Hoera 3 - Paipera Tapu 2012

Ka Whakawātia e te Atua ngā Iwi Katoa

¹ “Nō te mea, nanā, i aua rā, i taua wā e whakahokia ai e ahau a Hūrā rāua ko Hiruhārama i te whakarau,

² ka huihuia e ahau ngā iwi katoa, ka kawea ki raro ki te raorao o Iehohāpata; ā, ka tohe ahau ki a rātou ki reira mō tāku iwi, mō tōku kāinga tupu, mō Īharaira i whakamararatia nei e rātou ki roto ki ngā iwi, ā, wāwāhia ana e rātou tōku whenua.

³ Ā, kua maka rota rātou mō tāku iwi; ā, kua hoatu e rātou te tama hei utu mō te wahine kairau, ā, kua hokona e rātou he kōtiro ki te wāina, hei inu mā rātou.

⁴ “Āe rā, he aha koutou ki ahau, e Tāira, e Hairona, e ngā rohe katoa o Pirihitia? E hōmai rānei e koutou he utu ki ahau? Nā, ki te hōmai e koutou, he utu ki ahau, hohoro tonu, kakama tonu tāku whakahoki i te utu ki runga ki tō koutou māhunga.

⁵ Mō koutou i tango i tāku hiriwa, i tāku kōura, ā, kawea ana e koutou āku mea pai e matenuitia ana ki roto ki ō koutou temepara.

⁶ Ā, hokona ana e koutou ngā tama a Hūrā, ngā tama o Hiruhārama, ki ngā tama a ngā Kariki, kia matara atu ai rātou i tō rātou rohe.

⁷ “Nanā, ka ara mai rātou i ahau i te wāhi i hokona atu ai rātou e koutou, ka meinga anō e ahau kia hoki tō koutou utu ki runga ki ō koutou māhunga.

⁸ Ka hokona anō e ahau ā koutou tama, ā koutou tamāhine, ki te ringa o ngā tama a Hūrā, ā, mā rātou e hoko ki ngā tāngata o Hēpā, ki te iwi i tawhiti.” Nā Ihowā hoki te kupu.

Te Whakawātanga i te Raorao o Iehohāpata

⁹ Karangatia tēnei e koutou i roto i ngā tauiwi: Kia rite ngā mea mō te whawhai, whakaohokia ngā mārohirohi, kia whakatata mai ngā tāngata whawhai katoa, kia haere mai rātou.

¹⁰ Patupatua ā koutou hea parau hei hoari, ā koutou toronaihi hei tao; me kī ake te ngoikore, “He kaha ahau.”

¹¹ Kia hohoro, ka haere mai, e ngā tauiwi katoa tawhio noa, ka huihui i a koutou. Meinga kia heke iho āu mārohirohi ki reira, e Ihowā.

¹² “Kia whakaohokia ngā tauiwi, kia haere hoki rātou ki te raorao o Iehohāpata. Ka noho hoki ahau ki reira ki te whakawā mō ngā tauiwi katoa ā taka noa.

¹³ Kuhua te toronaihi ki roto, kua pakari hoki te wīti. Haere mai, takahia; kua kī hoki te poka wāina, pūrena tonu ngā waka wāina; he nui hoki tō rātou kino.”

¹⁴ He tini, he tini whāioio kei te raorao whakaoti tikanga! Kua tata nei hoki te rā o Ihowā i te raorao whakaoti tikanga.

¹⁵ Ka pōuri te rā me te marama, ka kore anō te titi o ngā whetū.

¹⁶ Ā, ka hāmama a Ihowā i Hiona, ka puaki tōna reo i Hiruhārama; ā, ka wiri ngā rangi me te whenua; otirā ko Ihowā he piringa mō tōna iwi, he pā kaha mō ngā tama a Īharaira.

Ka Manaakitia e Ihowā Tāna Iwi

¹⁷ “Ā, ka mōhio koutou ko Ihowā ahau, ko tō koutou Atua e noho nei i Hiona, i tōku maunga tapu: kātahi a Hiruhārama ka tapu, ā, heoi anō hāereerenga o ngā tautāngata i reira.

¹⁸ “I taua rā ka māturuturu iho te wāina hou o ngā maunga, ka rerengia ngā pukepuke e te waiū, ka rere ngā wai o ngā awa katoa o Hūrā; ā, ka pupū mai he puna i roto i te whare o Ihowā, hei whakamākūkū i te raorao o Hitimi.

¹⁹ Hei ururua a Īhipa, hei koraha a Ēroma, ururua rawa, mō te mahi tutū ki ngā tama a Hūrā, mō tā rātou whakaheke i te toto harakore ki tō rātou whenua.

²⁰ Ka noho tonu ia a Hūrā ake ake, a Hiruhārama, a tērā whakatupuranga, tērā whakatupuranga.

²¹ Ka mā anō i ahau tō rātou toto kīhai i mā i ahau; e noho ana hoki a Ihowā ki Hiona.”