Hohua 12 - Paipera Tapu 2012

Ngā Kīngi i Patua e Mohi

¹ Nā, ko ngā kīngi ēnei o te whenua i patua nei e ngā tama a Īharaira, ā, tangohia ana tō rātou whenua i tāwāhi o Horano whaka te rāwhiti, atu i te awa o Aranona ā tae noa ki Maunga Heremona, me te mānia katoa anō hoki whaka te rāwhiti:

² Ko Hihona kīngi o ngā Amori, i noho rā ki Hehepona, ko tōna kīngitanga kei Aroere, kei tērā i te taha o te awaawa, o Aranona, kei te pā hoki i waenganui o te awaawa, kei te hāwhe hoki o Kireara ā tae noa ki Iapoko, ki te awa, ki te rohe ki ngā tama a Āmona;

³ kei te mānia hoki ā tae noa ki te moana o Kinerota, whaka te rāwhiti, ki te moana anō o te mānia, arā ki te Moana Tote, whaka te rāwhiti, ki te ara ki Peteiehimoto; kei Temana anō, kei raro i Aharoto Pihika;

⁴ me te wāhi o Oka kīngi o Pahana, o te mōrehu o ngā Repaima, i noho rā i Ahataroto, i Eterei,

⁵ ko tōna kīngitanga anō hoki kei Maunga Heremona, kei Hareka, kei Pahana katoa hoki, tae noa ki te rohe ki ngā Kehuri, ki ngā Maakati ki te hāwhe hoki o Kireara, ki te rohe ki a Hihona kīngi o Hehepona.

⁶ Nā Mohi, nā te pononga a Ihowā, nā rātou ko ngā tama a Īharaira rāua i patu; ā, hoatu ana e Mohi, e te pononga a Ihowā a reira hei kāinga tupu ki ngā Reupeni rātou ko ngā Kari, ko tētahi tānga hoki o te iwi o Mānahi.

Ngā Kīngi i Patua e Hohua

⁷ Ā, ko ngā kīngi ēnei o te whenua i patua e Hohua, e rātou ko ngā tama a Īharaira, ki tēnei taha o Horano whaka te hauāuru, atu i Paara-Kara i te raorao o Repanōna tae noa ki Maunga Haraka e anga nei whakarunga ki Heira; ā, nā Hohua i hoatu ki ngā iwi o Īharaira hei kāinga tupu, he mea whakarite ki ō rātou wehenga;

⁸ i ngā maunga, i ngā raorao, i te mānia, i ngā mātāpuna, i te koraha i te whenua ki te tonga; te Hiti, te Amori, te Kanaani, te Perihi, te Hiwi, te Iepuhi:

⁹ ko te kīngi o Heriko tētahi; ko te kīngi o Hai, o tērā i Pētēre tētahi;

¹⁰ ko te kīngi o Hiruhārama tētahi; ko te kīngi o Heperona tētahi;

¹¹ ko te kīngi o Iaramuta tētahi; ko te kīngi o Rakihi tētahi;

¹² ko te kīngi o Ekerona tētahi; ko te kīngi o Kētere tētahi;

¹³ ko te kīngi o Repiri tētahi; ko te kīngi o Kerere tētahi;

¹⁴ ko te kīngi o Horema tētahi; ko te kīngi o Arara tētahi;

¹⁵ ko te kīngi o Rīpina tētahi; ko te kīngi o Aturama tētahi;

¹⁶ ko te kīngi o Makera tētahi; ko te kīngi o Pētēre tētahi;

¹⁷ ko te kīngi o Tapua tētahi; ko te kīngi o Hēpere tētahi;

¹⁸ ko te kīngi o Apeke tētahi; ko te kīngi o Raharono tētahi;

¹⁹ ko te kīngi o Marono, tētahi; ko te kīngi o Hatoro tētahi;

²⁰ ko te kīngi o Himirono Merono tētahi; ko te kīngi o Akahapa tētahi;

²¹ ko te kīngi o Tānaka tētahi; ko te kīngi o Mekiro tētahi;

²² ko te kīngi o Kerehe tētahi; ko te kīngi o Iokonēama i Karamere tētahi;

²³ ko te kīngi o Roro i te pukepuke o Roro tētahi; ko te kīngi o ngā iwi o Kirikara tētahi;

²⁴ ko te kīngi o Tirita tētahi; e toru tekau mā tahi ēnā kīngi katoa.