Hopa 28 - Paipera Tapu 2012

E Kitea ana ki hea te Whakaaronui?

¹ “He rua hoki tō te hiriwa e puta mai ai, he wāhi anō tō te kōura e whakarewaina ai.

² He mea tango mai te rino nō roto i te whenua; nō te kāmaka te parāhi, he mea whakarewa.

³ E whakatakotoria ana e te tangata he mutunga mai mō te pōuri, e rapua ana e ia ki te tino tutukitanga atu ngā kōhatu o te pōuri, o te ātārangi o te mate.

⁴ E pākaruhia mai ana e ia he rua i kō ake o ngā nohoanga tāngata; kua wareware rātou i te waewae e haere ana; he tawhiti i te tangata tō rātou tārenga, e piu atu ana, e piu ana mai.

⁵ Ko te whenua, e puta mai ana he taro i roto i a ia: ā, e hurihia ake ana a raro iho ānō he ahi.

⁶ Hei wāhi mō ngā hāpira ōna kōhatu, he puehu kōura anō tōna.

⁷ “He ara tēnā kāhore i mōhiotia e te manu, kīanō i kitea e te kanohi o te whatura.

⁸ Kāhore ngā kīrehe whakahī kia takahi i taua ara, kāhore hoki a reira kia haerea e te raiona tutū.

⁹ “E pā atu ana tōna ringa ki te kiripaka; hurihia ake e ia ngā take o ngā maunga.

¹⁰ E tapahia ana e ia he awa i roto i ngā kāmaka, ā, e kite ana tōna kanohi i ngā mea utu nui katoa.

¹¹ E herea ana e ia ngā awa kei māturuturu; e whakaputa mai ana hoki i ngā mea ngaro ki te mārama.

¹² “E kitea ia ki hea te whakaaro nui, kei hea hoki te wāhi o te mōhio?

¹³ E kore te tangata e mōhio ki tōna utu, e kore anō taua hanga e kitea ki te whenua o te ora.

¹⁴ E kī ake ana te rire, ‘Kāhore i ahau,’ e kī mai ana hoki te moana, ‘Kāhore i ahau.’

¹⁵ E kore e hokona ki te kōura, e kore anō hoki e taea te pāuna te hiriwa hei utu mōna.

¹⁶ E kore e taea te whakarite ki te kōura o Ōpira, ki te onika utu nui, ki te hāpira.

¹⁷ E kore e rite te kōura, te kōhatu pīata ki a ia; e kore e hokona ki ngā oko kōura parakore.

¹⁸ E kore e whakahuatia te kaoa, ngā peara rānei; hira ake hoki te utu o te whakaaro nui i tō te rupi.

¹⁹ E kore te tōpaha o Etiopia e rite ki a ia, e kore e tau te kōura parakore hei utu.

²⁰ “Ka haere mai rā i hea te whakaaro nui? Kei hea te wāhi o te mātau?

²¹ He mea huna atu nā hoki i ngā kanohi o ngā mea ora katoa, ngaro rawa i ngā manu o te rangi.

²² E kī ake ana te whakangaromanga rāua ko te mate, ‘I hakiri ō māua taringa ki tōna rongo.’

²³ “E mōhio ana te Atua ki tōna ara, kua kite anō ia i tōna wāhi.

²⁴ E titiro ana hoki ia ki ngā pito o te whenua, e kite ana ia i ngā mea i raro i te rangi, ā puta noa.

²⁵ E mea ana i te whakataimaha mō te hau; āe, e mēhua ana ia i ngā wai ki te mēhua.

²⁶ I a ia e whakatakoto ana i te tikanga mō te ua, i te huarahi mō te uira o te whatitiri,

²⁷ ka kitea e ia i reira, ā, whakapuakina mai ana; i whakaūkia e ia, ā, āta rapua ana e ia.

²⁸ Ā, ka mea ia ki te tangata, ‘Nā, ko te wehi ki te Ariki, ko te whakaaro nui tēnā; ā, ko te mawehe atu i te kino, koia te mātauranga.’ ”