Hopa 22 - Paipera Tapu 2012

Te Whakawhitinga Kōrero Tuatoru

¹ Anō rā ko Eripāta Temani, i mea ia:

² “E whai pai anō rānei te Atua i te tangata? He pono e whai pai te tangata i a ia anō ki te mea he ngākau mōhio tōna.

³ He oranga ngākau rānei ki te Kaha Rawa tōu tika? Hei taonga rānei ki a ia, ki te meinga e koe ōu ara kia tino tika?

⁴ “He wehi rānei nōu i a ia i whakahē ai ia i a koe, i whakawā ai i a koe?

⁵ He teka ianei he nui tōu hē? Kāhore hoki he pito whakamutunga o ōu kino.

⁶ I tangohia noatia hoki e koe ngā mea a tōu teina hei taunaha, huia ana e koe ngā kākahu o te hunga e noho tahanga ana.

⁷ Kīhai i whakainumia e koe ki te wai te hunga ngenge; kaiponuhia ana e koe he taro ki te hunga e matekai ana.

⁸ Ko te tangata mārohirohi, i a ia te whenua; ko te tangata hōnore, noho ana ia i reira.

⁹ Ko ngā pouaru, ungā rawakoretia atu ana e koe, whatiwhatiia ana ngā ringa o ngā pani.

¹⁰ Nā reira, karapotia pūtia ana koe e ngā māhanga, raruraru ana koe i te wehi pā whakarere;

¹¹ i te pōuri rānei, e kore ai koe e kite; ā, nui atu te wai e taupoki nā i a koe.

¹² “He teka ianei kei te wāhi tiketike o te rangi te Atua? Tirohia atu anō hoki a runga o ngā whetū, tō rātou teitei!

¹³ Ā, e mea nā koe, ‘He aha tā te Atua e mōhio ai?’ E puta mai rānei tāna whakawā i roto i te kapua pōuri?

¹⁴ Ko tōna wāhi ngaro ko ngā kapua mātotoru, tē kite ia; kei te taiāwhio anō ia i ngā rangi.

¹⁵ Ka mau tonu rānei koe ki te ara ō mua, i haerea rā e ngā tāngata kikino?

¹⁶ I kapohia atu nei i te mea kāhore anō i rite ō rātou rā; tāhoroa ana tō rātou tūranga anō he awa.

¹⁷ I mea nei ki te Atua, ‘Mawehe atu i a mātou’; ā, ‘He aha e taea e te Kaha Rawa mō mātou?’

¹⁸ Heoi, i whakakīia e ia ō rātou whare ki ngā mea papai, ko te whakaaro ia o te hunga kino e matara atu ana i ahau.

¹⁹ “E kite ana te hunga tika, ā, koa ana; kataina iho rātou e te hunga harakore,

²⁰ me te kī, ‘He pono kua haukotia te hunga i tahuri mai ki a tātou, pau ake i te ahi te toenga o rātou.’

²¹ “Waiho ia hei hoa mōu, kātahi koe ka āta noho; mā reira ka tae mai ai te pai ki a koe.

²² Tahuri mai rā ki te ture a tōna māngai, rongoātia hoki āna kupu ki roto ki tōu ngākau.

²³ Ki te hoki koe ki te Kaha Rawa, tērā koe e hangā; ki te nekehia atu e koe te kino kia mamao i ōu tēneti.

²⁴ Ā, ka whakapūranga koe i tāu taonga ki te puehu, te kōura o Ōpira ki waenga i ngā kōhatu o ngā awa;

²⁵ ā, ko te Kaha Rawa hei taonga mōu, hei hiriwa utu nui ki a koe.

²⁶ Ko reira hoki koe āhuareka ai ki te Kaha Rawa, ā, ka ara ake tōu mata ki te Atua.

²⁷ Ka īnoi anō koe ki a ia, ā, ka whakarongo mai ia ki a koe; ka whakamanā anō e koe āu kupu taurangi.

²⁸ Ka whakatakotoria hoki e koe he tikanga, ā, ka whakapūmautia ki a koe; ka whiti anō te mārama ki runga ki ōu ara.

²⁹ Ki te makā koe e rātou ki raro, ka kī koe, ‘Tēnei anō he whakaarahanga ake’; ka whakaorangia anō e ia te ngākau whakaiti.

³⁰ Ka whakaorangia e ia te tangata ahakoa ehara i te harakore; āe rā, ka whakaorangia ia e te mā o ōu ringa.”