Hopa 20 - Paipera Tapu 2012

E Whiwhi ana te Kino i te Whakawhiunga Tika

¹ Kātahi ka whakautua e Topara Naamati, i mea ia:

² “Nā konā ōku whakaaro i whakahoki kupu ake ai i roto i ahau; nā reira anō ahau i hohoro ai.

³ Kua rongo ahau i te whakahē mōku, e pā ai te whakamā ki ahau, ā, nā te wairua o tōku ngākau mahara te kupu whakahoki ki ahau.

⁴ “Kāhore rānei koe i mōhio ki tēnei i mua noa atu, i te wā rā anō i whakanohoia ai te tangata ki runga ki te whenua;

⁵ he poto te wā e whakamanamana ai te tangata kino, ā, ko te hari o te tangata atuakore he wheriko kau?

⁶ Ahakoa eke noa tōna nui ki ngā rangi, ā, pā atu tōna māhunga ki ngā kapua;

⁷ ka memeha atu anō ia ā ake ake, ka pērā anō me tōna paru; ko te hunga kua kite i a ia, ka mea, ‘Kei hea ia?’

⁸ Ka rere atu ia ānō he moemoeā, e kore anō hoki e kitea; āe ka āia atu ia, ānō he rekanga kanohi nō te pō.

⁹ Ko te kanohi i kite i a ia e kore e kite anō; ā, heoi anō tirohanga a tōna wāhi ki a ia.

¹⁰ E whakamānawareka āna tamariki i ngā rawakore, mā ōna ringa anō e whakahoki ōna rawa.

¹¹ E kī ana ōna wheua i te tamarikitanga; engari ka takoto tahi me ia i roto i te puehu.

¹² “Ahakoa reka te kino i roto i tōna māngai, ahakoa hunā e ia i raro i tōna arero;

¹³ ahakoa manawapātia noatia e ia, ā, kāhore e mahue i a ia, heoi pupuri tonu i roto i tōna māngai;

¹⁴ otirā, ka puta kē tāna kai i roto i ōna whēkau, ko te au o ngā ahipi i roto i a ia.

¹⁵ I horomia e ia te taonga, ka ruakina mai anō e ia; mā te Atua e ākiri mai i roto i tōna kōpū.

¹⁶ Ka ngotea e ia te hūware whakamate o ngā ahipi; ka mate anō ia i te arero o te waipera.

¹⁷ E kore ia e kite i ngā awa, i ngā wai rere o te honi, o te pata.

¹⁸ Ko tāna i uaua ai ka whakahokia e ia, e kore anō e horomia; ko tāna utu ka rite ki ōna taonga; e kore anō e koa ki reira.

¹⁹ Nāna hoki i tūkino ngā rawakore, whakarērea iho; murua ana e ia he whare, ā, e kore e hangā anō e ia.

²⁰ “I te mea kāhore ia i kite i te tatūtanga i roto i a ia, e kore anō ētahi o ngā mea e matea nuitia ana e ia e mau ki a ia.

²¹ Kāhore tētahi mea i toe i kore te horomia e ia; nō reira, e kore tētahi mea pai ōna e mau tonu.

²² I a ia e whiwhi nui nei i te rawa, e rawakore anō ia; ka tae mai ki a ia ngā ringa katoa o te hunga kei roto i te mate.

²³ I a ia ka mea ki te whakakī i tōna kōpū, ka makā mai e te Atua te kaha o tōna riri ki runga ki a ia, ā, ka ringihia iho ki a ia, i a ia anō e kai ana.

²⁴ Ka rere atu ia i te patu rino, ka tū ia i te kōpere parāhi, puta pū.

²⁵ E unuhia ana, kua puta mai i roto i te tinana, inā, puta mai ana te mata wheriko i roto i tōna au; kua tau ngā wehi ki a ia.

²⁶ Ko te pōuri katoa kei te takoto mai mō āna taonga; ka kainga ia e te ahi, kīhai i pūhia e te tangata; mā reira e pau ai te toenga i roto i tōna tēneti.

²⁷ Ka whakakitea mai tōna hē e ngā rangi ka whakatika mai anō te whenua ki a ia.

²⁸ Ko ngā hua o tōna whare ka riro, ka rere, ānō he wai, ōna mea i te rā e riri ai ia.

²⁹ Ko tā te Atua wāhi tēnei mā te tangata kino, ko te taonga tupu i kīia e te Atua mōna.”