Hopa 34 - Paipera Tapu 2012

Ka Kauwhau a Erihu mō te Tika o te Atua

¹ I kōrero anō hoki a Erihu, i mea:

² “Whakarongo ki āku kupu, e te hunga whakaaro nui; kia whai taringa ki ahau, e te hunga mōhio.

³ E whakamātau ana hoki te taringa i te kupu, e pērā ana me tā te māngai ki te reka o te kai.

⁴ Ko tā tātou e whiriwhiri ai mā tātou ko te mea tika; kia mōhiotia hoki e tātou, e tēnei, e tēnei, ko te aha te mea pai.

⁵ “Kua mea nei hoki a Hopa, ‘He tika tāku, ā, kua whakapeaua kētia e te Atua te whakawā mōku;

⁶ ahakoa kei ahau te tika ka kīia ahau he tangata teka; e kore e mahu tōku werohanga, ahakoa kāhore ōku hē.’

⁷ Ko wai te tangata e rite ki a Hopa, me te mea he wai te tāwai e inumia ana e ia?

⁸ Kua uru nei ki te tira o ngā kaimahi i te hē, ā, e haere tahi ana me ngā tāngata kikino.

⁹ Kua mea hoki ia, ‘Kāhore he painga ki te tangata ki te āhuareka atu ia ki te Atua.’

¹⁰ “Nō reira whakarongo mai ki ahau, e ngā tāngata ngākau mōhio; e kore rawa te Atua e mahi i te kino; e kore, rawa hoki te Kaha Rawa e mahi i te hē.

¹¹ Ka utua hoki e ia te tangata mō tāna mahi, ka rite hoki ki tō te tangata ara ngā mea e whakawhiwhia e ia ki a ia.

¹² Tika rawa, e kore te Atua e kino, e kore anō hoki te Kaha Rawa e whakaputa kē i te whakawā.

¹³ Nā wai ia i mea hei kaitirotiro mō te whenua? Nā wai hoki i whakatakoto ngā tikanga mō te ao katoa?

¹⁴ Ki te anga mai tōna ngākau ki te tangata, ki te kohia atu e ia ki a ia tōna wairua me tōna manawa;

¹⁵ ka hemo ngātahi ngā kikokiko katoa, ā, ka hoki anō te tangata ki te puehu.

¹⁶ “Nā, ki te mea he ngākau mōhio tōu, whakarongo ki tēnei; kia whai taringa mai ki te reo o āku kupu.

¹⁷ E whai kīngitanga rānei tētahi kotahi e kino ana ki te tika? E whakakino rānei koe ki te tangata tika, kaha hoki?

¹⁸ E tau ana rānei te mea atu ki te kīngi, ‘He weriweri koe’? ki ngā rangatira rānei, ‘He kino koutou’?

¹⁹ Kia iti rawa iho ki a ia e kore nei e whakapai ki te kanohi o ngā rangatira, e kore nei e hira ake tōna pai ki te hunga whai rawa i ngā rawakore? Nō te mea he mahi rātou katoa nā ōna ringa.

²⁰ Kīhai i aha kua mate rātou; kua mate i waenganui pō; ka wiri te iwi, ka pahemo atu, ka riro te hunga nunui, kāhore hoki he ringa.

²¹ “Kei runga hoki i ngā ara o te tangata ōna kanohi, ā, kitea ana e ia ōna hīkoinga katoa.

²² Kāhore he pōuri, kāhore he ātārangi o te mate e piri ai ngā kaimahi i te kino.

²³ E kore hoki e nui atu i te tika te mea e whakawahā e ia ki te tangata, e haere ai ia ki te aroaro o te Atua ki te whakawā.

²⁴ Ka wāwāhia e ia ngā tāngata nunui, tē mōhiotia ngā ara, ā, whakatūria ake ētahi atu i muri i a rātou.

²⁵ Nā, e mōhio ana ia ki ā rātou mahi, ā, hurihia ake rātou e ia i te pō, ā, mongamonga noa rātou.

²⁶ He hunga kino rātou, pākia iho e ia i te tirohanga a te tangata;

²⁷ mō rātou i tahuri kē i te whai i a ia, kīhai hoki i whakaaro ki tētahi o ōna ara –

²⁸ nā rātou hoki i puta ai te tangi a te rawakore ki a ia, ā, rongo ana ia ki te tangi a te hunga e tūkinotia ana.

²⁹ Ki te meinga e ia kia āta noho, ko wai hei whakararuraru? Ā, ki te hunā e ia tōna kanohi, ko wai e kite i a ia? Ahakoa i meatia ki te iwi, ki te tangata rānei, rite tonu.

³⁰ Kore ake te whakapono kore e whai kīngitanga, kore ake te iwi e māhangatia.

³¹ “Kua mea atu rānei ki te Atua, ‘Kua pēhia ahau e te whiu; e kore ahau e mahi i te hē ā muri nei?

³² Ko te mea kīhai i kitea e ahau māu e whakaatu mai ki ahau; ki te mea i mahi ahau i te hē, ka mutu tāku.’

³³ Kia rite rānei tāna utu ki tāu e mea ai, i whakakāhoretia ai e koe? Māu te whiriwhiri, kāhore māku; nā, māu e kōrero mai tāu i mōhio ai.

³⁴ “Ka kōrero mai ngā tāngata ngākau mahara ki ahau, āe rā, ngā tāngata whakaaro nui e whakarongo ana ki ahau,

³⁵ ‘Kāhore he mātauranga o Hopa i a ia i kōrero rā, kāhore hoki he mahara i roto i āna kupu.’

³⁶ He pai me i whakamātauria a Hopa ā te mutunga rā anō, mō āna kupu i whakahokia mai nei e ia, he mea i rite ki ā ngā tāngata kikino.

³⁷ E tāpiritia ana hoki e ia te tutū ki runga ki tōna hara, kei te pakipaki ia i ōna ringa i waenganui i a tātou, ā, whakanuia ana e ia āna kupu ki te Atua.”