Hōhea 8 - Paipera Tapu 2012

Ka Whakahētia e Ihowā a Īharaira mō te Whakapakoko

¹ “Meinga te tētere ki tōu māngai! Ka rite ia ki te ēkara, ina whakaekea e ia te whare o Ihowā; mō rātou i whakataka i tāku kawenata, i takahi i tāku, ture.

² Tērā rātou e karanga ki ahau, ‘E tōku Atua, e mōhio ana mātou, a Īharaira, ki a koe!’

³ Kua ākiritia e Īharaira te mea pai; ka whāia ia e te hoariri.

⁴ “Ko tā rātou whakarite kīngi ehara i te mea nāku, ko tā rātou whakarite rangatira ehara i te mea i mōhiotia e ahau. Kua hangā e rātou tā rātou hiriwa, ko tā rātou kōura hei whakapakoko mā rātou, he mea e hātepea ai rātou.

⁵ Kua ākiritia e ia tāu kūao kau, e Hamaria. Kua mura tōku riri ki a rātou. Kia pēhea ake te roa ka tae ai rātou ki te harakore?

⁶ Nā Īharaira nei hoki taua kūao nā, he mea hanga nā te kaimahi; nā ehara ia i te Atua. Āe rā, ka pakaru rikiriki te kūao o Hamaria.

⁷ “Nā, ko tā rātou i whakatō ai ko te hau, ko tā rātou e kokoti ai ko te paroro. Kāhore ōna wīti e tupu ana; e kore te kōpuku e whai parāoa. Ki te whai parāoa, ka horomia e ngā tautāngata.

⁸ “Kua horomia a Īharaira; kua rite rātou ināianei i roto i ngā tauiwi ki te oko kīhai i manakohia.

⁹ Kua riro hoki rātou ki Ahiria, anō he kāihe mohoao, he moke, ko ia anake; kua utua e Ēparaima ētahi hei whaiāipo.

¹⁰ Āe rā, ahakoa utu noa rātou i roto i ngā iwi, ka kohikohia anō rātou e ahau āianei; ā, ka tīmata rātou te iti haere, i te pīkaunga a te kīngi o ngā rangatira.

¹¹ “Kua maha nei ngā āta a Ēparaima hei mea hara, nā, ka waiho ngā āta hei hara mōna.

¹² Ahakoa tuhituhia e ahau māna tāku ture kia tekau mano ngā tikanga, kei te kīia aua mea he mea rerekē.

¹³ Nā, ko ngā patunga tapu hei whakahere ki ahau, e patu kikokiko ana rātou, kainga iho; otiia kāhore e manakohia ana e Ihowā. Ākuanei ia mahara ai ki tō rātou hē, whiu ai i ō rātou hara; ka hoki rātou ki Īhipa.

¹⁴ “Kua wareware hoki a Īharaira ki tōna kaihanga, ā, kei te hanga temepara; kua meinga e Hūrā kia maha ngā pā taiepa; otiia ka tukua atu e ahau he ahi ki runga ki ōna pā, ā, ka kainga e tērā ōna whare kīngi.”