Hopa 32 - Paipera Tapu 2012

Ka Kōhete a Erihu i ngā Hoa o Hōpa

¹ Heoi, mutu ake te whakahoki kupu a ēnei tāngata tokotoru ki a Hopa, nō te mea he tika ia ki tōna nei whakaaro.

² Nā, kua mura te riri o Erihu tama a Parakere Puti, nō te whānau i a Rame. Mura ana tōna riri ki a Hopa, nō te mea ki tāna tika rawa ia i te Atua.

³ I mura anō tōna riri ki ōna hoa tokotoru, nō te mea kīhai i kitea e rātou he kupu hei whakahokinga atu, heoi kei te whakahē anō rātou i a Hopa.

⁴ Nā, i tatari a Erihu kia kōrero ia ki a Hopa, nō te mea he kaumātua ake rātou i a ia.

⁵ Ā, nō te kitenga o Erihu kāhore he kupu i ngā māngai o aua tāngata tokotoru hei whakahokinga atu, mura ana tōna riri.

⁶ Nā, ka oho a Erihu tama a Parakere Puti, ka mea: “He taitamariki ahau, ko koutou ia he koroheke rawa; koia ahau i hopohopo ai, i wehi ai ki te whakaatu i tōku whakaaro ki a koutou.

⁷ I mea ahau, ‘Mā ngā rā te kōrero, mā ngā tau kua maha e whakaatu te whakaaro nui.’

⁸ Otiia, he wairua anō tō te tangata, nā te manawa anō o te Kaha Rawa rātou i whai mahara ai.

⁹ Ko ngā tāngata nunui, kāhore ō rātou whakaaro nui, ko ngā kaumātua, kāhore e mātau ki te whakawā.

¹⁰ Koia ahau i mea ai, ‘Whakarongo ki ahau; ka whakakite hoki ahau i tōku whakaaro.’

¹¹ “Nanā, i tatari ahau ki ā koutou kupu; i whai taringa atu ki ō koutou whakaaro mōhio i a koutou e rapu kupu ana.

¹² Nanā, mahara tonu atu ahau ki a koutou, ā, kīhai tētahi o koutou i whakaatu i te hē o Hopa, i whakahoki kupu rānei ki āna kōrero.

¹³ Kei mea koutou, ‘Kua kitea e mātou te mōhio, nā te Atua ia i turaki, ehara i te tangata.’

¹⁴ Nā, kīhai āna kupu i anga mai ki ahau; e kore anō tāna e utua e ahau ki ā koutou kupu.

¹⁵ “Pōrahurahu kau ana rātou, kore ake ā rātou kupu whakahoki; mutu ake ā rātou kōrero.

¹⁶ Kia tatari ahau, nō te mea kāhore rātou e kōrero, nō te mea e tū kau ana rātou, kāhore e whakahoki atu?

¹⁷ Me kōrero atu hoki e ahau āku kupu, māku anō e whakaatu tōku whakaaro.

¹⁸ Kī tonu hoki ahau i te kōrero; e akiakina ana ahau e te wairua i roto i ahau.

¹⁹ Nanā, ko tōku kōpū rite tonu ki te wāina kāhore nei ōna putanga; ki te ipu hou e tata ana ia te pakaru.

²⁰ Me kōrero ahau, kia tā ai tōku manawa; ka puaki tōku māngai, ka whakahoki kupu ahau.

²¹ Nā, kaua ahau e whakapai ki te kanohi tangata; e kore hoki ahau e hoatu ingoa whakapaipai ki te tangata.

²² Kāhore hoki ahau e mōhio ki te whakapati – pēnei kua riro wawe ahau i tōku Kaihanga.”