Hōhea 6 - Paipera Tapu 2012

Te Rīpenetānga Kōpūrau a te Iwi

¹ “Haere mai, tātou ka hoki ki a Ihowā: nāna hoki i haehae, ā, māna tātou e rongoā; nāna i patu, māna anō tātou e takai.

² Kia rua ngā rā ka whakaorangia tātou e ia; i te toru o ngā rā ka whakaarahia tātou e ia, ā, ka ora tātou ki tōna aroaro.

³ Nā, kia mōhio tātou, kia whai atu tātou kia mōhio ai ki a Ihowā; ko tōna putanga tūturu tonu, koia anō kei tō te ata, ko tōna taenga mai ki a tātou rite tonu ki tō te ua, ka rite ki tō muri ua e mākūkū ai te whenua.”

⁴ “Me pēhea koe e ahau, e Ēparaima? Me pēhea koe e ahau, e Hūrā? Rite tonu hoki tō koutou pai ki te kapua o te ata, ki te tōmairangi o te atatū, e riro wawe atu ana.

⁵ Nā reira tāku hahau i a rātou ki ngā poropiti; tukitukia ana rātou e ahau ki ngā kupu a tōku māngai; rite tonu anō āu whakaritenga ki te putanga ake o te mārama.

⁶ Ko tāku hoki i pai ai ko te tohu tangata, hāunga te patunga tapu. Ko te mātau ki te Atua, pai ake i ngā tahunga tinana.

⁷ “Otiia, kua pērā tā rātou i tā Ārama, kua whakatakā e rātou te kawenata; kua tinihanga rātou ki ahau i reira.

⁸ He pā a Kireara nō ngā kaimahi i te hē, poke tonu i te toto.

⁹ Rite tonu hoki ki tā ngā taua pāhua e whanga ana ki te tangata, tā te rōpū o ngā tohunga, kōhuru i te ara ki Hekeme; āe rā, kua mahi rātou i te hē.

¹⁰ He hanga whakawehi tāku i kite ai ki te whare o Īharaira; he pūremu e kitea ana ki Ēparaima, kua poke a Īharaira.

¹¹ “Kua rite hoki he kotinga māu, e Hūrā. “Ina whakahokia mai e ahau tāku iwi i te whakarau.”