Hopa 29 - Paipera Tapu 2012

Te Kōrero Whakamutunga a Hopa i Tana Take

¹ Ā, i kōrero tonu a Hopa i tāna pepeha, i mea:

² “Auē, me i rite ki ngā marama ō mua, ki ngā rā i tiaki ai te Atua i ahau!

³ I tīaho mai ai tāna rama ki tōku mātenga, ā, nā tāna whakamārama i haere ai ahau i te pōuri;

⁴ me i pērā anō me ahau i ngā rā o tōku taiohitanga, i te mea nei kei runga tō te Atua whakaaro puku i tōku tēneti;

⁵ i te mea e noho ana anō te Kaha Rawa i ahau, ā, kei tētahi taha ōku āku tamariki, kei tētahi taha;

⁶ i horoia ai ōku takahanga ki te pata, ā, rere mai ana ngā awa hinu ki ahau i roto i te kōhatu!

⁷ “I tōku haerenga atu ki te kūwaha ki te pā, ā, whakapai ana i te nohoanga mōku i te waharoa,

⁸ ka kite ngā taitamariki i ahau, ā, piri ana rātou; whakatika ana ngā koroheke, tū ana ki runga;

⁹ mutu pū te kōrero a ngā tino tāngata, kua kōpania te ringa ki ō rātou māngai;

¹⁰ ngaro ana te reo o ngā rangatira, piri ana ō rātou arero ki ō rātou ngao.

¹¹ Nō te rongonga hoki o te taringa i ahau, manaaki ana i ahau; te kitenga o te kanohi i ahau, whakaae mai ana ki āku mahi;

¹² nō te mea nāku i whakaora te rawakore i a ia e karanga ana, te pani me te tangata hoki kāhore nei ōna kaiāwhina.

¹³ I tau ki runga ki ahau te manaaki a te tangata e tata ana ki te whakangaromanga; harakoa ana i ahau te ngākau o te pouaru.

¹⁴ I kākahuria e ahau te tika, ā, ko tērā tōku kākahu; e rite ana tāku whakarite whakawā he koroka, he karauna.

¹⁵ He kanohi ahau ki te matapō, he waewae ki te kopa.

¹⁶ He matua ahau ki ngā rawakore; ā, i āta rapua e ahau te tikanga o te totohe a te tangata kīhai nei ahau i mōhio.

¹⁷ Wāwāhia ana e ahau ngā kauae o te tangata kino, ā, tākiritia mai ana e ahau tāna mea pāhua i roto i ōna niho.

¹⁸ “Kātahi ahau ka mea, ‘Tērā ahau e mate i roto i tōku ōhanga; ka whakanuia ōku rā kia rite ki te onepū te maha.

¹⁹ Ko tōku pakiaka tautoro tonu ki ngā wai, ā, i te pō tau ana te tōmairangi ki runga ki tōku peka;

²⁰ ko tōku korōria hou tonu i roto i ahau, ā, hoki ake ana te kaha o tāku kōpere i tōku ringa.’

²¹ “I whakarongo mai ngā tāngata ki ahau, i tatari, whakarongo puku ana rātou i ahau e whakatakoto whakaaro ana.

²² I muri i āku kupu kore ake rātou kōrero anō; māturuturu iho ana āku kupu ki runga ki a rātou.

²³ I tāria mai ahau e rātou ānō ko te ua; hāmama mai ana ō rātou māngai ānō e tatari ana ki te ua ō muri.

²⁴ Ka kata ahau ki a rātou, kīhai i whakaponohia e rātou; kīhai hoki rātou i whakataka i te mārama o tōku mata.

²⁵ Nāku tō rātou ara i whiriwhiri, ā, noho ana ahau hei rangatira, noho ana hoki ahau ānō he kīngi i roto i te ope i rite ahau ki te kaiwhakamārie o te hunga e tangi ana.