Hopa 12 - Paipera Tapu 2012

He Tangata Rorirori Ahau

¹ Nā, ka whakautu a Hopa, ka mea:

² “He tika rawa ko koutou ngā tāngata, ā, ka mate tahi atu te whakaaro nui me koutou.

³ Otirā, kei ahau anō hoki he ngākau he pērā anō me o koutou, kīhai ahau i hoki iho i a koutou. Ko wai rā te hē ana ki ēnei mea?

⁴ “Tōku rite kei te tangata e waiho ana hei kata mā tōna hoa, he tangata e karanga ana ki te Atua, ā, whakarongo mai ana tērā ki a ia; e waiho ana te mea tika, te mea tapatahi, hei kata.

⁵ Kei roto i te whakaaro o te tangata, e tau ana tāna noho, te whakahāwea ki te aituā; e tauwhanga ana tēnā ki te hunga e paheke ana te waewae.

⁶ Kei te rangatira ngā tēneti o ngā kaipāhua, ā, noho kore wehi ana te hunga e whakapātaritari ana ki te Atua; he ope noa mai hoki tā te Atua ki ō rātou ringa.

⁷ “Tēnā rā, ui atu ki ngā kararehe mā rātou koe e whakaako; ki ngā manu o te rangi, mā rātou e kōrero ki a koe;

⁸ kōrero atu rānei ki te whenua, ā, māna koe e whakaako; ka whakaaturia mai anō hoki ki a koe e ngā ika o te moana.

⁹ Ko wai i kore te mōhio ki ēnei mea katoa, he mea mahi tēnei nā te ringa o Ihowā?

¹⁰ Kei tōna ringa nei te wairua o ngā mea ora katoa, te manawa hoki o ngā kikokiko tāngata katoa.

¹¹ He teka ianei e whakamātauria ana ngā kupu e te taringa, pērā hoki i te waha e whakarongo nei ki te reka o tāna kai?

¹² Kei ngā kaumātua ngā whakaaro nui; kei te roa o ngā rā te mātau.

¹³ “Kei a ia te whakaaro nui me te kaha; kei a ia te tohutohu me te mātauranga.

¹⁴ Nanā, e wāwāhia ana e ia, kore iho e hangā anō; e kopia ana e ia te tangata, kāhore rawa he putanga.

¹⁵ Nanā, e unuhia atu ana e ia ngā wai, ā, kua maroke; e tukua mai ana anō e ia, ā, ka hurihia te whenua.

¹⁶ Kei a ia te kaha me te mahi tōtika; ko te tangata tinihanga, me te tangata e tinihangatia ana, nāna.

¹⁷ E kāhakina atu ana e ia ngā kaiwhakatakoto whakaaro, he mea pāhua; whakakūwaretia iho e ia ngā kaiwhakawā.

¹⁸ Ko te mana o ngā kīngi, wetekina ake e ia, herea iho e ia ō rātou hope ki te whītiki.

¹⁹ E ārahina atu ana e ia ngā tohunga, he mea pāhua, hurihia iho e ia te hunga kaha.

²⁰ Whakakorea ake e ia he kupu mā te hunga ngākau pono, riro ana i a ia ngā mahara o ngā kaumātua.

²¹ E ringihia ana e ia te whakahāwea ki runga ki ngā rangatira, e wetekina ana e ia te whītiki o te hunga kaha.

²² E hurahia mai ana e ia ngā mea hōhonu i roto i te pōuri, whakaputaina mai ana e ia te ātārangi o te mate ki te mārama.

²³ E whakanuia ana e ia ngā iwi, ā, e hunā ana e ia; e tohatohaina atu ana e ia ngā iwi, ā, e whakawhāititia mai ana anō rātou e ia.

²⁴ E tangohia atu ana e ia te ngākau o ngā rangatira o te iwi o te whenua, ā, e meinga ana e ia kia kōpikopiko noa i te wāhi ururua kāhore nei he ara.

²⁵ Whāwhā noa rātou i roto i te pōuri, kāhore hoki he mārama, ā, meinga ana rātou e ia kia hūrori haere ānō he tangata haurangi.”