Hopa 36 - Paipera Tapu 2012

Ka Whakanuia e Erihu te Painga o te Atua

¹ I kōrero anō a Erihu, i mea:

² “Tukua ahau, kia iti nei, ā, ka whakaatu ahau ki a koe; he kupu anō hoki āku mō tā te Atua.

³ Ka tīkina atu e ahau tōku mōhio i tawhiti, ka whakatikaia e ahau tā tōku Kaihanga.

⁴ E kore rawa hoki; āku kupu e teka; tēnei kei a koe te tangata kua tino nui tōna mātauranga.

⁵ “Nanā, he pakari te Atua, e kore anō ia e whakahāwea; pakari tonu te kaha o tōna mātauranga.

⁶ E kore te tangata kino e whakaorangia e ia; māna te hunga mate e whiwhi ai ki ngā mea e tika ana mā rātou.

⁷ E kore e mutu tāna titiro ki te tangata tika; engari ka whakanohoia ngātahitia rātou e ia me ngā kīngi ki runga ki te torōna ake ake, ā, ka whakanekehia ake hoki rātou.

⁸ Ki te mea kua herea rātou ki te mekameka, mau pū i te rāhiri, arā i ngā mate,

⁹ ā, ka whakakitea e ia ki a rātou tā rātou mahi, me ō rātou hē, i mea ai rātou i ngā mea whakapehapeha.

¹⁰ Ka whakapuaretia anō e ia ō rātou taringa ki te ako, ā, ka kī kia hoki i te kino.

¹¹ Ki te rongo rātou, ā, ka mahi ki a ia, ka pau ō rātou rā i runga i te pai, ō rātou tau i runga i ngā āhuareka.

¹² Otirā, ki te kore rātou e rongo, ka ngaro rātou i te hoari, hemo iho rātou, kāhore hoki he mātauranga.

¹³ “Ko te hunga whakapono kore ō rātou ngākau, pūranga rawa i a rātou te riri; kāhore ā rātou karanga āwhina ina herea rātou e ia.

¹⁴ Ka mate rātou i te taitamarikitanga, ā, ka ngaro tō rātou ora i roto i te hunga poke.

¹⁵ Ko tāna he whakaora i te rawakore ina mate, e whakapuaretia ana e ia ō rātou taringa ina tūkinotia.

¹⁶ Āe rā, me koe anō, tērā koe e riro i a ia i roto i te kūititanga ki te wāhi whānui; ā, kī tonu i te ngako te mea e whakatakotoria ki runga ki tāu tēpu.

¹⁷ “Otiia kī tonu koe i te tikanga a te tangata kino; ā, mau pū koe i ngā tikanga, i te whakarite whakawā.

¹⁸ Nā, i te mea he riri tēnei, kia tūpato kei riro koe i te nui o āu rawa; aua hoki koe e whakapeautia e te nui o te utu.

¹⁹ E ranea rānei ōu rawa, e kore ai koe e taka hē? Ngā uaua katoa rānei o tōu kaha?

²⁰ Kaua e hiahiatia te pō, te wā e riro ai ngā tāngata i runga i tō rātou wāhi.

²¹ Kia tūpato, kaua e tahuri ki te kino; ki tāu hoki he pai ake tēnei i ngā mate.

²² Nanā, ko te Atua, ko tōna kaha hei whakanui, ko wai te kaiwhakaako hei rite mōna?

²³ Ko wai te kaitohutohu i te ara mōna? Ko wai hei mea, ‘Kua hē tāu mahi’?”

Ka Kauwhau a Erihu i te Rangatiratanga o te Atua

²⁴ “Kia mahara kia whakanuia e koe tāna mahi, e waiatatia nei e te tangata.

²⁵ Kua tirohia nei e ngā tāngata katoa e mātakitakina mai nei e te tangata i tawhiti.

²⁶ Nanā, he nui te Atua, e kore anō e mōhiotia e tātou; e kore anō hoki te maha o ōna tau e taea te rapu atu.

²⁷ “Ko ia nei hei ngongo ake i ngā pata wai, ka tauia i tōna kohu hei āwhā;

²⁸ ka ringihia iho nei e ngā kapua, ā, ka māturuturu nui ki runga ki te tangata.

²⁹ Āe rā, e mōhiotia ana rānei e tētahi ngā horahanga o ngā kapua, te ngangau o tōna tapenākara?

³⁰ Nanā, e horahia ana e ia tōna mārama ā tawhio noa i a ia; e hīpokina ana hoki e ia te takere o te moana.

³¹ Ko āna mea hoki ēnā hei whakawā mō ngā iwi, nui tonu te kai e hōmai ana e ia.

³² E hīpokina ana e ia ōna ringa ki te uira, ā, whakahaua iho e ia te wāhi e pā atu ai.

³³ Hei kaiwhakaatu i a ia tōna haruru, e waitohu ana hoki ki ngā kararehe i te tūpuhi meāke puta mai.