Hopa 30 - Paipera Tapu 2012

¹ “Ināianei ia e kataina mai ana ahau e te hunga tamariki rawa i ahau, e te hunga kīhai nei ahau i whakaae kia uru ō rātou mātua ki roto ki ngā kurī o tāku kāhui.

² Āe rā, hei aha māku te kaha o ō rātou ringa? He hanga pirau nei hoki tō rātou koroheketanga.

³ Tūpuhi ana rātou i te rawakore, i te hemokai; e ngau ana rātou i te oneone pakapaka, i roto i te pōuritanga o te tūhea, o te ururua.

⁴ E whawhaki ana rātou i ngā marou i roto o ngā rākau ririki; ā, ko ngā pakiaka hunipa hei kai mā rātou.

⁵ He mea pei atu rātou i roto i ngā tāngata; e kārangarangatia ana rātou ānō he tāhae.

⁶ Me noho rawa atu rātou i ngā kapiti o ngā awaawa, i ngā waro o te whenua, i ngā kāmaka.

⁷ Tangi ā-kāihe ana rātou i roto i ngā rākau ririki; huihuia ana rātou ki raro i ngā ongaonga.

⁸ He tamariki rātou nā ngā kūware, āe rā, he tamariki nā te hunga ingoakore; he hunga i patua atu i runga i te whenua.

⁹ “Ināianei ia kua waiho ahau hei waiata mā rātou, āe, hei whakatauki mā rātou.

¹⁰ E whakarihariha mai ana rātou ki ahau, e neke rawa atu ana i ahau, ā, kāhore e kaiponuhia e rātou te hūware ki tōku mata.

¹¹ Kua oti hoki tāna aho te wewete e ia, ā e whakatupuria kinotia ana ahau e ia, ā, kua tukua e rātou te paraire i tōku aroaro.

¹² I te taha ki matau ka ara te marea; tāia ana e rātou ōku waewae, ā, ākina ana ngā ara o ā rātou whakangaromanga ki ahau.

¹³ E taka kino ana rātou i tōku ara, e whakatupu ana i te hē mōku, ā, kāhore he hoa mahi mō rātou.

¹⁴ Rite tonu ki te wai nui e pakaru mai ana tō rātou haerenga mai; i taua whakangaromanga nei, huri mai ana rātou ki runga ki ahau.

¹⁵ Kua tahuri mai ngā whakawehi ki ahau, e aru ana rātou i tōku whakaaro rangatira ānō he hau; ko te whakahauora mōku, pahemo kē ana ānō he kapua.

¹⁶ “Nā, ināianei kua maringi tōku wairua i roto i ahau; mau pū ahau i ngā rā o te tangi.

¹⁷ I te pō e werohia ana ōku wheua i roto i ahau; kāhore hoki he okiokinga o ngā mamae e ngau nei i ahau.

¹⁸ He kaha nui nō tōku mate i āhua kē ai tōku kākahu; e awhi nei i ahau, e pēnei ana me te whiri o tōku koti.

¹⁹ Kua makā ahau e ia ki te paru kua rite ahau ki te puehu, ki te pungarehu.

²⁰ “E tangi ana ahau ki a koe, heoi kāhore koe e whakaō mai ki ahau; e tū ana, heoi ka titiro kau mai koe ki ahau.

²¹ Kua huri kē, kua kino tāu mahi ki ahau; ko te kaha o tōu ringa kei te tūkino i ahau.

²² Kua hāpainga ake ahau e koe ki te hau, ā, meinga ana tērā e koe hei hōiho mōku; ā, whakamōtītia iho ahau e koe i roto i te tūpuhi.

²³ E mōhio ana hoki ahau tērā ahau e kawea e koe ki te mate, ki te whare hoki i whakaritea mō te hunga ora katoa.

²⁴ “E kore anō ia tōna ringa e totoro iho ki te urupā; ahakoa hei mate mōna ka mea ia ki te karanga, he whakaaro ki ēnei mea.

²⁵ Kīhai ianei ahau i tangi ki te tangata he mate nei tōna? Kīhai rānei tōku wairua i pōuri ki te rawakore?

²⁶ I ahau i tatari ai ki te pai, heoi kua tae mai te kino; tūmanako atu ana ahau ki te mārama, heoi kua tae mai te pōuri.

²⁷ Ko ōku whēkau, me te mea e koropupū ana, tē āta takoto; haukotia mai ana ahau e ngā rā o te tangi.

²⁸ E hāereere pōuri ana ahau, kāhore he rā; ko tāku whakatikanga ake i roto i te whakaminenga, ka karanga āwhina.

²⁹ Hei teina ahau ki ngā tarakona, hei hoa mō ngā ruru.

³⁰ Ko tōku kiri mangu tonu, e ngahoro ana i ahau, kāia ana ōku wheua i te wera.

³¹ Nō reira i tahuri kē ai tāku hāpa ki te tangi, me tāku ōkana ki te reo o te hunga e uhunga ana.