Hoera 2 - Paipera Tapu 2012

¹ Whakatangihia te tētere ki Hiona; hei whakaoho ki tōku maunga tapu! Kia wiri ngā tāngata katoa o te whenua; kei te haere mai hoki te rā o Ihowā, kua tata –

² he rā pōuri, he rā tukupū, he rā kapua, he pōuri kerekere! Ānō ko te ata kua hōrapa noa atu i runga i ngā maunga; he iwi nui, kaha, kāhore ōna rite i mua, kāhore hoki he pērā i ngā wā i muri ā taea noatia ngā tau o ngā whakatupuranga maha.

³ I mua i a rātou ko te ahi e kai ana, i muri i a rātou ko te mura e ngiha ana. Ko te whenua i mua i a rātou me te mea ko te kāri o Erene, ā, i muri i a rātou he koraha ururua; āe rā, kāhore he mea i puta i a rātou.

⁴ Ko tō rātou āhua kei tō ngā hōiho; ko tā rātou oma rite tonu ki tā te kaieke hōiho.

⁵ E peke ana rātou, ānō ko te haruru o ngā hāriata i runga i ngā tihi o ngā maunga, ānō ko te haruru o te mura ahi e kai ana i te kakau wīti, ki te iwi kaha kua oti te whakarārangi mō te whawhai.

⁶ Ka mamae ngā iwi i tō rātou aroaro; ka kōmā ngā kanohi katoa.

⁷ Ko tā rātou oma rite tonu ki tā ngā mārohirohi; ko tā rātou piki i te taiepa rite tonu ki tā ngā tāngata whawhai. Haere tonu rātou i tōna ara, i tōna ara, kāhore ō rātou ara e korara.

⁸ Kāhore tētahi e tutetute i tōna hoa; ka haere rātou i tōna ara, i tōna ara; ā, ka huaki rātou mā roto i ngā rākau o te riri, ā, kāhore e tapeka i tō rātou ara.

⁹ Ka peke rātou ki runga ki te pā; ka oma rātou i runga i te taiepa. Ka piki rātou ki roto ki ngā whare; ka tomo rātou i ngā matapihi, ānō he tāhae.

¹⁰ Rū ana te whenua i tō rātou aroaro; wiri ana ngā rangi. Ko te rā me te marama, pōuri tonu, ka mutu anō te titi o ngā whetū.

¹¹ Nā, ka puaki te reo o Ihowā i te aroaro o tāna ope; nui atu hoki tāna puni! He kaha hoki ia e mahi nei i tāna kupu. He nui nei hoki te rā o Ihowā, he wehi rawa; ko wai e kaha ake ki reira?

He Karanga ki te Rīpenetā

¹² “Otiia ināianei nei anō,” e ai tā Ihowā, “tahuri koutou ki ahau, ō koutou ngākau katoa, i runga anō i te nohopuku, i te tangi, i te auē.”

¹³ Haea hoki ō koutou ngākau, hāunga ō koutou kākahu. Ā, tahuri ki a Ihowā, ki tō koutou Atua, he aroha hoki tōna, he mahi tohu, he pūhoi ki te riri, he nui tōna atawhai, ā, e rīpenetā ana ia ki te kino.

¹⁴ Ko wai ka tohu, tērā pea ka tahuri, ka puta kē ōna whakaaro, ā, ka mahue he manaaki i muri i a ia, arā he whakahere totokore, he ringihanga mā Ihowā, mā tō koutou Atua?

¹⁵ Whakatangihia te tētere ki Hiona, whakatapua he nohopuku, karangatia he hui nui;

¹⁶ whakaminea te iwi, whakatapua te whakaminenga, tāwhiua mai ngā kaumātua, whakaminea ngā tamariki, rātou ko ngā mea ngote ū. Kia puta te tāne mārena hou i roto i tōna rūma, te wahine mārena hou i roto i tōna whare moenga.

¹⁷ Kia tangi ngā tohunga, ngā minita a Ihowā, ki te takiwā o te whakamahau, o te āta. Me te kī atu anō, “Tohungia, e Ihowā, tāu iwi, kaua anō tōu kāinga tupu e tukua ki te ingoa kino, kia meinga ko ngā tauiwi hei rangatira mō rātou. Kia kōrerotia hei aha i roto i ngā iwi, ‘Kei hea tō rātou Atua?’ ”

Ka Whakahokia e Ihowā te Mōmonatanga ki te Whenua

¹⁸ Kātahi ka hae a Ihowā ki tōna whenua, ka manawapā ki tāna iwi.

¹⁹ Ā, ka whakahoki mai a Ihowā, ka kī mai ki tāna iwi: “Tēnei ahau te tuku atu nei i te wīti ki a koutou, i te wāina, i te hinu, e mākona ai koutou; e kore anō e tuku i a koutou ā muri nei hei ingoa kino i roto i ngā tauiwi.

²⁰ “Engari, ka mea ahau kia matara atu i a koutou te ope o te raki, ka āia atu anō ia e ahau ki te whenua waikore, maroke rawa; ko tōna mata, anga tonu ki te moana i te rāwhiti, ko tōna tuarā ki te moana i te uru; ā, ka puta ake tōna piro, ka puta ake anō tōna haunga kino, he nui hoki nō āna mahi.”

²¹ Kaua e wehi, e te oneone; whakamanamana, kia koa; nō te mea he nunui ngā mahi a Ihowā!

²² Kaua e wehi, e ngā kararehe o te pārae; ka pihi hoki ngā tarutaru o te koraha, ka hua te rākau i ōna hua, e tukua mai anō tōna kaha e te piki, e te wāina.

²³ Nā, whakamanamana, e ngā tama a Hiona, kia koa ki a Ihowā, ki tō koutou Atua; ka tika hoki tāna hōmai i tō mua ua ki a koutou, ā, ka meinga e ia te ua, tō mua ua, me tō muri ua, kia heke iho mā koutou i te marama tuatahi.

²⁴ Ā, ka kapi ngā patunga wīti i te wīti; ko te wāina anō me te hinu o ngā waka, pūrena tonu.

²⁵ “Ā, ka whakahokia mai e ahau ki a koutou ngā tau i kainga e te māwhitiwhiti, e te tātarakihi, e te moka, e te whangawhanga, e tāku ope nui i tukua atu e ahau ki a koutou.

²⁶ “Ka kai noa atu anō koutou, ka mākona, ka whakamoemiti hoki ki te ingoa o Ihowā, o tō koutou Atua, mō tāna mahi whakamīharo ki a koutou. E kore anō tāku iwi e whakamā ā ake ake.

²⁷ Ā, ka mōhio koutou kei waenga ahau i a Īharaira, ko Ihowā hoki ahau, ko tō koutou Atua, kāhore atu hoki. E kore anō tāku iwi e whakamā, ā ake ake.”

Ka Ringihia te Wairua o Ihowā

²⁸ “Nā, tēnei ake, ka ringihia e ahau tōku wairua ki ngā kikokiko katoa, ā, e poropiti ā koutou tama, ā koutou tamāhine, ka moemoeā ō koutou kaumātua, ā, ka kitea te kitenga e ā koutou taitamariki.

²⁹ I aua rā anō ka ringihia e ahau tōku wairua ki ngā pononga tāne, ki ngā pononga wāhine.

³⁰ Ka hoatu anō e ahau he mea whakamīharo i te rangi, i te whenua, he toto, he kāpura, he pou paowa.

³¹ Ka rerekē te rā, ka pōuri, ka whakatoto te marama, i te mea kīanō i puta mai te rā nui, te rā wehi o Ihowā.

³² Nā, ko te hunga katoa e karanga ana ki te ingoa o Ihowā, ka mawhiti. Nō te mea hei Maunga Hiona, hei Hiruhārama, ētahi e mawhiti ana, pērā me tā Ihowā i kī ai, ā, i roto anō i ngā mōrehu ētahi e karangatia ana e Ihowā.”