Hopa 18 - Paipera Tapu 2012

Ka Whakawhiua e te Atua te Hunga Kino

¹ Anō rā ko Pirirara Huhi, i mea ia:

² “Kia pēhea te roa o tā koutou whakatakoto māhanga mō ngā kupu? Kia whai mahara mai, muri iho ka kōrero mātou.

³ He aha mātou i kīia ai he kararehe, i waiho ai hei mea poke ki tā koutou titiro mai?

⁴ Haea iho koe e koe anō, i a koe e riri ana – māu koia ka mahue ai te whenua, ka nekehia ai te toka i tōna wāhi?

⁵ “E pirau anō hoki te rama a te hunga kino, ā, e kore te mura o tāna ahi e mārama.

⁶ Ka pōuri te mārama i roto i tōna tēneti, ka pirau anō hoki tāna rama i runga i a ia.

⁷ Ka whakakīkītia ngā takahanga o tōna kaha, ka kōkiritia iho anō ia ki raro e tōna whakaaro ake.

⁸ Nō te mea ka makā ia e ōna waewae ake ki te kupenga, ka haere hoki ia i runga i te reti.

⁹ Ka mau tōna rekereke i te tawhiti, ā, ka hopukia ia e te māhanga.

¹⁰ Kei te huna ki te whenua te aho mōna, te rore hoki mōna ki te huarahi.

¹¹ He whakamataku i ngā taha katoa hei mea i a ia kia wehi, hei aruaru hoki i a ia i ōna hikitanga rekereke.

¹² Ko tōna kaha ka hemo i te kai, ā, kei te whanga tonu te aituā ki tōna tatunga.

¹³ Ka pau i tērā ngā wāhi o tōna tinana, āe, ka pau ōna wāhi i te mātāmua o te mate.

¹⁴ Ka hūtia atu ia i roto i tōna tēneti, i whakamanawa ai ia, ā, ka kawea atu ia ki te kīngi o ngā whakamataku.

¹⁵ Nā, ka noho ki tōna tēneti te mea ehara nei i a ia; ā, ka ruia iho te whānāriki ki runga ki tōna kāinga.

¹⁶ Ka maroke ake ōna pakiaka i raro, ā, i runga ka tapahia atu tōna manga.

¹⁷ Ka ngaro atu te maharatanga ki a ia i runga i te whenua; e kore anō ia e whai ingoa i te huanui.

¹⁸ Ka peia atu anō ia i roto i te mārama ki te pōuri, ka atiatia atu hoki i te ao.

¹⁹ E kore ia e whai tama, e whai tama rānei a te tama, i roto i tōna iwi, he mōrehu rānei i te wāhi i noho ai ia.

²⁰ Mīharo ana ki tōna rā te hunga i muri i a ia, pērā i te hunga i haere rā i mua, mau ana tō rātou wehi.

²¹ He pono ko ngā nohoanga ēnei o te tangata kino, ko te wāhi hoki tēnei o te tangata kāhore e mōhio ki te Atua.”