Hōhea 4 - Paipera Tapu 2012

Te Take a Ihowā ki a Īharaira

¹ Whakarongo ki te kupu a Ihowā, e ngā tama a Īharaira; he tautohe hoki tā Ihowā ki ngā tāngata o te whenua. “Nō te mea kāhore he pono, kāhore he tohu tangata, kāhore he mātauranga ki te Atua i te whenua.

² Te oati, te kōrero teka, te kōhuru, te tāhae, te pūremu, pakaru mai ana rātou; te toto, pā tonu ki te toto.

³ Mō reira te whenua ka pōuri, ko ōna tāngata katoa ka tangi, me ngā kīrehe o te pārae, me ngā manu o te rangi; ka whakakorea anō ngā ika o te moana.

⁴ “Kaua ia te tangata e whakawā, e whakahē i tētahi tangata: e rite ana hoki tōu iwi ki te hunga e totohe ana ki te tohunga.

⁵ Nā, ka hinga koe i te awatea, me te poropiti, ka hinga ngātahi kōrua i te pō; ka whakangaromia anō hoki e ahau tōu whaea.

⁶ Ka ngaro tāku iwi i te kore mātauranga; kua paopao nā koe ki te mātauranga, nā, ka paopao anō ahau ki a koe hei tohunga māku. Kua wareware nā koe ki te ture a tōu Atua, ka wareware anō ahau ki āu tamariki.

⁷ “I te mea ka nui rātou, kātahi rātou ka hara ki ahau; whakaputaina kētia ana e ahau tō rātou korōria hei whakamā.

⁸ Ko te hara o tāku iwi kainga ake e rātou, ko tō rātou ngākau anga tonu ki tō rātou hē.

⁹ “Ko te tukunga iho: rite iwi, rite tohunga; ā, ka whiua rātou e ahau mō ō rātou ara, ka utua ā rātou mahi.

¹⁰ Ka kai hoki rātou, ā, e kore e mākona; ka moepuku, ā, e kore e tokomaha; mō tā rātou whakarere i ngā mahara ki a Ihowā.

¹¹ Riro pū te hinengaro i te moepuku, i te wāina, i te wāina hou.”

Ka Whakahētia e Ihowā te Koropiko ki ngā Atua Kē

¹² “E ui tikanga ana tāku iwi ki ā rātou rākau, ko tō rātou tokotoko anō hoki hei whakaatu tikanga ki a rātou. Kua pōhēhē hoki rātou i te wairua o te moepuku, kua maunu atu i raro i tō rātou Atua ki te pūremu.

¹³ E patu ana rātou i ngā patunga tapu i runga i ngā tihi o ngā maunga, e tahu whakakakara ana i runga i ngā pukepuke, i raro i ngā oki, i ngā pāpara, i ngā terepini, he pai hoki nō te taumarumarunga iho. Mō reira ka moepuku ā koutou tamāhine, ka pūremu ā koutou wāhine.

¹⁴ “E kore ahau e whiu i ā koutou tamāhine ina moepuku, i ā koutou wāhine ina pūremu; ko ngā tāne nei hoki he mea wehe atu ki ngā wāhine moepuku, ko rātou tahi ko ngā wāhine kairau kei te mea patunga tapu. Mō reira ka hinga te iwi kāhore nei ō rātou mātauranga.

¹⁵ “Ahakoa koe, e Īharaira, kairau noa, kaua a Hūrā e hē; ā, kaua hoki koutou e haere mai ki Kirikara, kaua hoki e haere ki runga ki Peteawene, ā, kaua e oati, ‘Kei te ora a Ihowā.’

¹⁶ Kua whakangutungutu hoki a Īharaira, tōna rite kei te kūao kau e whakatotoi ana; ākuanei rātou whāngaia ai e Ihowā, pērātia ai me te reme i te wāhi whānui.

¹⁷ “Kua honoa a Ēparaima ki ngā whakapakoko – tukua atu ki tāna.

¹⁸ Ko te mea e inumia ana e rātou kua kawa; he moepuku tonu tā rātou; ā, he whakamā tā ō rātou rangatira e matenui ana.

¹⁹ Kua oti ia te kōpaki e te hau ki roto ki ōna parirau; ka whakamā hoki rātou ki ā rātou patunga tapu.”