Heremaia 6 - Paipera Tapu 2012

Te Putanga me te Wiwini o te Whakaekenga

¹ “Putere atu, e ngā tama a Pineamine, i roto i Hiruhārama! Whakatangihia te tētere ki Tekoa, kōkiritia ake he ahi tohu ki Petehakereme. He kino hoki te titiro mai nei i te raki, he whakangaromanga nui.

² Ka tapahia atu e ahau te wahine ātaahua, te wahine whakatarapī, te tamāhine a Hiona.

³ Ka haere mai ngā hēpara, me ā rātou kāhui ki a ia; ka whakatūria ō rātou tēneti ki tētahi taha ōna, ki tētahi taha; ka kai rātou ki tōna wāhi, ki tōna wāhi.

⁴ “Kia rite ngā mea mō te whawhai ki a ia; whakatika, kia whakaekea i te poutūmārōtanga. Auē te mate mō tātou! Kua tāwharara hoki te rā, kua whakawairua kau anō ngā ātārangi o te ahiahi.

⁵ Maranga, kia whakaekea e tātou te pō, kia wāwāhia anō ōna whare kīngi.”

⁶ Ko te kupu hoki tēnei a Ihowā o ngā mano: “Tuaina he rākau, haupūria ake he pukepuke hei whawhai ki Hiruhārama. Ko te pā tēnei e whiua; he tūkino kau tāna i roto i a ia.

⁷ Rite tonu ki te pukenga ake o te wai o te puna te pukenga ake o tōna kino. He tūkino, he pāhua te rangona ana i roto i a ia; kei tōku aroaro tonu te mamae me te patunga.

⁸ E ako, e Hiruhārama, kei puta kē tōku ngākau ki a koe, kei meinga koe e ahau kia ururuatia, he whenua kāhore e nohoia.”

⁹ Ko te kupu tēnei a Ihowā o ngā mano: “Ka āta hamua mārietia ngā toenga o Īharaira, ānō he wāina; kia rite tāu ki tā te kaikohi karepe, whakahokia iho tōu ringa ki roto ki ngā kete.”

¹⁰ Ki a wai rā tāku kōrero, tāku whakaatu tikanga, e rongo ai rātou? Nanā, he mea kokotikore tō rātou taringa, tē whakarongo ai rātou. Nanā, hei tāwainga mā rātou te kupu a Ihowā, kāhore e arongia e rātou.

¹¹ Nā, kī tonu ahau i te riri o Ihowā; ruha iho ahau i te koromaki. “Ringihia ki runga ki te kōhungahunga i te ara, ki te whakaminenga anō o ngā taitamariki, hui katoa; nō te mea ka hopukia te tāne rāua ko te wahine, te koroheke rāua ko te tangata kua maha ōna rā.

¹² Ka riro kē ō rātou whare i ētahi atu, ngā māra ngātahi anō ko ngā wāhine; nō te mea ka totoro tōku ringa ki ngā tāngata o te whenua,” e ai tā Ihowā.

¹³ “Ko te mea iti ō rātou, ko te mea nui hoki kei runga i te apo; ko te poropiti, ko te tohunga, rātou katoa kei te mahi teka.

¹⁴ Ko tā rātou rongoātanga hoki i te mamae o tāku iwi he hanga noa iho; e kī ana, ‘Ka mau te rongo, ka mau te rongo’; i te mea kāhore nei he maunga rongo.

¹⁵ I whakamā rānei rātou i a rātou e mahi ana i ngā mea whakarihariha? Hore rawa ō rātou whakamā, kāhore hoki i mōhio ki te numinumi. Mō reira ka hinga rātou i roto i te hunga e hinga ana; i te wā e whiu ai ahau i a rātou, ka whakatakā rātou,” e ai tā Ihowā.

¹⁶ Ko te kupu tēnei a Ihowā: “E tū ki ngā ara, tirohia atu, uia ngā ara tawhito kei hea te ara pai, ka haere i reira, ā, ka kite koutou i te tānga manawa mō ō koutou wairua. Heoi, e kī mai ana rātou, ‘E kore mātou e haere i reira.’

¹⁷ I whakatūria anō e ahau ētahi kaitūtei mō koutou, i mea ahau, ‘Whakarongo ki te tangi o te tētere.’ Heoi, e kī ana rātou, ‘E kore mātou e whakarongo.’

¹⁸ Mō reira, whakarongo, e ngā iwi, kia mōhio anō koe, e te huihui, ki ngā mea kei roto i a rātou.

¹⁹ Whakarongo, e te whenua; tēnei ahau te kawe mai nei i te kino mō tēnei iwi, i ngā hua o ō rātou whakaaro; mō rātou kīhai i whakarongo ki āku kōrero; ko tāku ture, paopaongia ake e rātou.

²⁰ Hei aha te whakakakara i tae mai ai ki ahau i Hēpā, te kākaho kakara i te whenua tawhiti? E kore ā koutou tahunga tinana e arongia, e kore anō ā koutou patunga tapu e reka ki ahau.

²¹ Mō reira ko te kupu tēnei a Ihowā: Tēnei ahau te whakatakoto nei i ngā tūtukitanga waewae ki mua i tēnei iwi, e tūtuki ngātahi ai ngā mātua, ngā tamariki; ka ngaro te tangata noho tata rāua ko tōna hoa.”

²² Ko te kupu tēnei a Ihowā: “Tēnei te haere mai nei he iwi i te whenua ki te raki, ka whakaarahia mai anō he iwi nui i ngā pito o te whenua.

²³ Ka mau rātou ki te kōpere, ki te tao; he nanakia rātou, e kore hoki e tohu tāngata. Ko tō rātou reo, ānō kei te moana e haruru ana, ā, eke ai rātou i runga i te hōiho; rārangi rawa rātou, me te mea he tāngata e mea ana ki te whawhai ki a koe, e te tamāhine a Hiona.”

²⁴ Kua rongo mātou ki tōna rongo; ngoikore iho ō mātou ringa. Mau pū mātou i te pāwera, i te mamae, me te mea he wahine e whānau ana.

²⁵ Kei puta atu ki te māra, kaua hoki e haere i te ara; kei reira hoki te hoari a te hoariri, ā, kei ngā taha katoa te wehi.

²⁶ E te tamāhine a tāku iwi, whītikiria te kākahu taratara, ka takaoriori ki te pungarehu, hei te tangi ki te huatahi tāu tangi ki a koe, kia tīwerawera te tangi; nō te mea kīhai i aha kua tae mai te kaipāhua ki a tātou.

²⁷ “Kua oti koe te mea e ahau hei pourewa, hei pā kaha, i roto i tōku iwi; kia mōhio ai koe, kia whakamātau ai i tō rātou ara.

²⁸ He tino nui tō rātou tutū, ā, ko tā rātou i a rātou e hāereere ana he ngau tuarā. He parāhi rātou, he rino; he hunga whakangau kē rātou katoa.

²⁹ Kei te kakā te hau o te pupuhi ahi; kua pau te matā i te ahi, maumau whakarewa noa te kaitahi para; kāhore nei hoki te hunga kino kia unuhia atu.

³⁰ E huaina rātou e te tangata he hiriwa i paopaongia, nō te mea kua paopao nei a Ihowā ki a rātou.”