Hopa 11 - Paipera Tapu 2012

Ka Tika te Whiunga i te Hē o Hopa

¹ Anō rā ko Topara Naamati, i mea ia:

² “Kaua rānei hei whakautua te tini o ngā kupu, ā, e whakatikaia rānei te tangata ngutu hohoro?

³ Mā āu kupu whakapehapeha rānei e nohopuku ai ngā tāngata, ā, ina tāwai koe, kaua rānei he tangata e mea i a koe kia whakamā?

⁴ E mea ana hoki koe, ‘He tino tika tāku whakaako, ā, he mā ahau ki ōu kanohi.’

⁵ Auē, me i kōrero te Atua, me i puaki mai ōna ngutu ki te whakahē i a koe!

⁶ Me i whakaaturia mai e ia ki a koe ngā mea ngaro o te mātauranga, te huhua o ngā ara o tāna mahi! Nā, kia mātau koe: he iti iho i ōu hē tā te Atua e tango nei i a koe.

⁷ “Ina whakatakina e koe, e kitea rānei e koe te Atua? E tino kitea rawatia rānei e koe te Kaha Rawa?

⁸ Kei te rangi te tiketike; ka pēhea koe? Hōhonu iho i te rēinga; ko te aha e mōhiotia e koe?

⁹ Ko tōna takoto, roa atu i te whenua, whānui atu i te moana.

¹⁰ “Ki te mea ka haukotia e ia, ka hereherea rānei, ka whakawākia rānei, mā wai ia e ārai?

¹¹ E mōhio ana hoki ia ki ngā tāngata teka noa; ā, e kite ana ia i te hē, ahakoa e kore e whakaaroa e ia.

¹² Otiia, ko te mea whakaarokore nei, ko te tangata kāhore rawa ōna hinengaro, āe rā, tō te tangata rite i tōna whānautanga kei te kūao kāihe mohoao.

¹³ “Ki te whakatikaia e koe tōu ngākau, ā, ka wherahia ōu ringa ki a ia;

¹⁴ ki te mea he hē kei tōu ringa, whakamataratia atu, kaua hoki te kino e noho ki ōu tapenākara.

¹⁵ He pono ko reira ara ai tōu mata, tē ai he ira; āe, ka ū hoki koe, tē ai he wehi.

¹⁶ Tērā hoki koe e wareware ki tōu māuiui; ā, e maharatia e koe ānō ko ngā wai kua rere atu.

¹⁷ Ā, ko tōu ora tērā e mārama kē atu i tō te poutūmārōtanga o te rā; ā, ahakoa e pōuri anō, ka rite ki te ata.

¹⁸ Ka tatū ōu whakaaro, nō te mea ka whai tūmanakohanga atu; āe, ka rapu koe i tētahi taha ōu, i tētahi taha, ā, ka takoto mārire koe.

¹⁹ E takoto iho anō koe, tē ai he kaiwhakawehi; he tokomaha anō hoki e whai kia paingia e koe.

²⁰ Ka poko ia ngā kanohi o te hunga kino, kore ake he rerenga mō rātou; ko tā rātou e tūmanako atu ai ko te hemonga.”