Hōhea 12 - Paipera Tapu 2012

¹ Ko tā Ēparaima kai ko te hau, e whāia ana ia te hau marangai; i ngā rā katoa e whakanuia ana e ia te teka me te whakangaro; e whakarite kawenata ana rātou ki te Ahiriana, ā, e kawea ana he hinu ki Īhipa.

Ka Whakawātia a Īharaira me Hūrā

² Nā, he whakawā tā Ihowā ki a Hūrā, ka utaina anō e ia ki runga ki a Hākopa ngā mea rite ki ōna ara; ka rite ki āna mahi tāna utu ki a ia.

³ I roto i te kōpū i hopukia e ia tōna tuakana ki te rekereke; ā, i a ia ka tangata i kaha ia ki te Atua.

⁴ Āe rā, i kaha ia ki te anahera, ā, taea ana e ia; i tangi ia, i īnoi ki a ia. I tūtaki ia ki a ia ki Pētēre; ā, kōrero ana ia ki a tātou i reira.

⁵ Arā a Ihowā, te Atua o ngā mano; ko Ihowā tōna maharatanga.

⁶ Nā reira tahuri koe ki tōu Atua; puritia te mahi tohu me te tika, tatari tonu ki tōu Atua.

⁷ He kaihokohoko ia, kei tōna ringa ngā pāuna tinihanga; e aroha ana ia ki te tūkino.

⁸ I mea anō a Ēparaima, “He pono kua whai taonga ahau, kua kitea e ahau he rawa mōku. I āku mahi katoa e kore e kitea e rātou he kino, arā he hara ki ahau.”

⁹ “Nā, ko Ihowā ahau, ko tōu Atua, nō te whenua o Īhipa mai rā anō; tēnei ake ka meinga anō koe e ahau kia noho tēneti; kia pērā me tō ngā rā o te hākari nui.

¹⁰ Kua kōrero anō ahau ki ngā poropiti, ā, kua whakamahangia e ahau ngā whakakitenga; nā te mahi minita a ngā poropiti i kōrero ai ahau i ngā kupu whakarite.”

¹¹ Ko te hara rānei a Kireara? Inā, he mea teka kau rātou; e patu kau ana rātou ki Kirikara hei whakahere. Āe rā, he rite ā rātou āta ki ngā pūranga i ngā moa o ngā māra.

¹² I rere anō a Hākopa ki te māra a Arame, ā, mahi ana a Īharaira hei utu wahine; hei utu wahine i tiaki hipi ai ia.

¹³ I kawea mai anō e Ihowā, arā e te poropiti, a Īharaira i Īhipa, nā te poropiti anō ia i ora ai.

¹⁴ I whakapātaritari a Ēparaima ki a ia, kawa rawa; mō reira ka waiho e ia tōna toto i runga i a ia, ka meinga anō tōna ingoa kino e tōna Ariki kia hoki atu ki a ia.