Hōhea 11 - Paipera Tapu 2012

Te Aroha o te Atua ki Tāna Iwi Whakakeke

¹ “I a Īharaira e tamariki ana i aroha ahau ki a ia i reira, ā, karangatia ana e ahau tāku tama i Īhipa.

² E karanga ana rātou i a rātou, e haere kē atu ana i a rātou. I patu whakahere rātou ki ngā Paarimi, i tahu whakakakara anō ki ngā whakapakoko.

³ “Otiia nāku a Ēparaima i ako ki te haere; i hikitia rātou e ahau ki runga ki ōku ringa; heoi, kīhai rātou i mōhio e rongoā ana ahau i a rātou.

⁴ He taura tangata āku ki te kukume i a rātou, he here aroha. Ko tāku hoki ki a rātou ko tā te hunga e tango ana i te ioka i ō rātou kauae; i hoatu anō e ahau he kai ki mua i a rātou.

⁵ “E kore ia e hoki atu ki te whenua o Īhipa; engari ko te Ahiriana hei kīngi mōna, mō rātou kīhai i pai ki te hoki.

⁶ Ka hāua iho te hoari ki runga ki ōna pā, whakamōtī ai i ōna tūtaki ā pau ake; nā ō rātou whakaaro hoki.

⁷ Ā, kei te tohe tāku iwi ki te tahuri kē i ahau; ahakoa karangatia rātou ki te mea i Runga Rawa, kāhore tētahi o rātou e whakanui i a ia.

⁸ “Me pēhea koe ka hoatu whakarere ai e ahau, e Ēparaima? Me pēhea ka tukua ai koe e ahau, e Īharaira? Me pēhea ka meinga ai koe e ahau kia rite ki Arema? Me pēhea ka waiho ai koe kia rite ki Tepoimi? Kua puta kē tōku ngākau i roto i ahau, ngiha tahi anō ōku kōnohinohitanga.

⁹ E kore tōku riri e mura nei e puta, e kore ahau e hoki ki te whakangaro i a Ēparaima. Ko te Atua hoki ahau, ehara i te tangata, ko te Mea Tapu i waenganui i a koe; kore anō ahau e tomo ki te pā.

¹⁰ “Ka whāia e rātou a Ihowā, ā, ka hāmama ia ānō he raiona. Ka hāmama hoki ia, ā, ka haere wiri mai ngā tamariki i te hauāuru.

¹¹ Ka rere wiri mai rātou i Īhipa ānō he manu, i te whenua o Ahiria ānō he kūkupa; ka whakanohoia anō hoki rātou e ahau ki ō rātou whare,” e ai tā Ihowā.

¹² Kua oti ahau te karapoti e Ēparaima ki te teka, e te whare o Īharaira ki te tinihanga. Engari, a Hūrā kei runga i tā te Atua tāna tikanga; kei te Mea Tapu ia, pono tonu.