringa o ngā tāngata katoa; kia mōhio ai ngā tāngata katoa nāna nei i hanga ki tāna mahi.

⁸ Haere ana ngā kīrehe ki ngā piringa noho ana i ō rātou nohoanga.

⁹ Puta mai ana te tūpuhi i te whare o te tonga; te mātao hoki i te hauraro.

¹⁰ Nā te manawa o te Atua i hōmai te huka; ā, kūiti iho te whānuitanga o ngā wai.

¹¹ Āe rā, e utaina ana e ia te kapua mātotoru ki te haukū; tohatohaina ana e ia te kohu o tāna uira.

¹² E whakakōpikopikoa ana anō ā tawhio noa, he mea hoki nā ōna whakaaro; hei mea i ngā mea katoa e whakahaua atu ana e ia ki te mata o te ao.

¹³ E whakaputaina ana e ia hei whiu, hei mea rānei mō tōna whenua, hei atawhai rānei.

¹⁴ “Kia whai taringa mai ki tēnei, e Hopa; tū mārie, ka whakaaro ki ngā mea whakamīharo a te Atua.

¹⁵ E mōhio ana rānei koe ki tā te Atua whakahautanga ki a rātou i tāna, i puta ai te mārama o tāna kapua?

¹⁶ E mōhio ana rānei koe ki ngā pāunatanga o ngā kapua, ki ngā mahi whakamīharo a te tino o te mātauranga?

¹⁷ Ki ōu kākahu nei ka mahana, ina whakamārietia e ia te whenua ki te hau tonga?

¹⁸ Ka taea rānei e koe te whakatakoto ngātahi me ia te rangi hei papatupu, ānō he whakaata whakarewa?

¹⁹ “Whakaaturia mai ki a mātou tā mātou e kōrero ai ki a ia; e kore hoki e tika i te pōuri tā mātou whakatakoto o te kōrero.

²⁰ E kōrerotia rānei ki a ia kei te mea ahau ki te kōrero? Kia hiahia rānei te tangata kia horomia ia?

²¹ Nā, ināianei e kore ngā tāngata e kite ana i te mārama e wheriko mai nei i te rangi; otiia ka tika atu te hau, ka whakawāteatia rātou.

²² E ahu mai ana i te hauraro te aho ānō he kōura; kei te Atua te korōria whakawehi.

²³ Ko te Kaha Rawa – e kore ia e taea te whakataki e tātou; hira rawa tōna kaha; ā, e kore ia e tūkino i tāna whakarite whakawā, i te nui o te tika.

²⁴ Koia ka wehi ngā tāngata i a ia; e kore ia e whai whakaaro ki te hunga ngākau mōhio.”