Hōhea 2 - Paipera Tapu 2012

¹ “Mea atu koutou ki ō koutou tuākana, ‘Ami,’ ki ō koutou tuāhine, ‘Ruhama.’ ”

Te Pūremu a Koma – Te Pūremu a Īharaira

² “Whakawākia tō koutou whaea, whakawākia, ehara hoki ia i te wahine nāku, ehara anō ahau i te tahu nāna. Nā, kia whakarērea e ia ōna moepuku i tōna aroaro, ōna pūremu i waenga ōna ū.

³ Kei tangohia ōna e ahau, ā, ka noho tahanga ia, kei meinga anō ia kia rite ki te rā i whānau ai ia; kei meinga ia e ahau kia rite ki te koraha, kei waiho ia hei whenua waikore, ā, ka mate i te matewai.

⁴ Āe rā, e kore āna tamariki e tohungia e ahau; nō te mea he tamariki rātou nā te moepuku.

⁵ Kua kairau nei hoki tō rātou whaea; he mahi whakamā tā te wahine i whānau ai rātou. I mea hoki ia, ‘Ka whāia e ahau te hunga i aroha ki ahau, i hōmai nei i te taro māku, i te wai mōku, i te huruhuru hipi māku, i te muka māku, i te hinu māku, i te mea hei inu māku.’

⁶ “Mō reira tēnei ahau te tūtaki nei i tōu ara ki te tātarāmoa, te hanga nei i te taiepa e kore ai ia e kite i ōna ara.

⁷ Ka whāia anō e ia āna i aroha ai, heoi, e kore e mau i a ia; ka rapua rātou e ia, otiia e kore e kitea. Kātahi ia ka mea ake, ‘Ka haere ahau ka hoki ki tāku tahu tuatahi; nui ake hoki tō reira pai ki ahau i tō nāianei.’

⁸ Kīhai rā hoki ia i mōhio nāku i hoatu te wīti ki a ia, te wāina, me te hinu, nāku anō i whakanui te hiriwa māna, me te kōura, tā rātou i mahi nei hei mea mā Paara.

⁹ “Mō reira ka hoki ahau, ka tango i tāku wīti i tōna wā anō, i tāku wāina i tōna wā anō, ka riro anō i ahau tāku huruhuru hipi me tāku muka i hīpokina ai ia i a ia e noho tahanga ana.

¹⁰ Nā, ākuanei ka whakakitea e ahau tāna mahi wairangi ki ngā kanohi o āna i aroha ai, e kore anō tētahi tangata e whakaora i a ia i roto i tōku ringa.

¹¹ Ka mutu katoa anō i ahau tōna koa, ōna rā hākari, ōna kōwhititanga marama, ōna hāpati, me āna huihui nunui katoa.

¹² Ka ururua anō i ahau āna wāina, me āna piki, ngā mea i kī ai ia, ‘Ko ōku utu ēnei, he mea hōmai nā āku i aroha ai.’ Ā, ka meinga e ahau hei ngahere, ā, ka kainga e ngā kīrehe o te pārae.

¹³ Ka whiua anō ia e ahau mō ngā rā o ngā Paarimi, mō ērā i tahu whakakakara ai ia ki a rātou; ā, whakapaipai ana i a ia ki ōna whakakai, ki āna whakapaipai, haere ana ki te whai i āna i aroha ai, ā, wareware ake ki ahau,” e ai tā Ihowā.

¹⁴ “Mō reira, nanā, ka whakawai ahau i a ia, ka kawe i a ia ki te koraha, ka kōrero whakamārie anō ki a ia.

¹⁵ Ka hoatu anō e ahau ētahi māra wāina ki a ia i reira, me te raorao o Ākoro hei kūwaha mō te tūmanako. Ā, ka whakahoki kupu ia ki reira, ka pērā me tō ngā rā o tōna tamarikitanga, me tō te rā hoki i haere mai ai ia i te whenua o Īhipa.

¹⁶ “Nā, i taua rā,” e ai tā Ihowā, “ka karangatia ahau e koe, ‘E Ihi,’ e kore hoki ahau e karangatia e koe, ‘E Paari,’ ā muri ake nei.

¹⁷ Nō te mea ka tangohia e ahau ngā ingoa o ngā Paarimi i roto i tōna māngai, e kore anō rātou, ō rātou ingoa, e maharatia ā muri ake nei.

¹⁸ Ka whakaritea anō e ahau i taua rā he kawenata, he pai mō rātou, ki ngā kīrehe o te pārae, ki ngā manu o te rangi, ki ngā mea ngōkingōki o te oneone. Ka whati anō i ahau te kōpere, te hoari, te whawhai i runga i te whenua, ā, ka meinga rātou e ahau kia au te takoto.

¹⁹ Ka taumautia anō koe e ahau ā ake ake; inā, ka taumautia koe e ahau māku i runga i te tika, i te whakarite whakawā, i te aroha, i te atawhai.

²⁰ Ka taumautia anō koe māku i runga i te pono, ā, ka mōhio koe ki a Ihowā.

²¹ “I taua rā ka whakarongo ahau,” e ai tā Ihowā, “ka whakarongo ahau ki ngā rangi, ka whakarongo rātou ki te whenua.

²² Ka whakarongo anō te whenua ki te wīti, ki te wāina, ki te hinu; ā, ka whakarongo ērā ki a Ietereere;

²³ ka whakatō anō ahau i a ia māku ki te whenua. Ka tohu i tēnei kīhai nei i tohungia, ka kī atu anō ki te hunga ehara nei i te iwi nāku, ‘ko koe tāku iwi,’ ā, ka mea ērā, ‘Ko koe tōku Atua.’ ”