Hōhea 7 - Paipera Tapu 2012

¹ “I ahau e mea ana ki te rongoā i a Īharaira, ka kitea te hē o Ēparaima, te kino hoki o Hamaria. Nō te mea e mahi ana rātou i te teka, e tomo ana hoki te tāhae ki roto, e pāhua ana te taua i waho.

² Ā, kāhore ā rātou meatanga ake i roto i ō rātou ngākau, kei te mahara tēnei ahau ki tō rātou kino katoa. Kua karapotia rātou ināianei e ā rātou mahi; tēnei anō kei tōku aroaro.

³ “Ka meinga e rātou te kīngi kia koa ki tā rātou kino, ngā rangatira hoki ki ā rātou teka.

⁴ He hunga pūremu katoa rātou; ko tō rātou rite kei te oumu kua oti te tahu e te kaipokepoke. Ka mutu tāna tūtaki i te ahi, i muri iho i te pokepokenga i te parāoa ā kia rēwenatia rā anō.

⁵ I te rā o tō tātou kīngi i mate ngā rangatira i a rātou anō, nā te tahu a te wāina; ko tōna ringa mārō tonu i roto i te hunga taunu.

⁶ Ānō he oumu ō rātou ngākau, i a rātou e whakatata ana, e whanga ana. Pau ake te pō i tā rātou kaipokepoke e moe ana; i te ata kā tonu taua oumu, ānō he mura ahi.

⁷ Werawera katoa rātou me he oumu, pau ake i a rātou ō rātou kaiwhakawā. Kua hinga katoa ō rātou kīngi; kāhore tētahi o rātou e karanga ana ki ahau.

⁸ “Ko Ēparaima, kei te hanumi ia ki roto ki ngā iwi; he keke a Ēparaima kīhai i hurihia.

⁹ Kua pau tōna kaha i ngā tautāngata, heoi kāhore ia e mōhio; inā, kua wero te hina i konei, i ko ōna, ā, kāhore ia e mōhio.

¹⁰ Ko te whakapehapeha o Īharaira e whakaatu ana ki tōna aroaro. Heoi, kīhai rātou i hoki ki a Ihowā, ki tō rātou Atua, ā, ahakoa ko tēnei katoa, kāhore rātou i rapu i a ia.”

E Kore te Āwhina mai ngā Tauiwi

¹¹ “E rite ana hoki a Ēparaima ki te kūkupa wairangi, kāhore nei ōna ngākau; e karanga ana rātou ki Īhipa, e haere ana rātou ki Ahiria.

¹² Ka haere rātou, ka pōtaea e ahau tāku kupenga ki runga ki a rātou; ka riro rātou i ahau ki raro, ka pērā i ngā manu o te rangi; ka whiua rātou e ahau, ka pērātia me tā ō rātou whakaminenga i rongo ai.

¹³ Auē te mate mō rātou, kua rere atu nei hoki rātou i ahau! Ko te ngaromanga mō rātou, mō tā rātou takahi i tāku i hokona anō rātou e ahau, heoi kei te kōrero rātou i ngā kupu teka mōku.

¹⁴ “Kāhore hoki rātou i karanga ki ahau, he mea nā ō rātou ngākau, engari e auē ana rātou i runga i ō rātou moenga; e huihui ana rātou, he whakaaro ki te wīti, ki te wāina, ā, e whakakeke ana rātou ki ahau.

¹⁵ Ako noa ahau, whakakaha noa i ō rātou ringa, heoi kino tonu tō rātou whakaaro mōku.

¹⁶ E hoki ana rātou, ehara ia i te mea ki a ia i runga rawa; ko tō rātou rite kei te kōpere tinihanga. Ka hinga ō rātou rangatira i te hoari, he āritarita hoki nō tō rātou arero. Hei mea tēnei e kataina ai rātou ki te whenua o Īhipa.”