Heremaia 9 - Paipera Tapu 2012

¹ Auē, me he wai tōku māhunga, me he puna roimata ōku kanohi, kia tangihia ai e ahau ngā tūpāpaku o te tamāhine a tāku iwi i te ao, i te pō!

² Auē, me he tīhokahoka tōku, he mea nā te tira haere i te koraha! Kia whakarērea ai e ahau tāku iwi, kia mawehe ai i roto i a rātou, he hunga pūremu katoa nei hoki rātou, he huihuinga nō te hunga tinihanga.

³ “Me te mea he kōpere nā rātou ō rātou arero e whakapikoa ana hei kōrero teka; kua tupu kaha ake rātou i runga i te whenua, kāhore ia mō te pono; engari e koni atu ana i te kino ki te kino, kāhore hoki ō rātou mōhio ki ahau,” e ai tā Ihowā.

⁴ “Kia tūpato i ō koutou hoa, e tēnei, e tēnei, kaua e whakawhirinaki ki te tuakana, ki te teina. Nō te mea he māminga rawa tā ngā tuākana, tā ngā tēina katoa; kei runga anō i te ngautuarā te haere o ngā hoa katoa.

⁵ Ka tinihangatia e rātou tōna hoa, tōna hoa, kāhore hoki he pono o te kōrero; kua whakaakona e rātou ō rātou arero ki te kōrero teka; ruha noa rātou i te mahinga i te hē.

⁶ Kei waenga tinihanga koe e noho ana; nā te tinihanga rātou te pai ai ki te mōhio ki ahau,” e ai tā Ihowā.

⁷ Heoi, ko te kupu tēnei a Ihowā o ngā mano: “Nanā, ka whakarewa ahau i a rātou, ka whakamātau i a rātou; me pēhea hoki ahau, ko te tamāhine nei ia a tāku iwi?

⁸ Ko te rite i tō rātou arero kei te kōpere whakamate; he kōrero tinihanga tāna. He kōrero pai tā te māngai o tētahi ki tōna hoa, kei roto ia i tōna ngākau e whanga ana mōna.

⁹ E kore ianei ahau e whiu i a rātou mō ēnei mea? e ai tā Ihowā; e kore ianei tōku wairua e rapu utu i te iwi pēnei?”

¹⁰ He whakaaro ki ngā maunga i ara ai tāku tangi, tāku auē, he whakaaro ki ngā puninga o te koraha tāku uhunga; nō te mea kua wera, kāhore tētahi tangata e tika nā reira, kāhore e rangona te reo o ngā kararehe; ko ngā manu o te rangi, ko ngā kararehe, pūtere atu ana, kua riro.

¹¹ “Ka meinga hoki e ahau a Hiruhārama hei pūranga, hei nohoanga kurī mohoao, ka meinga anō e ahau ngā pā o Hūrā kia ururuatia, tē ai he tangata.”

¹² Ko wai te tangata whakaaro nui e mātau ana ki tēnei? I kōrerotia anō ki a wai e te māngai o Ihowā, māna e whakaatu? He aha rā te whenua i whakangaromia ai, i wera ai, ānō ko te koraha, kāhore he tangata e tika ana i reira?

¹³ Anō rā ko Ihowā: “Mō rātou i whakarere i tāku ture i hoatu e ahau ki tō rātou aroaro, ā, kīhai i whakarongo ki tōku reo, kīhai i haere i taua ara.

¹⁴ Nā, haere ana rātou i ngā tikanga mārō o ō rātou ngākau; kei te whai i ngā Paarimi i whakaakona nei e ō rātou mātua ki a rātou.”

¹⁵ Heoi, ko te kupu tēnei a Ihowā o ngā mano, a te Atua o Īharaira: “Tēnei ahau te whāngai nei i a rātou, i tēnei iwi, ki te taru kawa, te whakainu nei i a rātou ki te wai kawa.

¹⁶ Ka whakamararatia anō rātou e ahau ki roto ki ngā iwi kīhai nei i mōhiotia e rātou, e ō rātou mātua; ka ungā anō e ahau te hoari hei whai i a rātou ā poto noa rātou i ahau.”

Ka Karanga atu te Iwi o Hiruhārama kia Āwhinatia

¹⁷ Ko te kupu tēnei a Ihowā o ngā mano: “Whakaaroa e koutou, karangatia hoki ngā wāhine tangi kia haere mai; unga tāngata ki ngā wāhine whakaaro nui kia haere mai.

¹⁸ Kia hohoro anō te ara o tā rātou tangi mō tātou, kia tārere ai ngā roimata o ō tātou kanohi, kia maringi iho ai ngā wai o ō tātou kamo.

¹⁹ Nō te mea e rangona ana te reo tangi i Hiona: ‘Anō tō tātou pāhuatanga! Nui atu tō tātou whakamā, nō te mea kua mahue i a tātou te whenua, nō te mea kua turakina mai e rātou ō tātou nohoanga.’ ”

²⁰ Whakarongo rāia, e ngā wāhine, ki te kupu a Ihowā, kia riro anō i ō koutou taringa te kupu a tōna māngai. Whakaakona ā koutou tamāhine ki te tangi, ngā hoa hoki o tēnei, o tēnei, ki te uhunga.

²¹ Nō te mea kua tae ake te mate ki roto ki ō tātou matapihi, kua tomo ki ō tātou whare kīngi, hautope atu ai i ngā kōhungahunga i waho, i ngā taitamariki anō hoki i ngā huanui.

²² Kōrero! “Ko te kupu tēnei a Ihowā: ‘Tērā ngā tinana o ngā tāngata e hinga ānō he whakawairākau ki te mata o te māra, ānō he kutanga wīti i muri i te kaitapahi, ā, kāhore he kaikohi.’ ”

²³ Ko te kupu tēnei a Ihowā: “Kaua te tangata whakaaro nui e whakamanamana ki tōna whakaaro nui, kaua hoki te mārohirohi e whakamanamana ki tōna mārohirohi; kaua te tangata taonga e whakamanamana ki ōna taonga;

²⁴ engari, ko tēnei hei whakamanamananga mā te tangata whakamanamana, arā kua whai whakaaro ia, kua mōhio ki ahau, ko Ihowā ahau, ko te kaimahi o te mahi tohu, o te whakawā, o te tika i runga i te whenua; ko āku hoki ēnei e whakaahuareka ai,” e ai tā Ihowā.

²⁵ “Nanā, kei te haere mai ngā rā,” e ai tā Ihowā, “e whiua ai e ahau te hunga katoa i kotia i roto i tō rātou kotingakore:

²⁶ ko Īhipa, ko Hūrā, ko Ēroma, ko ngā tama a Āmona, ko Moapa, ko te hunga katoa e noho ana i te koraha, e whakaihoa nei ngā tapa o ō rātou makawe. He mea kokotikore hoki ngā iwi katoa; ko te whare katoa anō o Īharaira, he mea kokotikore te ngākau.”