Hōhea 9 - Paipera Tapu 2012

Te Whiunga mō te Hara o Īharaira

¹ Kei koa koe, e Īharaira! Kei whakamanamana, kei pērā me ērā atu iwi; kua whakarērea nā hoki e koe tōu Atua, kua pūremu. Arohaina ana e koe te utu i ngā wāhi katoa e patua ai te wīti.

² E kore rātou e whāngaia e te patunga wīti, e te poka wāina, ā, ka tinihanga tāna wāina hou.

³ E kore rātou e noho ki te whenua o Ihowā; engari ka hoki a Ēparaima ki Īhipa; ā, ka kai rātou i te mea poke ki Ahiria.

⁴ E kore e ringihia e rātou he ringihanga wāina ki a Ihowā, e kore anō aua mea e arongia e ia. Ko ā rātou patunga tapu ka pērā ki a rātou me te taro tangi tūpāpaku; ka poke katoa te hunga e kai ana. Ko tā rātou taro hoki hei mea mō tō rātou hiakai; e kore e tae ki roto ki te whare o Ihowā.

⁵ Ka pēhea koutou i te rā o te huihui nui, ā, i te rā o tā Ihowā hākari?

⁶ Nanā, kua riro rātou, kei ngaro, otiia ka kohikohia rātou e Īhipa, ka tanumia e Memepihi. Ko ā rātou mea āhuareka, hiriwa, ka riro i te ongaonga; ka tupu te tātarāmoa ki ō rātou tēneti.

⁷ Kua tae mai ngā rā o te tirotiro, kua tae mai ngā rā whakautu; ka mōhio a Īharaira, “He wairangi te poropiti, he haurangi te tangata i te wairua.” He nui hoki nō tōu kino, he nui nō te mauāhara.

⁸ He kaitūtei a Ēparaima, i tōku Atua ia; ko te poropiti, he māhanga ia nā te kaiāhere manu i ōna ara katoa, he mauāhara i roto i te whare o tōna Atua.

⁹ Kua heke tō rātou tupu, ā, aua noa iho ki raro, e rite ana ki ngā rā i Kipea. Ka mahara ia ki tō rātou hē, ka tirotirohia e ia ō rātou hara.

¹⁰ “I tōku tūtakina ki a Īharaira, i rite rātou ki te karepe i te koraha. I tōku kitenga i ō koutou mātua i rite rātou ki te mātāmua o te piki i te mea kātahi nei ka hua. Heoi, haere ana rātou ki a Paara-Peoro, nā, wehe ana rātou i a rātou ki taua hanga whakamā, mea ana kia whakarihariha rātou kia rite ki tā rātou i matenui ai.

¹¹ “Tēnā ko Ēparaima, ka rere ā-manu atu tō rātou korōria – kāhore he mea e whānau, kāhore he tamaiti i te kōpū, ā, kāhore he hapūtanga.

¹² Ahakoa whakatupu noa rātou i ā rātou tamariki, ka kore i ahau, ā, kore iho he tangata e mahue. Inā, auē te mate mō rātou ua mahue rātou i ahau!

¹³ Ko Ēparaima, rite tonu ki tōku kitenga i Tāira, he mea whakatō ki te wāhi pai. Otiia, ka kawea āna tama e Ēparaima ki waho, ki te kaikōhuru.”

¹⁴ Hoatu ki a rātou, e Ihowā – ko te aha e hoatu e koe ki a rātou? Hoatu ki a rātou he kōpū whakatahe, he ū maroke.

¹⁵ “Kei Kirikara tō rātou kino katoa; ā, kino iho ahau ki a rātou ki reira. Ka hē nei ā rātou mahi, ka peia rātou e ahau i roto i tōku whare. Heoi anō ōku aroha ki a rātou; he hunga whakakeke ō rātou rangatira katoa.

¹⁶ “Kua patua a Ēparaima, kua maroke tō rātou pakiaka, kore ake ō rātou hua. Āe rā, ahakoa whānau noa rātou, ka mate anō i ahau te mea e matenuitia ana, te hua o tō rātou kōpū.”

¹⁷ Ka paopao tōku Atua ki a rātou, mō rātou kīhai i rongo ki a ia; ā, ka waiho rātou hei kōpikopiko i roto i ngā tauiwi.