Hiperu 3 - Paipera Tapu 2012

He Nui kē ake a Īhu i a Mohi

¹ Nā, e ōku tēina tapu, e te hunga kua uru nei ki tā te rangi karanga, whakaaroa a Īhu Karaiti, te Āpōtoro, te Tohunga Nui o te tikanga kua whakaaetia nei e tātou;

² i pono nei ki tōna kaiwhakarite mai, i pērā anō me Mohi i tōna whare katoa.

³ I tika hoki kia nui ake te korōria mō tēnei tangata i tō Mohi, nō te mea nui ake i tō te whare te hōnore o te kaihanga.

⁴ He mea hanga hoki nā tētahi ngā whare katoa; ko te Atua ia te kaihanga o ngā mea katoa.

⁵ Ā, i pono anō a Mohi i roto i tōna whare katoa, i pērā me te pononga, hei whakaatu mō ngā mea ka kōrerotia i muri;

⁶ ko te Karaiti ia i rite ki te tama i tōna whare anō; ko tōna whare tonu hoki tātou, ki te ū tō tātou māia me te whakamanamana ki te mea e tūmanakohia atu nei, ā taea noatia te mutunga.

He Okiokinga mō te Hunga a te Atua

⁷ Nā, kia rite ki tā te Wairua Tapu i mea ai: “Ki te rongo koutou ki tōna reo āianei,

⁸ kaua e whakapakeketia ō koutou ngākau, kei pērā me o te whakatoinga, i te rā o te whakamātautauranga i te koraha.

⁹ I ahau i whakamātautauria e ō koutou mātua, i ahau i āta mōhiotia, e whā tekau ngā tau i kite ai rātou i āku mahi.

¹⁰ Nā, ka hōhā ahau ki taua whakatupuranga, ka mea, ‘Kotiti kē tonu ō rātou ngākau; kāhore rātou e mōhio ki āku ara.’

¹¹ Nā reira i riri ai ahau, i oati ai hoki: ‘E kore rātou e tae ki tōku okiokinga.’ ”

¹² Kia tūpato, e ōku tēina, kei noho te ngākau kino, whakapono kore i roto i tētahi o koutou; kei whakarērea te Atua ora.

¹³ Engari, me whakahau koutou tētahi i tētahi i tēnei rā, i tēnei rā, i te mea e kīia ana “Ko tēnei rā,” kei whakapakeketia tētahi o koutou e te tinihanga o te hara.

¹⁴ Ka uru hoki tātou ki tā te Karaiti, ki te mea ka mau i a tātou te tīmatanga o te whakaaro pūmau, taea noatia te mutunga.

¹⁵ I te mea hoki e kōrerotia ana: “Ki te rongo koutou ki tōna reo āianei, kaua e whakapakeketia ō koutou ngākau, kei pērā me o te whakatoinga.”

¹⁶ Ko wai hoki i whakatoi i tō rātou rongonga? He teka ianei ko te hunga katoa i haere mai i Īhipa, a Mohi i ārahi rā?

¹⁷ I riri hoki ia ki a wai i ngā tau e whā tekau? He teka ianei ki te hunga i hara, i hinga rā ō rātou tinana ki te koraha?

¹⁸ I oati anō ia ki a wai, e kore rātou e tae ki tōna okiokinga? He teka ianei ki te hunga kīhai nei i whakapono?

¹⁹ Nā, ka kite nei tātou kīhai rātou i āhei te tae atu i te kore o te whakapono.