Hoera 1 - Paipera Tapu 2012

¹ Ko te kupu a Ihowā i puta mai ki a Hoera tama a Petuere.

He Tangi mō te Urupatu o ngā Huanga Kai

² Whakarongo ki tēnei, e ngā kaumātua, kia whai taringa, e ngā tāngata katoa o te whenua. I ō koutou rā rānei tēnei, i ngā rā rānei o ō koutou mātua?

³ Kōrerotia taua mea ki ā koutou tamariki, mā ā koutou tamariki anō hoki e kōrero ki ā rātou tamariki, ā, mā ā rātou tamariki e kōrero ki tētahi atu whakatupuranga.

⁴ Ko te toenga a te whangawhanga pau ake i te māwhitiwhiti; ko te toenga a te māwhitiwhiti pau ake i te tātarakihi; ā, ko te toenga a te tātarakihi pau ake i te moka.

⁵ E ara, e te hunga haurangi, e tangi; auē, e ngā kaiinu wāina katoa, ki te wāina hou; kua whakakorea nei hoki mā ō koutou māngai.

⁶ Kei te haere mai tētahi iwi ki tōku whenua, he kaha, e kore e taea te tatau; ko ōna niho he niho raiona, he niho pūrākau ōna nō te raiona kātua.

⁷ Kore ake i a ia tāku wāina, ko tāku piki tīhorea ake e ia; poto rawa te peha i a ia, ākiri rawa; ko ōna manga meinga ana kia mā.

⁸ E tangi, kia rite ki te tamahine kua oti te whītiki ki te kākahu taratara, e tangi ana ki te makau o tōna tamāhinetanga.

⁹ Kua whakakāhoretia te whakahere totokore me te ringihanga i roto i te whare o Ihowā. Kei te tangi ngā tohunga, ngā minita a Ihowā.

¹⁰ Kua hē te māra, kei te tangi te oneone; nō te mea kua mate te wīti, kua maroke te wāina hou, kua kahakore te hinu.

¹¹ Kia whakamā, e ngā kaingaki whenua; auē, e ngā kaimahi wāina, mō te wīti, mō te pārei; kua kore nei hoki ngā hua o te māra.

¹² Kua maroke te wāina, kua pūtokitoki te piki; ko te pamekaranete, ko te nīkau, ko te āporo – ko ngā rākau katoa o te whenua, kua maroke; kua maroke nei hoki te koa i roto i ngā tamariki a te tangata.

He Karanga ki te Rēpenatā me te Īnoi

¹³ Tātua i a koutou ki te kākahu taratara, e tangi, e koutou e ngā tohunga; auē, e ngā minita o te āta. Haere mai, hei te mea taratara he kākahu mō koutou i te pō, e ngā minita o tōku Atua. Kua kore nei hoki te whakahere totokore me te ringihanga i roto i te whare o tō koutou Atua.

¹⁴ Whakatapua he nohopuku, karangatia he hui nui. Whakaminea ngā kaumātua, ngā tāngata katoa o te whenua, ki te whare o Ihowā, o tō koutou Atua, ka karanga ki a Ihowā.

¹⁵ Auē te mate o taua rā nei! Kua tata hoki te rā o Ihowā, ka rite hoki tōna putanga mai ki te whakangaromanga a te Kaha Rawa.

¹⁶ He teka ianei kua hātepea atu te kai i mua atu i ō tātou kanohi, āe rā, te koa, me te whakamanamana i roto i te whare o tō tātou Atua?

¹⁷ Kua pirau te purapura i raro i ngā pōkurukuru; kua takoto kau ngā whare kai, kua pākarukaru ngā whare wīti; nō te mea kua ngingio te wīti.

¹⁸ Anō te auē o ngā kararehe! Raruraru ana ngā kāhui kau i te kore wāhi kai mā rātou; āe rā, ko ngā kāhui hipi he noa iho.

¹⁹ E Ihowā, ka karanga ahau ki a koe. Kua pau hoki i te ahi ngā wāhi kai o te koraha, kua wera i te mura ngā rākau katoa o te pārae.

²⁰ Āe rā, kei te tangi hoki ngā kararehe o te pārae ki a koe; nō te mea kua maroke ngā awa wai, kua pau hoki i te ahi ngā wāhi kai o te koraha.