Hopa 21 - Paipera Tapu 2012

Tērā e Kore te Hunga Kino e Whakawhiua

¹ Anō rā ko Hopa, i mea ia:

² “Āta whakarongo mai ki tāku kupu, ā, hei tēnei he kupu whakamārie mai mā koutou.

³ Tukua ahau, ā, ka kōrero hoki ahau; ā, ka mutu āku kōrero, haere tonu tā koutou tāwai.

⁴ “Ahau nei, ki te tangata koia tāku amuamu? Ā, he aha ahau tē manawanui ai?

⁵ Titiro mai ki ahau, mīharo ai; kōpania atu te ringa ki te māngai.

⁶ Mahara kau ahau, ka wehi, mau pū te wehi o ōku kikokiko.

⁷ He aha te hunga kino i ora ai, i koroheke ai, āe, i mārohirohi ai tō rātou kaha?

⁸ Pūmau tonu ō rātou uri ki tō rātou taha ki tō rātou aroaro, ā, ko ā rātou whānau kei tā rātou tirohanga atu.

⁹ Ō rātou whare kei runga i te rangimārie, kāhore he wehi, kāhore hoki a te Atua patu ki a rātou.

¹⁰ E kaha ana tāna pūru ki te ekeeke, kāhore hoki e hē; ka whānau tāna kau, kāhore hoki he whakatahe.

¹¹ E tukua mai ana e rātou ā rātou kōhungahunga ānō he kāhui hipi, e pekepeke ana ā rātou tamariki.

¹² He hunga hāpai rātou i te timipera, i te hāpa, e koa ana ki te tangi o te ōkana.

¹³ Ō rātou rā pau tonu i runga i te āhuareka, kitea rawatia ake kua heke ki te pō.

¹⁴ Koia rātou i mea ai ki te Atua, ‘Mawehe atu i a mātou; kāhore hoki ō mātou hiahia kia mātau ki ōu ara.

¹⁵ He aha rā te Runga Rawa e mahi ai mātou ki a ia? He aha hoki te rawa ki a mātou ki te īnoi ki a ia?’

¹⁶ Nanā, kāhore he pai mō rātou i ō rātou ringa ake: matara atu i ahau te whakaaro o te hunga kino.

¹⁷ “Pēhea te maha o ngā matenga o te rama a te hunga kino? O ngā pānga mai anō hoki o tō rātou aituā ki a rātou? O te tūwhanga mai a te Atua i ngā mamae i a ia e riri ana?

¹⁸ E rite ai rātou ki te kakau wīti i mua i te hau, ki te pāpapa e kāhakina atu ana e te paroro?

¹⁹ E mea ana koutou, ‘E rongoātia ana e te Atua tōna kino hei mea mō āna tamariki.’ Māna e utu tērā ki a ia tonu, kia mōhio ai ia.

²⁰ Tukua kia kite ōna ake kanohi i tōna hunanga, ā, tukua ia kia inu i te riri o te Kaha Rawa.

²¹ He aha hoki tana manako ki tōna whare i muri i a ia, ka poroa hoki ōna marama i waenga?

²² “E whakaako ianei tētahi i te Atua ki te mātauranga? Ko te kaiwhakawā hoki ia mō te hunga whakakake.

²³ Tēnei tangata, mate iho ia, pakari rawa anō hoki ōna kaha, āta takoto ana āna mea katoa, kāhore hoki he raruraru.

²⁴ Kī tonu ōna ū i te waiū, ā, e mākūkū ana ōna wheua i te hinu.

²⁵ Mate iho hoki tērā tangata, kawa tonu tōna wairua, kāhore hoki he pai hei kai māna.

²⁶ Ka takoto ngātahi rāua ki te puehu, ā, ko te iro hei hīpoki mō rāua.

²⁷ “Nanā, e mōhio ana ahau ki ō koutou whakaaro, ki tā koutou ngārahu nanakia anō hoki mōku.

²⁸ E kī ana hoki koutou, ‘Kei hea te whare o te rangatira? Kei hea hoki te tēneti i noho ai te hunga kino?’

²⁹ Kāhore ianei koutou i ui ki te hunga e haere atu ana i te ara? Kāhore rānei koutou i mōhio ki ā rātou tohu?

³⁰ Kei te rongoā nei hoki te tangata kino mō te rā o te whakangaro; ka whakaputaina rātou i te rā o te riri.

³¹ Ko wai e whakaatu i tōna ara ki tōna aroaro? Ko wai hoki hei hoatu i te utu mō tāna mahi ki a ia?

³² Heoi, ka kawea ia ki te urupā; kei te pūranga he wāhi mōna.

³³ Ka reka ki a ia ngā pōkuru o te awaawa, ka whai mai anō hoki ngā tāngata katoa i a ia; e kore nei hoki e taea te tatau te hunga i mua i a ia.

³⁴ “He pēhea rā tā koutou whakamārie tinihanga i ahau, e toe nā hoki te hē i roto i ā koutou kupu e whakahoki mai nā?”