Hōhea 10 - Paipera Tapu 2012

Te Hara me te Herehere o Īharaira

¹ He wāina tupu wana a Īharaira, e whakaputa ana i ōna hua. Kua meinga e ia kia maha āna āta kia rite ki te maha o ōna hua; kua hangā e rātou he whakapakoko whakapaipai rite tonu ki te pai o tōna whenua.

² Kua wehe rua ō rātou ngākau, ākuanei ka kitea tō rātou hē; ka wāhia e ia ā rātou āta, ka pāhuatia ā rātou whakapakoko.

³ He pono ākuanei rātou kī ai, “Kāhore ō tātou kīngi; kāhore hoki tātou i te wehi ki a Ihowā, ā, ko te kīngi – ko te aha tāna mō tātou?”

⁴ E kōrero ana rātou i ngā kōrero horihori, e oati teka ana i te mea e whakarite whakawā ana; nā reira e rite ana te tupu o te whakawā ki tō te hemoreke i ngā moa o te māra.

⁵ Mānukanuka tonu ngā tāngata o Hamaria ki ngā kūao kau o Peteawene. Ka tangihia hoki e tōna iwi, e ōna tohunga i whakamanamana nei ki a ia; mō tōna korōria kua memeha atu nei i reira.

⁶ Ka kawea anō hoki taua kūao ki Ahiria hei hākari ki a Kīngi Iarepe. Ka pā te whakamā ki a Ēparaima, ka whakamā anō a Īharaira ki tāna whakaaro i whakatakoto ai.

⁷ Nā, ko Hamaria, kua kore tōna kīngi, ānō he pāhuka i runga i te wai.

⁸ Ka whakakāhoretia anō ngā wāhi tiketike o Āwene, te hara o Īharaira. Ka puta ake te tātarāmoa me te tūmatakuru ki runga ki ā rātou āta, ā, ka mea rātou ki ngā maunga, “Taupokina mātou,” ki ngā pukepuke, “E hinga ki runga ki a mātou.”

⁹ “E Īharaira, he hara tōu, mai anō i ngā rā i Kipea; tū ana rātou i reira. Kia kore ai rātou e mau ki Kipea i te whawhai ki ngā tama a te kino.

¹⁰ Kia hiahia ahau, ka whiua rātou e ahau; ka huihui anō ngā iwi ki te whawhai ki a rātou, i a rātou ka herea nei ki ō rātou hē e rua.

¹¹ “He kūao kau anō a Ēparaima kua oti te whakaako, pai tonu ia ki te takahi wīti; kua tika atu ia ahau i runga i tōna kakī pai. Ka meinga e ahau he kaieke mō Ēparaima; ko Hūrā ki te parau, ko Hākopa ki te wāwāhi i āna pōkuru.

¹² Whakatōkia tā koutou i runga i te tika, tapahia i runga i te mahi tohu; mahia tā koutou pātohe. Ko te wā hoki tēnei e rapua ai a Ihowā, kia tae mai rā anō ia, kia ringihia rā anō e ia te tika ki runga ki a koutou.

¹³ “Ko tā koutou i parau ai ko te kino, ko tā koutou i kokoti ai ko te hē; ko tā koutou kai ko ngā hua o te teka. Nāu hoki i whakawhirinaki ki tōu ara, ki te tini o ōu tāngata mārohirohi;

¹⁴ mō reira ka ara he ngangau i roto i ōu iwi, ā, ka pāhuatia ōu pā taiepa katoa, ka rite ki tā Haramana pāhuatanga i Petearapere i te rā o te whawhai; ko te whaea, tāia iho rātou ko ngā tamariki, mongamonga ana.

¹⁵ Ko tā Pētēre tēnei e mea ai ki a koutou, he nui nō tō koutou kino. Ka whakangaromia rawatia te kīngi o Īharaira i te atatū.”