Hohua 15 - Paipera Tapu 2012

Te Rohe a Hūrā

¹ Nā, ko te rota o te iwi o ngā tama a Hūrā, he mea whakarite ki ō rātou hapū, i tae atu ki te rohe ki a Ēroma, ki te koraha o Hini rā anō whaka te tonga, ki te pito whakamutunga ki te tonga.

² Ko tō rātou rohe ki te tonga kei te pito rā anō o te Moana Tote, kei te matamata e anga ana whaka te tonga;

³ nā, ka rere whaka te tonga o te pīnakitanga o Akarapimi, ka haere atu ki Hini, ā, ka ahu whakarunga i te taha ki te tonga o Karehepārenea, nā, haere tonu, kei Heterono, ka anga ki runga, ki Arara, nā, ka whawhe kei Karakā.

⁴ Nā, haere tonu whaka Atamono, ā puta atu ki te awa o Īhipa; nā, ko ngā pākarutanga atu o tēnā rohe kei te moana. Ko te rohe tēnei ki a koutou ki te tonga.

⁵ Ā, ko te rohe ki te rāwhiti ko te Moana Tote tae noa ki te kōngutuawa o Horano. Ā, ko te rohe i te taha ki te raki i te kokoru o te moana i te kōngutuawa o Horano;

⁶ ā, ka haere te rohe ki runga, ki Petehokora, ā, haere tonu i te raki o Petearapa; ā, ka ahu te rohe ki runga, ki te kōhatu o Pohana tama a Reupena.

⁷ Nā, haere tonu te rohe ki runga, ki Repiri, atu i te raorao o Ākoro, nā, ka anga atu whaka te raki ki te ritenga o Kirikara, o te wāhi i mua mai o te pikitanga ki Arumine, ki tērā i te taha tonga o te awa; ā, i haere tonu te rohe mā ngā wai o Enehemehe, ā, ko ōna pākarutanga atu i Enerōkere;

⁸ ā, i rere whakarunga te rohe rā te raorao o te tama a Hinomo mā te taha o tō te Iepuhi whaka te tonga, (arā o Hiruhārama); ā, i haere tonu te rohe ki te tihi o te maunga e whakapae ana i mua o te raorao o Hinomo, whaka te hauāuru, ki tērā i te pito rawa o te raorao o Repaima, whaka te raki;

⁹ ā, i whakatakotoria atu te rohe i te tihi o te maunga ki te puna wai o Nepetoa, ā, i puta atu ki ngā pā o Maunga Eperona; ā, i whakatakotoria atu te rohe ki Paara, (arā ki Kiriata Tearimi).

¹⁰ Kātahi ka whawhe atu te rohe i Paara, whaka te hauāuru, ki Maunga Heira, ā, haere tonu atu ki te taha o Maunga Tearimi, (arā o Keharono), ki te taha ki te raki, ā, ka heke ki raro ki Petehemehe, ā, haere tonu atu ki Timina.

¹¹ Ā, i puta tonu atu te rohe ki te taha o Ekerono, whaka te raki; ā, i whakatakotoria atu te rohe ki Hikirono, ā, haere tonu atu ki Maunga Paara, ā, puta tonu atu ki Iapaneere; ā, pakaru rawa atu te rohe kei te moana.

¹² Ā, ko te rohe ki te hauāuru kei te Moana Nui me tōna pareparenga. Ko te rohe tēnei ki ngā tama a Hūrā ā tawhio noa, ki tēnei hapū, ki tēnei hapū o rātou.

Ka Raupatu a Karepe i a Heperona me Repiri

¹³ Ā, i hoatu e ia he wāhi ki a Karepe, ki te tama a Iepune i roto i ngā tama a Hūrā, he mea kī mai hoki nā Ihowā ki a Hohua, ko Kiriata Arapa, arā ko Heperona, (ko taua Arapa nei te pāpā o Anaka).

¹⁴ Nā, ka peia e Karepe i reira ngā tama tokotoru a Anaka, a Hehai, a Ahimana, a Tāramai, ngā tama a Anaka.

¹⁵ Nā, ka haere atu ia i reira ki runga, ki ngā tāngata o Repiri; nā, ko te ingoa o Repiri i mua ko Kiriata Hēpere.

¹⁶ Nā, ka mea a Karepe, “Ko te tangata e patua ai a Kiriata Hēpere, ā, ka horo i a ia, ka hoatu e ahau a Ākaha, tāku tamāhine hei wahine māna.”

¹⁷ Nā, ka horo i a Otoniere, i te tama a Kenaha, a te teina o Karepe; ā, hoatu ana e ia tāna tamāhine, a Ākaha hei wahine māna.

¹⁸ Ā, i a ia e haere atu ana ki a ia, ka whakakīkītia e ia te tāne kia tonoa he māra i tōna pāpā; ā, ka marere atu ia ki raro i te kāihe; nā, ka mea a Karepe ki a ia, “He aha tāu?”

¹⁹ Nā, ka mea ia, “Hōmai he manaaki ki ahau; i te mea kua whakanohoia ahau e koe ki te whenua i te tonga, hōmai anō hoki ētahi puna wai ki ahau.” Nā, hoatu ana e ia ki a ia ngā puna o runga me ngā puna o raro.

Ngā Pā o Hūrā

²⁰ Ko te wāhi tupu tēnei o te iwi o ngā tama a Hūrā, o ō rātou hapū:

²¹ Ā, ko ngā pā whakamutunga o te iwi o ngā tama a Hūrā, ki te taha ki Ēroma, whaka te tonga: Ko Kapateere, ko Ērere, ko Iakuru,

²² ko Kinaha, ko Rimona, ko Arara,

²³ ko Kerehe, ko Hatoro, ko Itinana,

²⁴ ko Tiwhi, ko Tereme, ko Pearoto,

²⁵ ko Hatoro, ko Harata, ko Kerioto, ko Heterono, (arā ko Hatoro),

²⁶ ko Āmama, ko Hema, ko Morara,

²⁷ ko Hatarakara, ko Hehemono, ko Peteperete,

²⁸ ko Hatarahuara, ko Peerehepa, ko Pitiotia,

²⁹ ko Paara, ko Īmi, ko Eteme,

³⁰ ko Eretorara, ko Kehiri, ko Horema,

³¹ ko Tikiraka, ko Māramana, ko Hanahana,

³² ko Repaoto, ko Hirihimi, ko Aina, ko Rimono: e rua tekau mā iwa ngā pā katoa me ngā kāinga o aua pā.

³³ O te mānia ko Ehetaoro, ko Torea, ko Ahena,

³⁴ ko Tanoa, ko Enekanimi, ko Tapua, ko Enama,

³⁵ ko Iaramuta, ko Aturama, ko Hokoho, ko Ateka,

³⁶ ko Haaraimi, ko Aritaimi, ko Kerera, ko Kererotaimi: kotahi tekau mā whā ngā pā me ngā kāinga o aua pā.

³⁷ Ko Tenana, ko Haraha, ko Mikirarakara,

³⁸ ko Rireana, ko Mihipe, ko Iokoteere,

³⁹ ko Rakihi, ko Pohokata, ko Ekerona,

⁴⁰ ko Kapono, ko Rahamama, ko Kitirihi,

⁴¹ ko Kereroto, ko Pēterakono ko Naama, ko Makera: kotahi tekau mā whā ngā pā me ngā kāinga o aua pā.

⁴² Ko Rīpina, ko Ētere, ko Ahana,

⁴³ ko Ipita, ko Ahena, ko Netipi,

⁴⁴ ko Keira, ko Akatipi, ko Mareha: e iwa ngā pā, me ngā kāinga o aua pā.

⁴⁵ Ko Ekerono me ōna pā ririki, me ōna kāinga;

⁴⁶ ko ngā pā katoa e tata ana ki Aharoro o Ekerono atu ā tae noa ki te moana, me ngā kāinga anō hoki o reira.

⁴⁷ Ko Aharoro me ōna pā ririki, me ōna kāinga; ko Kaha me ōna pā ririki, me ōna kāinga tae noa ki te awa o Īhipa; ki te Moana Nui anō hoki, me tōna pareparenga.

⁴⁸ Ā, o ngā maunga: ko Hāmiri, ko Iatiri, ko Hokoho,

⁴⁹ ko Ranaha, ko Kiriatahana, (arā ko Repiri),

⁵⁰ ko Ānapa, ko Ehetomo, ko Animi,

⁵¹ ko Kohena, ko Horono, ko Kiroho: kotahi tekau mā tahi ngā pā, me ngā kāinga o aua pā.

⁵² Ko Ārapa, ko Rumaha, ko Ēheana,

⁵³ ko Ianumu, ko Petetapua, ko Apeka,

⁵⁴ ko Humuta, ko Kiriata Arapa, (arā ko Heperona), ko Tioro: e iwa ngā pā, me ngā kāinga o aua pā.

⁵⁵ Ko Maono, ko Karamere, ko Tiwhi, ko Iutaha,

⁵⁶ ko Ietereere, ko Iokorēama, ko Tanoa,

⁵⁷ ko Kaini, ko Kipea, ko Timina: kotahi tekau ngā pā me ngā kāinga o aua pā.

⁵⁸ Ko Harahuru, ko Peteturu, ko Keroro,

⁵⁹ ko Maarata, ko Peteanoto, ko Eretekono: e ono ngā pā, me ngā kāinga o aua pā.

⁶⁰ Ko Kiriatapaara, (arā ko Kiriata Tearimi), ko Rapa: e rua ngā me ngā kāinga o aua pā.

⁶¹ O te koraha: ko Petearapa, ko Mirini, ko Hekaka,

⁶² ko Nipihana, me te Pā Tote, me Enekeri: e ono ngā pā, me ngā kāinga o aua pā.

⁶³ Ko ngā Iepuhi ia, ko ngā tāngata o Hiruhārama, kīhai rātou i taea te pei e ngā tama a Hūrā; heoi noho tahi ana ngā Iepuhi me ngā tama a Hūrā ki Hiruhārama ā taea noatia tēnei rā.