Hoani 1 - Paipera Tapu 2012

Te Kupu o te Ora

¹ I te tīmatanga te Kupu, i te Atua te Kupu, ko te Atua anō te Kupu.

² I te Atua anō tēnei Kupu i te tīmatanga.

³ Nāna ngā mea katoa i hanga; kāhore hoki tētahi mea i kore te hanga e ia o ngā mea i hangā.

⁴ I a ia te ora; ko te ora te mārama mō ngā tāngata.

⁵ I roto i te pōuri te mārama e whiti ana; heoi, kīhai i mau i te pōuri.

⁶ I tonoa mai he tangata e te Atua, ko Hoani tōna ingoa.

⁷ I haere mai ia hei kaiwhakaatu, hei whakaatu mō te mārama, kia meinga ai e ia ngā tāngata katoa kia whakapono.

⁸ Ehara ia i te mārama, engari, i haere mai hei kaiwhakaatu mō te mārama.

⁹ Ko te mārama pono tērā, arā, ko te mārama e mārama ai ngā tāngata katoa e haere mai ana ki te ao.

¹⁰ I te ao ia, i hangā anō e ia te ao, ā, kīhai te ao i mōhio ki a ia.

¹¹ I haere mai ia ki ōna, ā, kīhai ōna i manako ki a ia.

¹² Tēnā ko te hunga i manako ki a ia i tukua e ia ki a rātou ngā tikanga e meinga ai rātou hei tamariki mā te Atua, arā ki te hunga e whakapono ana ki tōna ingoa.

¹³ Ki te hunga ehara nei i te toto, ehara i tā te kikokiko i pai ai, ehara i tā te tangata i pai ai, engari, nā te Atua i whānau ai.

¹⁴ I whakakikokikotia te Kupu, ā, noho ana i a mātou, i kite anō mātou i tōna korōria he korōria e rite ana ki tō te Tama kotahi a te Matua, kī tonu i te aroha noa, i te pono.

¹⁵ I kōrerotia ia e Hoani; i karanga tērā, i mea, “Ko ia tēnei i kōrerotia rā e ahau, ‘Ko ia e haere mai ana i muri i ahau e meinga ana ki mua i ahau; nō mua hoki ia i ahau.’ ”

¹⁶ Kua riro hoki i a tātou katoa tētahi wāhi o tōna raneatanga, te aroha noa hono iho ki te aroha noa.

¹⁷ Nā Mohi hoki i hōmai te ture; ko te aroha noa me te pono i ahu mai i a Īhu Karaiti.

¹⁸ Kāhore anō he tangata i kite noa i te Atua; ko te Tama kotahi, kei te uma nei o te Matua, nāna ia i whakapuaki.

Te Kōrero a Hoani Kaiiriiri

¹⁹ Nā, ko te kōrero tēnei a Hoani, i te tononga mai a ngā Hūrai i Hiruhārama i ngā tohunga nui rātou ko ngā Rīwaiti hei ui ki a ia, “Ko wai koe?”

²⁰ Nā, ka whākina e ia, kīhai i whakakāhore, i whāki hoki, “Ehara ahau i a te Karaiti.”

²¹ Ā, ka ui rātou ki a ia, “Tēnā, pēhea? Ko Irāia koe?” Ka mea ia, “Kāhore.” “Ko te poropiti oti koe?” Ka whakahokia e ia, “Kāhore.”

²² Nā, ka mea rātou ki a ia, “Ko wai koia koe? Hei kupu whakahoki mā mātou ki te hunga i tonoa mai ai mātou. E pēhea ana koe ki a koe?”

²³ Ka mea ia: “He reo ahau nō tētahi e karanga ana i te koraha, ‘Whakatikaia te huarahi o te Ariki!’ ” He pērā me tā Ihāia poropiti i mea ai.

²⁴ Nō ngā Parihi hoki te hunga i tonoa mai rā.

²⁵ Nā, ka ui rātou ki a ia, ka mea ki a ia, “He aha oti koe i iriiri ai, ki te mea ehara koe i a te Karaiti, ehara i a Irāia, ehara i te poropiti?”

²⁶ Nā, ka whakahoki a Hoani ki a rātou, ka mea, “He iriiri tāku ki te wai; otiia tēnā te tū nā i waenganui i a koutou tētahi kāhore e mōhiotia e koutou.

²⁷ Ko ia tēnei e haere mai ana i muri i ahau kāhore hoki ahau e tau hei wewete i te here o tōna hū.”

²⁸ I meatia ēnei mea ki Petapara, ki tāwāhi atu o Horano, ki te wāhi e iriiri ana a Hoani.

Te Reme a te Atua

²⁹ I te aonga ake, ka kite ia i a Īhu e haere ana mai ki a ia, ka mea, “Nā te Reme a te Atua, hei waha atu i te hara o te ao!

³⁰ Ko ia tēnei i kōrero ai ahau, ‘Kei te haere mai i muri i ahau tētahi tangata kua meinga ki mua i ahau; nō mua hoki ia i ahau.’

³¹ Ā, kāhore ahau i mātau ki a ia; heoi, hei whakakite i a ia ki a Īharaira, i haere mai ai ahau me tāku iriiri ki te wai.”

³² Nā, ka whakaatu a Hoani, ka mea, “I kite ahau i te Wairua e heke iho ana i te rangi, ānō he kūkupa, ā, noho ana i runga i a ia.

³³ Ā, kāhore ahau i mātau ki a ia; engari i kī mai ki ahau te kaitono mai i ahau ki te iriiri ki te wai, ‘Ko te tangata e kite ai koe i te Wairua e heke iho ana, e noho ana ki runga ki a ia, ko ia tēnā te kaiiriiri ki te Wairua Tapu.’

³⁴ Ā, kua kite ahau, kua whakaatu nei hoki, ko te Tama tēnei a te Atua.”

Ngā Ākonga Tuatahi a Īhu

³⁵ I te aonga ake i te tū anō a Hoani me āna ākonga tokorua;

³⁶ nā, ka titiro ia ki a Īhu e haere ana, ka mea, “Nā, te Reme a te Atua!”

³⁷ Ā, ka rongo ngā ākonga tokorua ki a ia e kōrero ana, ā, aru ana rāua i a Īhu.

³⁸ Ā, ka tahuri a Īhu, ka kite i a rāua e aru ana, ka mea ia ki a rāua “E rapu ana kōrua i te aha?” Nā, ko tā rāua meatanga ki a ia, “E Rapi” (ko te tikanga tēnei ina whakamāoritia, e te Kaiwhakaako), “kei hea tōu kāinga?”

³⁹ Ka mea ia ki a rāua, “Haere mai kia kite.” Haere ana rāua, ā, ka kite i tōna wāhi i noho ai, ā, noho ana i a ia i taua rā; ko te tekau hoki ia o ngā hāora.

⁴⁰ Ko Anaru, teina o Haimona Pita tētahi o taua tokorua i rongo nei ki a Hoani e kōrero ana, ā, aru ana i a ia.

⁴¹ Ko ia kua kite wawe i tōna tuakana ake, i a Haimona, ka mea ki a ia, “Kua kitea e māua te Mīhaia.” (Ko te tikanga tēnei ina whakamāoritia, ko te Karaiti).

⁴² Nā, ka ārahina mai ia e ia ki a Īhu. Ā, ka titiro a Īhu ki a ia, ka mea, “Ko Haimona koe, ko te tama a Hona, me hua koe ko Kipa.” (Tōna whakamāoritanga ko Pita, arā ko Kōhatu).

Ka Karangatia e Īhu ki a Piripi rāua ko Natanahira

⁴³ I te aonga ake ka mea a Īhu kia haere ki Karirī, ā, ka kite i a Piripi; ā, ka mea a Īhu ki a ia, “E aru i ahau.”

⁴⁴ Nā, ko Piripi nō Petahaira, nō te pā o Anaru rāua ko Pita.

⁴⁵ Ka kite a Piripi i a Natanahira, ka mea ki a ia, “Kua kitea e mātou a ia, mōna nei te tuhituhi a Mohi i roto i te ture, tā ngā poropiti hoki, a Īhu o Nahareta te tama a Hōhepa.”

⁴⁶ Nā, ka mea a Natanahira ki a ia, “E puta koia tētahi mea pai i Nahareta?” Ka mea a Piripi ki a ia, “Haere mai kia kite.”

⁴⁷ Ka kite a Īhu i a Natanahira e haere ana mai ki a ia, ka puaki tāna kupu mōna, “Nā, he tino tangata nō Īharaira, kāhore ōna tinihanga.”

⁴⁸ Ka mea a Natanahira ki a ia, “Nō hea koe i mātau ai ki ahau?” Ka whakahoki a Īhu ki a ia, ka mea, “I te mea kīanō koe i karangatia e Piripi, i a koe anō i raro i te piki, i kite ahau i a koe.”

⁴⁹ Nā, ka whakahoki a Natanahira, ka mea ki a ia, “E Rapi, ko te Tama koe a te Atua, ko te Kīngi koe o Īharaira!”

⁵⁰ Nā, ka whakahoki a Īhu, ka mea ki a ia, “Nō tāku meatanga ki a koe, ‘I kite ahau i a koe i raro i te piki,’ i whakapono ai koe? Rahi atu i ēnei ngā mea e kitea e koe.”

⁵¹ I mea anō ia ki a ia, “He pono, he pono tēnei kupu āku ki a koutou, tērā koutou e kite i te rangi e tuwhera ana, i ngā anahera a te Atua e piki ake ana, e heke iho ana ki te Tama a te tangata.”